ທ່ານ ພັນເອກ ຄໍາສິນ ຜີວວັນນາ ຮອງຫົວໜ້າ ກອງບັນຊາການ ປກສ ແຂວງ ໄຊຍະບູລີ ໄດ້ ລາຍງານຄວາມຄືບໜ້າໃນການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຕໍ່ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຊຸດທີII ໃນທ້າຍອາທິດຜ່ານມານີ້ວ່າ: ຜ່ານການເກັບກໍາຂໍ້ມູນ ແລະ ຂຶ້ນບັນຊີໃນປີ 2021 ມີບ້ານຫລໍ່ແຫລມ 41 ບ້ານ, ບ້ານຄູ່ຂະໜານ 80 ບ້ານ, ຈຸດຂ້າມລອຍມີ 4 ຈຸດ, ຈຸດມົ້ວສຸມ 38 ຈຸດ, ມີເປົ້າໝາຍພົວພັນຢາເສບຕິດທັງໝົດ 11.053 ຄົນ, ຍິງ 469 ຄົນ. ໃນນີ້, ເປົ້າໝາຍຄ້າ-ຂາຍ 1.353 ຄົນ, ຍິງ 170 ຄົນ, ເປົ້າໝາຍເສບ 9.700 ຄົນ, ຍິງ 299 ຄົນ.

ມາຮອດປັດຈຸບັນ, ສາມາດດໍາເນີນການແກ້ໄຂບັນຫາເປົ້າໝາຍໄດ້ທັງໝົດ 9.547 ຄົນ, ຍິງ 459 ຄົນ, ເທົ່າກັບ 86,37%. ໃນນັ້ນ, ໄດ້ເຮັດບົດບັນທຶກສືກສາອົບຮົມເປົ້າໝາຍເສບແລ້ວມອບໃຫ້ຄອບຄົວ ແລະ ບ້ານຄຸ້ມຄອງມີ 6.177 ຄົນ, ຍິງ 268 ຄົນ, ນໍາເອົາເປົ້າໝາຍເສບມາບໍາບັດປິ່ນປົວ 3.159 ຄົນ, ຍິງ 105 ຄົນ, ປ່ອຍຕົວຜູ້ປິ່ນປົວບໍາບັດຢາເສບຕິດ 2.454 ຄົນ, ຍິງ 104 ຄົນ, ດໍາເນີນຄະດີຕໍ່ຜູ້ເສບບໍ່ເຂັບຫຼາບ 143 ຄົນ, ຍິງ 3 ຄົນ, ມ້າງທໍາລາຍຄະດີຢາເສບຕິດໄດ້ 538 ລາຍ, ມີຜູ້ກະທໍາຜິດ 622 ຄົນ, ຍິງ 107 ຄົນ, ຢຶດຂອງການ ຢາບ້າ 22.887.908 ເມັດ, ນໍ້າໜັກ 2.288 ກິໂລກຣາມ, ຢາຝິ່ນ 1 ກິໂລກຣາມ, ຢາໄອ້ 565,5 ກິໂລກຣາມ, ວັດຖຸຂອງກາງອື່ນໆມີ: ເງິນ 145 ລ້ານກວ່າກີບ ແລະ 812,187 ບາດ, ລົດໃຫຍ່ 17 ຄັນ, ລົດຈັກ 61 ຄັນ, ໂທລະສັບມືຖື 242 ເຄື່ອງ ແລະ ວັດຖຸອື່ນໆອີກຈໍານວນໜຶ່ງ.

ຕໍ່ກັບບັນດາລາຍຄະດີທີ່ແກ້ໄຂນັບທັງເກົ່າ ແລະ ໃໝ່ປັດຈຸບັນ ແມ່ນໄດ້ສະຫລຸບສົ່ງໄອຍະການ 613 ເລື່ອງ, ມີ 708 ຄົນ, ຍິງ 75 ຄົນ, ພວມດໍາເນີນ 204 ເລື່ອງ, ມີ 257 ຄົນ, ຍິງ 13 ຄົນ, ຕໍ່ກັບຜູ້ບໍາບັດຢາເສບຕິດ ແມ່ນໄດ້ທົດລອງປິ່ນປົວຜູ້ຕິດຢາເສບຕິດດ້ວຍຢາກາດອກບົວ, ມີຜູ້ເຂົ້າປິ່ນປົວ 30 ຄົນ, ຜົນການປິ່ນປົວເຫັນວ່າແຕ່ລະຄົນມີສຸຂະພາບແຂງແຮງດີ.