ປກສ ແຂວງອຸດົມໄຊຈູດທໍາລາຍ ອຸປະກອນການພະນັນທີ່ຕ້ອງຫ້າມ

0
549

ວັນທີ 28 ກໍລະກົດ 2023 ເຈົ້າໜ້າທີ່ກົມຕໍາຫຼວດສືບສວນ-ສອບສວນ ກະຊວງປ້ອງກັນຄວາມສະຫງົບສົມທົບກັບເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ໄດ້ລົງມ້າງເປົ້າໝາຍມີການບໍລິການຫຼິ້ນການພະນັນ 4 ຈຸດຂອບເຂດເທດສະບານເມືອງໄຊ ແຂວງອຸດົມໄຊ, ໃນນີ້ຢູ່ຫົວໜ່ວຍທຸລະກິດໂຮງແຮມ 3 ຈຸດ, ສາມາດກັກຕົວເປົ້າໝາຍມີສ່ວນກ່ຽວຂ້ອງໃຫ້ການບໍລິການຫຼິ້ນການພະນັນ (ຕູ້ເກມໄຟຟ້າ) ໄດ້ຈໍານວນ 5 ຄົນ ພ້ອມທັງຍຶດຂອງກາງອຸປະກອນການພະນັນອີກຫຼາຍປະເພດ.

ພັຕ ພອນເດດ ວົງສະຫວັນ ຮອງພະແນກຕໍາຫຼວດສືບສວນ-ສອບສວນ ປກສ ແຂວງອຸດົມໄຊ ໄດ້ໃຫ້ຮູ້ວ່າ: ອຸປະກອນການພະນັນທີ່ນຳມາຈູດທໍາລາຍໃນຄັ້ງນີ້ ມີໂຕະຕູ້ເກມຈໍານວນ 3 ໂຕະ, ຕູ້ເກມ 3 ໜ່ວຍ, ໜ້າຈໍ 66 ເຄື່ອງ, ເຕົາໝູນ 2 ເຕົາ, ໄພ້ຈໍານວນ 8 ແກັດ, ມີ 1.179 ຊຸມ, ອີກ 340 ຊຸດ ແລະ 14 ກັບ, ຕູ້ປາ ແລະ ຕູ້ປາສະລັອດ ຈໍານວນ 6 ໜ່ວຍ, ໂຕະແຈກໄພ້ ຈໍານວນ 9 ໂຕະ, ໂຕະເກມຍິງປາຈໍານວນ 3 ຊຸດ, ໂຕະເກມເສືອ-ມັງກອນ ຫຼົງຟູ ຈໍານວນ 2 ໂຕະ, ໂຕະການພະນັນໝາຈຽງ ຫຼື ໄພ້ນົກກະຈອກເທບ ຈໍານວນ 2 ຊຸດ, ຕູ້ຢອດຫຼຽນ ຈໍານວນ 3 ຕູ້, ໂຕະໄພ້ໝາກກະຈອກ 1 ໂຕະ ແລະ ຂອງກາງກ່ຽວຂ້ອງອື່ນໆອີກຈໍານວນໜຶ່ງ.

ມາໃນຕອນເຊົ້າວັນທີ 28 ສິງຫາ 2023 ຈິ່ງໄດ້ຈັດພິທີຈູດທໍາລາຍຂອງກາງຄະດີຈໍານວນດັ່ງກ່າວ ຢູ່ພື້ນທີ່ຄ້າຍຄຸມຂັງ-ດັດສ້າງ ປກສ ເມືອງໄຊ ແຂວງອຸດົມໄຊ ໂດຍການເຂົ້າຮ່ວມເປັນປະທານຂອງພັທ ກອງແກ້ວ ຫັດສະຈັນ ຄະນະພັກ, ຮອງກອງບັນຊາການ, ຜູ້ຊີ້ນໍາຫ້ອງຕໍາຫຼວດ ປກສ ແຂວງອຸດົມໄຊ, ຕໍ່ພາກສ່ວນທີ່ລະເມີດທາງເຈົ້າໜ້າທີ່ພວມເລັ່ງສືບສວນ-ສອບສວນ ແລະ ປະຕິບັດລະບຽບຕາມຂັ້ນຕອນຂອງກົດໝາຍ.

ແຫຼ່ງຂ່າວ ປກສ ອຸດົມໄຊ