ປະຕິບັດການຄົ້ນຫາຮ່າງຜູ້ເສຍຊີວິດຊາວຫວຽດນາມ ຈາກເຫດດິນເຈື່ອນຢູ່ເສັ້ນທາງເລກ 8A ເລີ່ມຕັ້ງແຕ່ວັນທີ 05 ສິງຫາ 2023 ເປັນຕົ້ນມາທີ່ໜ່ວຍງານຕ່າງໆ ທັງຂັ້ນສູນກາງ, ແຂວງ ແລະ ເມືອງໄດ້ພ້ອມກັນລະດົມກຳລັງຄົ້ນຫາຢ່າງເຕັມທີ່ ຈົນມາຮອດວັນທີ 14 ສິງຫາ 2023 ກົນຈັກຫນັກ ທີມຄົ້ນຫາຈຶ່ງເຂົ້າເຖິງພື້ນທີ່ເກີດເຫດໄດ້ ແລະ ໃນເວລາ 10 ໂມງ 40 ນາທີ ໄດ້ພົບເຫັນສົບຜູ້ກ່ຽວ ຖືກດິນເຈື່ອນ, ໄມ້ຫັກທັບຖົມ ຢູ່ໃກ້ກັບລົດຂອງຜູ້ກ່ຽວຂັບມາ ແລະ ຫ່າງຈາກທາງເລກທີ 8A ປະມານ 6,90 ແມັດ.

ຕາມການລາຍງານເບື້ອງຕົ້ນຜູ້ເສຍຊີວິດຊື່ ທ້າວ ເດື່ອງ ກົງລ໋ອງ ເປັນໂຊເຟີລົດ ຂອງບໍລີສັດແຮງເຊິນ ສສ ຫວຽດນາມ. ພາຍຫລັງຈາກພົບສົບແລ້ວ ທາງທີມງານໄດ້ເລັ່ງກູ້ຊາກສົບຂຶ້ນມາ ແລະ ນຳອອກມາຈາກທີ່ເກີດເຫດ, ຜ່ານການສັນນະສູດຊາກສົບ ການເສຍຊີວິດແມ່ນເນື່ອງມາຈາກຂາດອາກາດຫາຍໃຈ ແລະ ຊາກສົບແມ່ນເນົ່າ ເພາະເສຍຊີວິດຫລາຍມື້ແລ້ວ.

ມາຮອດເວລາ 15:00 ໂມງຂອງວັນດຽວກັນ ທາງການນຳເມືອງຄູນຄຳ ພ້ອມດ້ວຍກຳລັງ ປກຊ-ປກສ ຈາກແຂວງຄຳມ່ວນ ແລະ ແຂວງບໍລິຄຳໄຊ ຈຶ່ງພ້ອມກັນເຮັດບົດບັນທຶກມອບ-ຮັບສົບ ໃຫ້ກັບຄອບຄົວ ແລະ ຍາດຕິພີ່ນ້ອງຂອງຜູ້ເສຍຊີວິດ ເພື່ອໄປປະກອບພິທີທາງສາສະຫນາ ຢູ່ປະເທດຫວຽດນາມ. ການເຄື່ອນຍ້າຍສົບແມ່ນເຄື່ອນຍ້າຍອອກໄປເສັ້ນທາງເລກທີ 8A ບ້ານຫນອງກອກ ເມືອງຄຳເກີດ ແຂວງບໍລິຄຳໄຊ.