ໃຜຕິດສະມາດໂຟນຕ້ອງລະວັງ ພຽງແຕ່ກົ້ມໜ້າຫລິ້ນສະມາດໂຟນ ຄໍ ແລະ ກະດູກສັນຫລັງຕ້ອງແບກຮັບນ້ຳໜັກທຽບເທົ່າກັບການແບກເດັກນ້ອຍອາຍຸ 8 ປີໄວ້ເທິງຫົວ
ເຮົາຮູ້ກັນດີຢູ່ແລ້ວວ່າ ການຫລິ້ນສະມາດໂຟນຫລາຍເກີນໄປເຮັດໃຫ້ສາຍຕາມີບັນຫາ ແຖມຍັງເຮັດໃຫ້ປວດໄຫລ່ປວດຄໍນໍາອີກ ຢ່າຄິດວ່າ ມັນມີຂໍ້ເສຍພຽງແຕ່ເທົ່ານັ້ນ ເພາະມື້ນີ້ຈະພາໄປຮັບຮູ້ເຖິງຂໍ້ເສຍຂອງການກົ້ມໜ້າກົ້ມຕາຫລິ້ນສະມາດໂຟນເປັນເວລາດົນທີ່ອັນຕະລາຍບໍ່ແພ້ກັບທີ່ເຮົາເຄີຍໄດ້ຍິນກັນ
ການຫລິ້ນສະມາດໂຟນຕິດຕໍ່ກັນເປັນເວລາດົນ ສາມາດສົ່ງຜົນເສຍຕໍ່ຮ່າງກາຍຂອງເຮົາໄດ້ໂດຍສະເພາະຄໍ ແລະ ກະດູກສັນຫລັງ ໂດຍທ່ານໝໍ Kenneth K. Hansraj, ຫົວໜ້າທີມແພດສັນຍະກຳກະດູກສັນຫລັງແຫ່ງສູນສັນຍະກຳ ແລະ ຟື້ນຟູກະດູກສັນຫລັງໃນນິວຢອກ ໄດ້ເປີດເຜີຍເອົາໄວ້ໃນບົດຄວາມເຊິ່ງຖືກຕີພິມໃນວາລະສານທາງການແພດ Surgical Technology International ວ່າ ການກົ້ມໜ້າກົ້ມຕາຫລິ້ນໂທລະສັບສະມາດໂຟນຈະເຮັດໃຫ້ຄໍຂອງເຮົາແບກຮັບນ້ຳໜັກເຖິງ 60 ປອນ ຫລື ປະມານ 27 ກິໂລກຣາມ ທຽບເທົ່າກັບເດັກນ້ອຍອາຍຸປະມານ 8 ປີ ມານັ່ງຢູ່ເທິງຫົວໃນຂະນະທີ່ຍືນເລີຍ
ໂດຍທ່ານໝໍ Hansraj ຍັງໄດ້ອະທິບາຍເພີ່ມເຕີມອີກວ່າ ທຸກມື້ນີ້ຄົນເຮົາໃຊ້ເວລາຢູ່ໃນທ່າທາງກົ້ມໜ້າເພື່ອຫລິ້ນໂທລະສັບສະມາດໂຟນກັນບໍ່ຕ່ຳກວ່າ 2 – 4 ຊົ່ວໂມງ ແລະ ທ່າທາງນີ້ເຮັດໃຫ້ຄໍ ແລະ ກະດູກສັນຫລັງຂອງເຮົາຈະຕ້ອງໃຊ້ແຮງຈຳນວນຫລາຍໃນການເງີຍຫົວ ຫລື ກົ້ມຫົວໄປທາງໜ້າ ເຊິ່ງເຮັດໃຫ້ຄວາມເຄັ່ງຕຶງທີ່ບໍລິເວນກະດູກສັນຫລັງເພີ່ມຂຶ້ນ ແລະ ຖ້າຫາກຢູ່ໃນທ່າທາງນີ້ຕິດຕໍ່ກັນເປັນເວລາດົນ ແລະຫລາຍເທື່ອຫລາຍເກີນໄປຈະສົ່ງຜົນໃຫ້ບຸກຄະລິກກະພາບເສຍ ແຖມຍັງເຮັດໃຫ້ກະດູກສັນຫລັງເຄື່ອນ ຫລື ເກີດຄວາມເສຍຫາຍຈົນຕ້ອງຜ່າຕັດ