ບໍລິສັດ ຍອດງື່ມພາວເວີ ມະຫາຊົນ ໄດ້ປັບລາຄານໍ້າມັນແອັດຊັງທຳມະດາທີ່ຜະລິດຈາກໂຮງງານປຸງແຕ່ງນໍ້າມັນຍອດງື່ມພາວເວີຂອງບໍລິສັດຍອດງື່ມພາວເວີມະຫາຊົນ ໃຫ້ຫຼຸດລົງລິດລະ 930 ກີບ ຈາກລາຄາທົ່ວໄປ.
ທ່ານ ສົມຫວັງ ຄຸຣຸລັດ ຜູ້ອຳນວຍການໃຫຍ່ບໍລິສັດຍອດງື່ມພາວເວີມະຫາຊົນ ໄດ້ໃຫ້ສໍາພາດຕໍ່ສື່ມວນຊົນຂອງແຂວງຊຽງຂວາງ ໃນວັນທີ 12 ກັນຍາ 2023 ນີ້ວ່າ: ເລີມແຕ່ວັນທີ 12 ກັນຍາ 2023 ເປັນຕົ້ນໄປ ບໍລິສັດຍອດງື່ມພາວເວີ ໄດ້ຫຼຸດລາຄານໍ້າມັນແອັດຊັງທຳມະດາທີ່ຜະລິດຈາກໂຮງງານປຸງແຕ່ງນໍ້າມັນຍອດງື່ມພາວເວີ ຂອງບໍລິສັດຍອດງື່ມພາວເວີມະຫາຊົນລົງ 930 ກີບຕໍ່ລິດ ເຊິ່ງການຫຼຸດລາຄາດັ່ງກ່າວ ໄດ້ເລີ່ມປະຕິບັດຢູ່ບັນດາປໍ້າຕົວແທນຂອງນໍ້າມັນເຊື້ອໄຟລາວພາຍໃນແຂວງຊຽງຂວາງ ແລະ ສືບຕໍ່ໄປຍັງແຂວງຫົວພັນ ແລະ ແຂວງໄຊສົມບູນ ຕື່ມອີກ.
ປັດຈຸບັນໂຮງງານປຸງແຕ່ງນໍ້າມັນເຊື້ອໄຟ ຍອດງື່ມພາວເວີ ຂອງບໍລິສັດຍອດງື່ມພາວ ເວີມະຫາຊົນແມ່ນໄດ້ທຳການຜະລິດ ສາມາດປຸງແຕ່ງນໍ້າມັນແອັດ ຊັງທຳມະດາ ໄດ້ 10 ລ້ານລິດຕໍ່ເດືອນ ເຊິ່ງຄາດວ່າຈະເພີ່ມກຳລັງການຜະລິດຕື່ມອີກ ຈາກ 10 ລ້ານລິດ/ເດືອນມາເປັນ 30 ລ້ານລິດ/ເດືອນ ໃນປີ 2024 ຈະສາມາດສົ່ງອອກຈຳໜ່າຍພາຍໃນແຂວງຊຽງຂວາງ ຫົວພັນ ໄຊສົມບູນ ແລະ ບັນດາແຂວງ ໃນທົ່ວປະເທດ.
ເພື່ອເຮັດໃຫ້ການບໍລິການທີ່ມີຄວາມສະດວກສະບາຍແກ່ຜູ້ມາໃຊ້ບໍລິການນັ້ນ ທາງບໍລິສັດຍອດງື່ມພາວເວີ ໄດ້ມີແຜນທີ່ຈະພັດທະນາປໍ້າບໍລິການນໍ້າມັນເຊື້ອໄຟລາວ ທີ່ຕັ້ງຢູ່ບ້ານໂພນງາມໃຕ້ ເມືອງແປກ ແຂວງຊຽງຂວາງ ໃຫ້ເປັນປໍ້າທີ່ມີການບໍລິການຄົບວົງຈອນ ສະດວກສະບາຍທັນສະໄໝ ມີຮ້ານຊັບພະສິນຄ້າ ຮ້ານອາຫານ ແລະ ເປັນປໍ້າທີ່ສວຍງາມ ທີ່ສຸດ ໃນ ສປປ ລາວ ເຊິ່ງຈະເລີ່ມເຂົ້າມາບໍລິຫານ ລົງມືກໍ່ສ້າງ ແລະ ປັບປຸງປໍ້ານໍ້າມັນໂພນງາມໃຕ້ເລີ່ມແຕ່ເດືອນຕຸລາ 2023 ເປັນຕົ້ນໄປ ແລະ ຈະໃຫ້ສຳເລັດໃນຕົ້ນປີ 2024.
ສຳລັບການປັບຫຼຸດລາຄານ້ຳມັນໃນເທື່ອນີ້ ແມ່ນປະຕິບັດຕາມແຈ້ງການຂອງກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ສະບັບເລກທີ 0906/ກຄພນ ລົງວັນທີ 8 ກັນຍາ 2023 ວ່າດ້ວຍການປະຕິບັດໂຄງສ້າງລາຄານໍ້າມັນແອັດຊັງທີ່ປະສົມປຸງແຕ່ງຈາກໂຮງງານປຸງແຕ່ງນໍ້າມັນເຊື້ອໄຟ ຍອດງື່ມພາວເວີ ຂອງບໍລິສັດຍອດງື່ມພາວເວີມະຫາຊົນ ທີ່ຕັ້ງຢູ່ບ້ານຍອດງື່ມ ເມືອງແປກ ແຂວງຊຽງຂວາງ.