8 ເດືອນຕົ້ນປີລົດໄຟລາວ-ຈີນ ຂົນສົ່ງສິນຄ້າໄດ້ 3 ລ້ານກວ່າໂຕນ

0
587

ໃນໄລຍະ 8 ເດືອນກວ່າ ຂອງຕົ້ນປີ 2023 ນີ້, ລົດໄຟ ລາວ-ຈີນ ສາມາດຂົນ ສົ່ງສິນຄ້າໄດ້ 3.101.400 ໂຕນ, ທຽບໃສ່ໄລຍະດຽວກັນຂອງປີທີ່ຜ່ານມາ ເພີ່ມຂຶ້ນ 138%, ສະເລ່ຍ 11.928 ໂຕນ/ມື້, ຂົນສົ່ງສູງສຸດ 15.250 ໂຕນ/ມື້.

ທ່ານ ອານົງເດດ ເພັດໄກສອນ ຮອງຜູ້ອໍານວຍການ ບໍລິສັດທາງລົດໄຟລາວ-ຈີນ ໃຫ້ສໍາພາດຕໍ່ສື່ມວນຊົນລາວ-ຈີນ ເມື່ອບໍ່ດົນນີ້ວ່າ: ນັບແຕ່ເດືອນມັງກອນ ຮອດວັນທີ 17 ກັນ ຍາ 2023 ນີ້, ລົດໄຟ ລາວ-ຈີນ ສາມາດຂົນສົ່ງສິນຄ້າ ບັນລຸ 3.101.400 ໂຕນ. ໃນນັ້ນ, ສິນຄ້າຕົ້ນຕໍ ປະກອບມີ: ໝາກໄມ້, ແປ້ງມັນຕົ້ນ, ເຂົ້າບາເລ, ຢາງພາລາ, ເບຍ, ແຮ່ເຫລັກ, ຫີນຢົກ ແລະ ປຸ໋ຍເຄມີ; ສິນຄ້າທີ່ສົ່ງຈາກ ສປ ຈີນ ມາ ສປປ ລາວ ມີ 344.700 ໂຕນ ແລະ ສິນຄ້າ ທີ່ສົ່ງຈາກລາວ ໄປຈີນ 2.752.200 ລ້ານໂຕນ.

ການຂົນສົ່ງສິນຄ້າ ນັບແຕ່ມື້ເປີດດຳເນີນການ ມາຮອດວັນທີ 17 ກັນຍາ 2023 ນີ້, ສາມາດສົ່ງອອກສິນຄ້າໄດ້ 5.381.900 ໂຕນ, ສະເລ່ຍ 8,229 ໂຕນ/ມື້ ແລະ ຂົນສົ່ງສິນຄ້າໄດ້ສູງສຸດ 15,250 ໂຕນ/ມື້. ປະເພດສິນຄ້າຕົ້ນຕໍປະກອບມີ: ໝາກໄມ້, ແປ້ງມັນຕົ້ນ, ເຂົ້າບາເລ, ຢາງພາລາ, ເບຍ, ແຮ່ເຫລັກ, ແຮ່ເຫລັກເຂັ້ມຂຸ້ນ ແລະ ປຸ໋ຍເຄມີ, ສິນຄ້າທີ່ສົ່ງຈາກຈີນມາລາວ 770.900 ໂຕນ ແລະ ສິນຄ້າທີ່ສົ່ງຈາກລາວໄປຈີນ 4.560.800 ໂຕນ.

ທ່ານ ອານົງເດດ ເພັດໄກສອນ ໃຫ້ຮູ້ອີກວ່າ: ສຳລັບ ການຂົນສົ່ງຜູ້ໂດຍສານ ນັບແຕ່ມື້ເປີດດຳເນີນການທາງລົດໄຟ ມາຮອດ ວັນທີ 17 ກັນຍາ 2023 ໄດ້ຂົນສົ່ງຜູ້ໂດຍສານ ໄດ້ທັງໝົດ 3.197.600 ຄົນ, ສະເລ່ຍ 4.889 ຄົນ/ມື້ ແລະ ສະຖິຕິສູງສຸດ 10.197ຄົນ/ມື້. ສະເພາະປີ 2023 ມາຮອດວັນທີ 17 ກັນຍາ ຂົນສົ່ງຜູ້ໂດຍສານໄດ້ 1.759.900 ເທື່ອຄົນ, ທຽບໃສ່ໄລຍະດຽວກັນຂອງປີ 2022 ເພີ່ມຂຶ້ນ 103,7%, ຂົນສົ່ງໂດຍສານສະເລ່ຍ 6.768 ຄົນ/ມື້.

ສຳລັບ ຜູ້ໂດຍສານຂ້າມແດນ, ນັບແຕ່ໄດ້ເປີດດຳເນີນການຂະບວນລົດໄຟຂ້າມແດນ ໃນວັນທີ 13 ເມສາ ເປັນຕົ້ນມາ ຂົນສົ່ງຜູ້ໂດຍສານ ບັນລຸໄດ້ 61.698 ຄົນ. ໃນນັ້ນ, ຈຳນວນຜູ້ໂດຍສານເດີນທາງອອກນອກປະເທດ 31.781 ຄົນ, ສະເລ່ຍ 201 ຄົນ/ມື້ ແລະ ຜູ້ໂດຍສານທີ່ເດີນທາງເຂົ້າມາລາວ 29.917 ຄົນ, ສະເລ່ຍ 190 ຄົນ/ມື້.

ແຫຼ່ງຂ່າວ ປະເທດລາວ