ສວນປະຕູໄຊ ປັບປຸງສຳເລັດແລ້ວ 80/100

0
2073

ປັດຈຸບັນການປັບປຸງສວນປະຕູໄຊ ແມ່ນມີຄວາມຈຳເປັນອັນຮີບດ່ວນເນື່ອງຈາກວ່າເປັນສະຖານທີ່ທ່ອງທ່ຽວ ທີ່ມີຄວາມສຳຄັນຂອງນະຄອນຫຼວງວຽງຈັນ ເປັນການສົ່ງເສີມ ແລະ ຂະຫຍາຍພຶ້ນທີ່ສີຂຽວໃຫ້ຕົວເມືອງ ແລະ ປົກປັກຮັກສາມໍລະດົກຂອງຊາດ ເປັນບ່ອນພັກຜ່ອນຂອງຊາວນະຄອນຫຼວງວຽງຈັນ ທັງເປັນບ່ອນຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ.

ຮູບພາບ: TOUN xayvongsa

ທ່ານອຳພາວັນ ມະນີວັນ ຫົວໜ້າຂະແໜງຄຸ້ມຄອງສວນ ໄຟແສງສະຫວ່າງສາທາລະນະ ແລະ ປະດັບປະດາຕົວເມືອງກ່າວວ່າ: ໂຄງການປັບປຸງສວນຫຍ້າ ສວນດອກໄມ້ ແລະ ສິ່ງອຳນວຍຄວາມສະດວກສວນປະຕູໄຊ ມາຮອດປັດຈຸບັນໂຄງການມີຄວາມຄືບໜ້າ 80% ເຊິ່ງເລີ່ມມາຕັ້ງແຕ່ວັນທີ 1 ເດືອນມິຖຸນາຜ່ານມາ ເຊິ່ງຕາມແຜນຈະເຮັດໃຫ້ສຳເລັດໃນວັນທີ 31 ເດືອນ ສິງຫານີ້ ທີ່ສຳເລັດນີ້ແມ່ນໄດ້ສຸ່ມໃສ່ເຂດຊົມຊື້ ມີການປູພຶ້ນ ຈັດແຕ່ງຕົ້ນໄມ້ ແລະ ປະດັບປະດາ ເຊິ່ງຕົ້ນມັດທີ່ເກີດຊະຊາຍຈະໄດ້ຍົກຍ້າຍອອກ.

ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ເປັນເຈົ້າຂອງໂຄງການມູນຄ່າ 3,2 ຕື້ກີບມອບໃຫ້ບໍລິສັດ ພາວເວີພັດທະນາ ແລະ ກໍ່ສ້າງຈຳກັດຜູ້ດຽວເປັນຜູ້ຮັບຜິດຊອບໂດຍໄດ້ກຳນົດອອກເປັນ 3 ເຂດເຊັ່ນ: ເຂດ A ສວນຫຍ້າເບື້ອງປະຕູໄຊຮອດສຸດຂອບລານກິດຈະກຳ, ເຂດ B ແມ່ນລານກິດຈະກຳສວນປະຕູໄຊ ແລະ ເຂດ C ແມ່ນສວນຫຍ້າເບື້ອງຫ້ອງການສັນຕິພາບ, ເຊິ່ງປັດຈຸບັນຍັງມີໜ້າວຽກທີ່ຫຼ້າຊ້າຍ້ອນສະພາບຝົນຕົກ ແລະ ບັນຫາອື່ນໆ.

ທ່ານຍັງໄດ້ກ່າວຕື່ມອີກວ່າ: ໃຫ້ເອົາໃຈໃສ່ຊ່ວຍກັນເພາະສ່ວນໃຫຍ່ປັບປຸ່ງເປັນເດີ່ນຫຍ້າ ເປັນຕົ້ນເບື້ອງໜ້າປະຕູໄຊຈະບໍ່ມີຕົ້ນໄມ້ ຕາມການອອກແບບຂອງສະມະຄົມສະຖາປະນິກ (ສສວ) ເບື້ອງໜ້າຈະປູກແຕ່ຫຍ້າລຽບໆ ສວນຍ່ອມ ແລະ ປ່ຽນດອກໄມ້ຕາມລະດູການ ເພື່ອໃຫ້ຄົນເຮົາແນມເຫັນລວດລາຍຂອງປະຕູໄຊໄດ້ເຊັດເຈນ ແລະ ເດັ່ນຂຶ້ນ ສ່ວນດ້ານຮົ່ມເຢັນ ແມ່ນຈະມີຮົ່ມກົກສາມສາ ເຊິ່ງຈະມີບໍລິການກາເຟ ແລະ ຂາຍເຄື່ອງທີລະນຶກ