ວັນທີ 14 ສິງຫາ 2023 ຄ້າຍຄຸມຂັງ-ດັດສ້າງ ປກສ ແຂວງບໍລິຄໍາໄຊ ໄດ້ຈັດພິທີປະກາດປ່ອຍຕົວນັກໂທດກ່ອນກຳນົດຕໍ່ຜູ້ທີ່ມີມາດຖານ, ເງື່ອນໄຂຄົບຖ້ວນຕາມ ກົດລະບຽບຂອງຄ້າຍຄຸມຂັງ-ດັດສ້າງ, ໂດຍມີ ພັອ ເຄນວອນ ລໍວັນໄຊ ຮອງຫົວໜ້າກອງບັນຊາການ ປກສ ແຂວງ, ມີພະແນກຍຸຕິທຳ, ໄອຍະການປະຊາຊົນ, ພ້ອມດ້ວຍຍາດພີ່ນ້ອງ ແລະ ນັກໂທດທີ່ໄດ້ຮັບການປ່ອຍຕົວກ່ອນກຳນົດເຂົ້າຮ່ວມ.
ໃນພິທີ, ພັທ ບຸນນຳ ນາມໂພໄຊ ຫົວໜ້າຄ້າຍຄຸມຂັງ-ດັດສ້າງ ໄດ້ຜ່ານຂໍ້ຕົກລົງເລກທີ 267 ລົງວັນທີ 11 ສິງຫາ 2023 ຂອງຄະນະສານອາຍາຂັ້ນຕົ້ນຂອງສານປະຊາຊົນແຂວງບໍລິຄໍາໄຊ ວ່າດ້ວຍການປ່ອຍຕົວກ່ອນກຳນົດໃຫ້ນັກໂທດທີ່ມີມາດ ຖານ, ເງື່ອນໄຂຄົບຖ້ວນຕາມກົດລະບຽບຂອງຄ້າຍຄຸມຂັງ-ດັດສ້າງ, ເຊິ່ງຜູ້ທີ່ຈະໄດ້ຮັບການປ່ອຍຕົວກ່ອນກຳນົດນັ້ນແມ່ນຈະຕ້ອງເປັນບຸກຄົນທີ່ມີຄວາມກິນແໜງແຄງໃຈຕໍ່ການກະທໍາຜິດຂອງຕົນ, ມີຄວາມບຸກບືນ, ຫ້າວຫັນໃນການປັບປຸງປ່ຽນແປງຕົນເອງທາງດ້ານແນວຄິດຈິດໃຈ ແລະ ການກະທຳ, ມີຜົນງານທີ່ດີເດັ່ນໃນຂະບວນການອອກແຮງງານ ແລະ ຕັ້ງໜ້າປະຕິບັດໂທດ, ກົດລະບຽບວິໄນຂອງຄ້າຍຄຸມຂັງ-ດັດສ້າງຢ່າງເຂັ້ມງວດ, ເປັນແບບຢ່າງທີ່ດີໃຫ້ນັກໂທດດ້ວຍກັນ ຈຶ່ງຈະໄດ້ຮັບການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວຕາມແນວທາງນະໂຍບາຍຂອງພັກ-ລັດຂັ້ນເທິງ, ຜ່ານການຄົ້ນຄວ້າການອະໄພຍະໂທດ, ປ່ອຍຕົວກ່ອນກໍານົດ ແລະ ມາດຖານ, ເງື່ອນໄຂຄົບຖ້ວນ ມີນັກໂທດທີ່ໄດ້ຮັບການປ່ອຍຕົວກ່ອນກໍານົດ ຈຳນວນ 10 ຄົນ ຍິງ 1 ຄົນ.
ໂອກາດັ່ງກ່າວ, ພັອ ເຄນວອນ ລໍວັນໄຊ ໄດ້ມອບໃບຢັ້ງຢືນປ່ອຍຕົວກ່ອນກຳນົດຂອງຄະນະພັກກອງບັນຊາການ ປກສ ແຂວງບໍລິຄຳໄຊ ໃຫ້ນັກໂທດ ພ້ອມທັງໂອ້ລົມຕໍ່ນັກໂທດທີ່ໄດ້ຮັບການປ່ອຍຕົວກ່ອນກໍານົດໃນຄັ້ງນີ້ ເມື່ອອອກໄປຢູ່ນໍາຄອບຄົວ ແລະ ສັງຄົມແລ້ວ ຈົ່ງພ້ອມກັນເອົາໃຈໃສ່ເຄື່ອນໄຫວປະກອບອາຊີບໃຫ້ຖືກຕ້ອງຕາມແນວທາງນະໂຍບາຍຂອງພັກ-ລະບຽບກົດໝາຍຂອງລັດ ເພື່ອພັດທະນາຕົນເອງ ແລະ ຄອບຄົວໃຫ້ຮັ່ງມີເຂັ້ມແຂງ, ບໍ່ໄປກະທໍາຜິດຊໍ້າອີກ ແລະ ໄດ້ຮຽກຮ້ອງມາຍັງນັກໂທດທຸກຄົນທີ່ຍັງບໍ່ທັນໄດ້ຮັບການປ່ອຍຕົວ ຈົ່ງພ້ອມກັນສືບຕໍ່ປະຕິບັດລະ ບຽບວິໄນຄ້າຍຄຸມຂັງ-ດັດສ້າງເອົາໃຈໃສ່ສ້າງຜົນງານໃຫ້ດີເດັ່ນ, ຄຽງຄູ່ກັບການປັບປຸງປ່ຽນແປງທາງດ້ານແນວຄິດ ແລະ ພຶດຕິກຳໃຫ້ດີຂຶ້ນເທື່ອລະກ້າວ ເພື່ອຈະໄດ້ຮັບການອະໄພຍະໂທດໃນຄັ້ງຕໍ່ໄປ.
ແຫຼ່ງຂ່າວ ຄວາມສະຫງົບ