ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 (ປາກຊັນ-ບຶງການ) ມາຮອດທ້າຍເດືອນສິງຫາ 2023 ຄືບໜ້າ 80,85%.
ທ່ານ ໄລທອງ ພົມມະວົງ ຫົວຫນ້າໂຄງການກໍ່ສ້າງຂົວຂ້າມນ້ໍາຂອງ ມິດຕະພາບ ລາວ–ໄທ ແຫ່ງທີ 5 (ບໍລິຄໍາໄຊ–ບຶງການ) ໃຫ້ຮູ້ວ່າ: ການປະຕິບັດແຜນງານຂອງໂຄງການກໍ່ສ້າງຂົວຂ້າມນ້ໍາຂອງ ມິດຕະພາບ ມິດຕະພາບ ລາວ–ໄທ ແຫ່ງທີ 5 (ບໍລິຄໍາໄຊ–ບຶງການ) ມາຮອດທ້າຍເດືອນສິງຫາ 2023 ສໍາລັບຫນ້າວຽກໃນສັນຍາ 1 ວຽກກໍ່ສ້າງຂົວກາງນ້ຳ ລວມທັງທາງເຂົ້າຂົວ ປະກອບມີ: ວຽກສ້ອມແປງທາງຮ່ອມເຂດບ້ານຫາງຊິງ, ຕິດຕັ້ງປະຕູຮົ້ວແຄັມ ແລະ ຫນ້າວຽກອື່ນໆ ຄວາມຄືບຫນ້າຂອງສັນຍາ 1 ທັງຫມົດ ມາຮອດທ້າຍເດືອນສິງຫາ ປະຕິບັດຕົວຈິງໄດ້ 67,86% ຫຼຸດຄາດຫມາຍ 1,55%.
ສ່ວນສັນຍາ 2 ແມ່ນຫນ້າວຽກກໍ່ສ້າງທາງເຊື່ອມຕໍ່ເຂົ້າຂົວ ແລະ ອາຄານດ່ານ ປະກອບດ້ວຍວຽກດິນ, ວຽກໂຄງສ້າງທາງ, ວຽກກໍ່ສ້າງທໍ່ລະບາຍນ້ໍາລອດທາງ, ວຽກກໍ່ສ້າງອາຄານດ່ານ, ວຽກລະບົບຂອງອາຄານ ແລະ ວຽກອື່ນໆ ປະຕິບັດຕົວຈິງໄດ້ 93,83% ຫຼຸດຄາດຫມາຍ 6,17%. ສະເລ່ຍແລ້ວຄວາມຄືບຫນ້າລວມແຜນທັງຫມົດ 2 ສັນຍາ ມາຮອດທ້າຍເດືອນສິງຫາ 2023 ປະຕິບັດໄດ້ 80,85% ຫຼຸດຄາດຫມາຍ 3,86%.
ສໍາລັບແຜນການຂອງວຽກການສ້າງໃນເດືອນກັນຍາ 2023 ນີ້ແມ່ນ ສັນຍາ 1 ຊ່ວງ 2B ແຜນການປະຕິບັດວຽກໃນເດືອນໃຫ້ໄດ້ 1,72%
ແຜນລວມໃຫ້ໄດ້ 69,21%, ສັນຍາ 2 ຊ່ວງ 3 ແຜນການປະຕິບັດວຽກໃນເດືອນໃຫ້ໄດ້ 1,50% ແຜນລວມໃຫ້ໄດ້ 100%. ແຜນລວມທັງ 2 ສັນຍາ ໃນເດືອນກັນຍາ ໃຫ້ໄດ້ 1,61% ແຜນການລວມ 84,60%.
ແຫຼ່ງຂ່າວ ເສດຖະກິດ ການຄ້າ