ອີງຕາມອົງກອນສິດທິເຈຊີ ລາຍງານໃນວັນທີ 25 ກໍລະກົດ 2023 ທີ່ຜ່ານມານີ້ວ່າ: ທາງການສິງກະໂປ ມີແຜນປະຫານນັກໂທດຄະດີຢາເສບຕິດ 2 ຄົນໃນອາທິດນີ້, ຄົນທຳອິດເປັນຜູ້ຊາຍສັນຊາດສິງກະໂປ ອາຍຸ 56 ປີ (ບໍ່ລະບຸຊື່) ມີກຳນົດແຂວນຄໍມື້ວານນີ້ 26 ກໍລະກົດ 2023, ຢູ່ທີ່ຄ້າຍຄຸມຂັງຊາງງີ ຈາກຄວາມຜິດໃນການຄ້າຢາເສບຕິດປະເພດ ເຮໂລອິນ 50 ກຼາມ, ແລະ ອີກຄົນເປັນນັກໂທດຍິງຊາວສິງກະໂປ ອາຍຸ 45 ປີ ຖືກສານຕັດສິນປະຫານຊີວິດດ້ວຍການແຂວນຄໍ ໃນວັນທີ 28 ກໍລະກົດ 2023 ຈາກຄວາມຜິດໃນການຄ້າຢາເສບຕິດປະເພດເຮໂລອິນ 30 ກຼາມ ນັບໄດ້ວ່າເປັນຜູ້ຍິງຄົນທຳອິດທີ່ຖືກປະຫານຊີວິດໃນສິງກະໂປນັບຕັ້ງແຕ່ປີ 2004.

ຕາມກົດໝາຍສິງກະໂປ ມີກຳນົດໂທດປະຫານຊີວິດສຳລັບນັກໂທດບາງປະເພດ ເຊັ່ນ: ການຄາຕະກຳ ແລະ ການລັກພາໂຕບາງຮູບແບບ ຂະນະທີ່ຍັງມີກົດໝາຍຕໍ່ຕ້ານຢາເສບຕິດແຫ່ງໜຶ່ງທີ່ເຂັ້ມງວດທີ່ສຸດໃນໂລກ ການຄ້າຢາເສບຕິດປະເພດກັນຊາ 500 ກຼາມ ແລະ ເຮໂລອິນ 15 ກຼາມອາດຖືກໂທດປະຫານຊີວິດ ຈົນເຖິງຂະນະນີ້ມີນັກໂທດທີ່ຖືກແຂວນຄໍໄປແລ້ວ 13 ຄົນ ຕັ້ງແຕ່ລັດຖະບານສິງກະໂປກັບມາດຳເນີນການປະຫານຊີວິດອີກຄັ້ງໃນປີ 2022 ຫຼັງຈາກຢຸດໄປ 2 ປີຈາກການລະບາດຂອງພະຍາດໂຄວິດ-19 ທັງນີ້ອົງກອນສິດທິທັງໃນ ແລະ ຕ່າງປະເທດລວມທັງຜູ້ມີຊື່ສຽງອອກມາຮຽກຮ້ອງໃຫ້ຢຸດໂທດການປະຫານຊີວິດ ແຕ່ລັດຖະບານສິງກະໂປຍືນຍັນວ່າໂທດປະຫານຊີວິດເປັນການຍັບຍັ້ງນັກໂທດທີ່ໄດ້ປະສິດທິພາບ.