ສີລັງກາ ກຳລັງພິຈາລະນາໃນການອະນຸຍາດໃຫ້ນຳໃຊ້ສະກຸນເງິນຣູປີຂອງອິນເດຍ ໃນການຊື້ຂາຍໃນທ້ອງຖິ່ນ.
ໃນວັນທີ 22 ກໍລະກົດ 2023 ອາລີ ຊາບຣີ ລັດຖະມົນຕີປະຊວງການຕ່າງປະເທດຂອງສີລັງກາ ກ່າວໃນວັນເສົາທີ່ຜ່ານມານີ້ວ່າ ໄດ້ອະນຸຍາດໃຫ້ໃຊ້ສະກຸນເງິນຂອງເພື່ອນບ້ານກໍຄື ອິນເດຍ ເພື່ອໃຫ້ນັກທ່ອງທ່ຽວ ແລະ ຄົນທີ່ມາຈາກອິນເດຍສາມາດນຳໃຊ້ເງິນຣູປີໄດ້ໂດຍກົງ ເພື່ອບໍ່ໃຫ້ຫຍຸ້ງຍາກໃນການແລກປ່ຽນເງິນຕາ.
ທັ້ງນີ້ ສີລັງກາ ໄດ້ນຳເຂົ້າສິນຄ້າຈຳນວນຫຼາຍມາຈາກອິນເດຍ ເຊິ່ງເປັນຄູ່ຄ້າລາຍໃຫຍ່ທີ່ສຸດ ໂດຍສິນຄ້າທີ່ນຳເຂົ້າມາສີລັງກາ ປະກອບມີ ອາຫານ ຢາ ວັດສະດຸກໍ່ສ້າງ ລົດ ປຸ໋ຍ ແລະ ເຄມີ, ເຊິ່ງການຄ້າຂອງສອງປະເທດນີ້ ລວມມູນຄ່າ 5,45 ພັນລ້ານໂດລາ ໃນປີ 2021.
ອາລີ ຊາບຣີ ກ່າວວ່າ ການຍອມຮັບສະກຸນເງິນຣູປີຂອງອິນເດຍ ເຮັດໃຫ້ສີລັງກາໄດ້ປຽບເລື່ອງການຄ້າ ຍ້ອນວ່າ ເມື່ອສີລັງການຳໃຊ້ເງິນຣູປີຫຼາຍຂຶ້ນ ຄົນອິນເດຍຈຳນວນຫຼາຍກໍຫັນມາທ່ຽວສີລັງກາ ແລະ ນຳໃຊ້ເງິນຣູປີພາຍໃນປະເທດຫຼາຍຂຶ້ນ ສະນັ້ນ ມັນຈຶ່ງເປັນເລື່ອງທີ່ດີຕໍ່ສີລັງກາ.
ແຫຼ່ງຂ່າວ AP