ພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ໄດ້ຈັດພິທີທໍາລາຍສິນຄ້າ ປະເພດໜັງຄວາຍ ແລະ ສິ້ນສ່ວນໝູ ທີ່ລັກລອບຜະລິດ, ນໍາເຂົ້າ ແລະ ຈໍາໜ່າຍ ບໍ່ຖືກຕ້ອງຕາມລະບຽບກົດໝາຍ ນໍ້າໜັກ 4.405 ກິໂລ ມູນຄ່າ 75.800.000 ກີບ ໃນວັນທີ 9 ກັນຍາ 2023 ຢູ່ສະໜາມບໍາບັດຂີ້ເຫຍື້ອ; ໂດຍມີ ທ່ານ ນັນຕາ ສານຸວົງ ຮອງຫົວໜ້າພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ, ມີຕາງໜ້າຈາກກົມຕໍາຫຼວດເສດຖະກິດ, ພະແນກກະສິກໍາ ແລະ ປ່າໄມ້, ອໍານາດການປົກຄອງບ້ານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນັນຕາ ສານຸວົງ ກ່າວວ່າ: ສໍາລັບສິ້ນສ່ວນໝູ ແລະ ໜັງຄວາຍ ທີ່ລັກລອບຜະລິດ, ນໍາເຂົ້າ ແລະ ຈໍາໜ່າຍ ທີ່ບໍ່ຖືກ ຕ້ອງຕາມລະບຽບກົດໝາຍ ປະກອບມີ ສິ້ນສ່ວນໝູ ຈໍານວນ 405 ກິໂລກຼາມ ລວມມູນຄ່າ 15.800.000 ກີບ ແລະ ໜັງຄວາຍ 4.000 ກິໂລກຼາມ ລວມມູນຄ່າ 60.000.000 ກີບ ລວມມູນຄ່າເຄື່ອງທັງໝົດ 75.800.000 ກີບ; ເຊິ່ງເປັນສິນຄ້າທີ່ລັກລອບນໍາເຂົ້າຈາກປະເທດໃກ້ຄຽງ ໂດຍບໍ່ມີເອກະສານຢັ້ງຢືນແຫຼ່ງທີ່ມາ ເຊັ່ນ: ໃບແຈ້ງເສຍພາສີ, ໃບຢັ້ງຢືນສຸຂະນາໄມສັດ ຈາກພາກສ່ວນກະສິກໍາ. ສະນັ້ນເຈົ້າໜ້າທີ່ຈຶ່ງໄດ້ເຮັດບົດບັນທຶກກວດກາ ແລະ ຍຶດສິນຄ້າດັ່ງກ່າວ ນໍາເອົາຕົວຢ່າງໄປກວດຢູ່ຂະແໜງລ້ຽງສັດ ແລະ ການປະມົງ ເຊິ່ງຜົນການກວດວິໄຈອອກມາເຫັນວ່າ ສິນຄ້າດັ່ງກ່າວແມ່ນມີຄວາມສ່ຽງ ເລື່ອງການນໍາເຊື້ອພະຍາດເຂົ້າມາແຜ່ລະບາດຢູ່ນະຄອນຫຼວງວຽງຈັນ ແລະ ມີສານປົນເປື້ອນ ທີ່ອາດສົ່ງຜົນຕໍ່ຜູ້ບໍລິໂພກ, ດັ່ງນັ້ນ ຈິ່ງທໍາລາຍຖິ້ມ.
ທັງນີ້, ກໍເພື່ອແນໃສ່ສະກັດກັ້ນ ການນໍາເຂົ້າບໍ່ຖືກຕ້ອງຕາມລະບຽບກົດໝາຍ, ຮັກສາໄດ້ຄວາມສະຫງົບປອດໄພ, ເປັນການປົກປ້ອງຜົນປະໂຫຍດຂອງຜູ້ບໍລິໂພກໃຫ້ໄດ້ບໍລິໂພກແຕ່ສິນຄ້າທີ່ມີຄຸນນະພາບ ແລະ ບໍ່ເປັນອັນຕະລາຍຕໍ່ຊີວິດ ພ້ອມທັງເປັນການສົ່ງເສີມການຜະລິດພາຍໃນ ຫຼຸດຜ່ອນການນໍາເຂົ້າຈາກຕ່າງປະເທດ.