ວັນທີ 23 ສິງຫາ ທ່ານ ນາງ ໃບຄຳ ຂັດທິຍະ ພ້ອມດ້ວຍຄະນະ, ໄດ້ລົງຢ້ຽມຢາມ ແລະ ເຮັດວຽກຮ່ວມກັບ ບໍລິສັດມັດສຄອດ ອິນເຕີເນເຊັນນໍ (ລາວ) ໂຊນ ຈຳກັດ ໄດ້ປຶກສາຫາລື ແລະ ເກັບກຳຂໍ້ມູນກ່ຽວກັບການຂາດແຄນແຮງງານ ເພື່ອຊອກຫາສາເຫດ ແລະ ແຜນຄວາມຕ້ອງການແຮງງານ ເພື່ອສະໜອງເຂົ້າໃນຕຳແໜ່ງງານວ່າງ ໂດຍສະເພາະສາຍການຜະລິດ ຂອງ ບໍລິສັດ.
ໃຫ້ກຽດຕ້ອນຮັບໂດຍທ່ານ Mr Bjarke Andersen ຜູ້ອຳນວຍການ ບໍລິສັດ ມັດສຄອດ ອິນເຕີເນເຊີນນໍ (ລາວ) ໂຊນ ຈຳກັດ ປະຈຳ ສປປ ລາວ ແລະ ສສ ຫວຽດນາມ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ບໍລິສັດ ມັດສຄອດ ອິນເຕີເນເຊີນນໍ (ລາວ) ໂຊນ ຈຳກັດ ເປັນ ບໍລິສັດທີ່ມີຊື່ສຽງ ຈາກປະເທດແດນມາກ, ມັດສຄອດ ເປັນໂຮງງານຜະລິດເຄື່ອງນຸ່ງຫົ່ມ ແລະ ເກີບເຊັບຕີ ທີ່ມີຄຸນນະພາບສູງ, ບໍລິສັດ ໄດ້ເປີດໂຮງງານຢ່າງເປັນທາງການຢູ່ ສປປ ລາວ ໃນທ້າຍປີ 2013 ພາຍໃນເຂດນິຄົມອຸດສາຫະກຳ ແລະ ການຄ້າວຽງຈັນໂນນທອງ (VITA Park), ຈາກນັ້ນບໍລິສັດໄດ້ຂະຫຍາຍກຳລັງການຜະລິດຢ່າງຕໍ່ເນື່ອງ ແລະ ມາຮອດປັດຈຸບັນໄດ້ມີການລົງທຶນທັງ ໝົດຢູ່ໃນ ສປປ ລາວ ລວມທັງໝົດ 350 ຕື້ກີບ ໃນໂຮງງານສາມາດບັນຈຸພະນັກງານໄດ້ເຖີງ 4.000 ຄົນ, ປັດຈຸບັນມີພະນັງງານ 2.000 ກວ່າຄົນ ຍັງຂາດອີກ 2.000 ຄົນ ແລະ ບໍລິສັດ ກຳລັງຊອກຫາທີ່ດິນເພື່ອຂະຫຍາຍໂຮງງານແຫ່ງໃໝ່ຕື່ມ.
ບໍລິສັດມີຄວາມຕ້ອງການແຮງງານລວມທັງຄົນທີ່ມີທັກສະ ແລະ ບໍ່ມີປະສົບການ ໃນຂະນະທີ່ກໍມີບັນຫາເລື່ອງຄ່າຄອງຊີບສູງຂຶ້ນ ແຕ່ຄ່າແຮງງານຍັງຕ່ຳ. ການຂາດແຄນແຮງງານໃນອຸດສາຫະກຳຕັດຫຍິບ ມີຜົນກະທົບຢ່າງຮຸນແຮງຕໍ່ການລົງທຶນໃນພາກນີ້ ສິ່ງນີ້ເຮັດໃຫ້ການສົ່ງອອກເຄື່ອງນຸ່ງຫົ່ມຫຼຸດລົງ ເຖິງວ່າຄວາມຕ້ອງການຈະເພີ່ມຂຶ້ນກໍຕາມ.
ການຂາດແຄນແຮງງານໃນອຸສາຫະກຳຕັດຫຍິບ ຍັງມີສາເຫດມາຈາກແຮງງານພາຍໃນລາວມີທາງເລືອກຫຼາຍຂຶ້ນ ໂດຍການໄປເປັນແຮງງານຢູ່ຕ່າງປະເທດເຊັ່ນ ໄທ ເກົາຫຼີໃຕ້ ເປັນຕົ້ນ.
ເຖິງວ່າຄ່າແຮງຂັ້ນຕ່ຳພາຍໃນປະເທດຈະເພີ່ມຂຶ້ນພຽງເລັກໜ້ອຍໃນເດືອນນີ້ ແຕ່ແຮງງານໃນລາວຍັງດິ້ນຮົນຫາລ້ຽງຊີບ ແລະ ສະແຫວງຫາໂອກາດທີ່ຈະໄປເຮັດວຽກຢູ່ຕ່າງປະເທດ ທີ່ມີຄ່າແຮງງານສູງກວ່າ.
ແຫຼ່ງຂ່າວ Vientiane Times