ໃນວັນທີ 2 ສິງຫາ 2015 ທີ່ປະເທດໄທ ກໍມີຜູ້ໃຊ້ເຟສບຸກຊື່ Karn Ua ອອກມາໂພສວ່າ ໄດ້ໄປຍ່າງຫຼິ້ນຢູ່ຫ່າງ ເດັກນ້ອຍໄດ້ໃສ່ເກີບຢາງທຳມະດາສີເຫຼືອງ ແລ້ວຖືກຄັນໄດເລື່ອນດູດເຂົ້າໄປຕິດກັບຂອບດ້ານຂ້າງຄັນໄດ ເຮັດໃຫ້ເກີບມີສະພາບມຸ່ນ ຫົວໂປ້ຕີນຂອງເດັກນ້ອຍກໍມີຮອຍຊ້ຳຈົນເປັນສີດຳ.
ໃນວັນທີ 22 ມິຖຸນາ 2023 ທີ່ປະເທດໄທ ກໍມີຜູ້ໃຊ້ບັນຊີ TikTok@zjbambam ໂພສເລົ່າເຫດການທີ່ເຕືອນເປັນອຸທາຫອນ ໂດຍລູກຂອງຕົນ ຕີນໄດ້ໄປຕິດກັບຄັນໄດເລື່ອນ ລູກໄດ້ໃສ່ເກີບຢາງ ແລ້ວຢືນໃກ້ກັບຄັນໄດ ຈຶ່ງເຮັດໃຫ້ຖືກດູດເຂົ້າໄປຕິດ, ຈາກເຫດການດັ່ງກ່າວ ຕ້ອງໃຊ້ເວລາ 30 ນາທີເພື່ອງັດເອົາຕີນອອກມາ ສຸດທ້າຍຕີນເປັນບາດ ຕ້ອງຍິບ 11 ເຂັມ.
ຫຼ້າສຸດໃນວັນທີ 29 ມິຖຸນາ 2023 ທີ່ຜ່ານມາ ກໍເກີດເຫດການນັ້ນອີກທີ່ສະໜາມບິນດອນເມືອງ ປະເທດໄທ ເຊິ່ງມີຜູ້ໂດຍສານໃສ່ເກີບຢາງດັ່ງກ່າວກຳລັງຍ່າງເທິງທາງເລື່ອນ ແຕ່ທາງເລື່ອນເກີດຍຸບໂຕລົງໃນຂະນະທີ່ມີຜູ້ໂດຍສານໃຊ້ງານ ຈົນກະເປົາໄປກະທົບທີ່ຂາຊ້າຍ ແລ້ວເຮັດໃຫ້ລົ້ມລົງ ທາງເລື່ອນກໍດູດຂາຂາດ.
ນີ້ເປັນພຽງບາງເຫດການທີ່ເອົາມາໃຫ້ທ່ານໄດ້ເຫັນເຖິງຄວາມອັນຕະລາຍ ນອກນີ້ກໍຍັງມີຫຼາຍເຫດການທີ່ຄ້າຍຄືກັນໃນຈີນ ບາງກໍລະນີກໍເສຍຊີວິດ ບາງກໍລະນີກໍ່ໄດ້ຮັບບາດເຈັບ, ສະນັ້ນຈຶ່ງຢາກມາເຕືອນໃຫ້ລະມັດລະວັງຕື່ມບໍ່ວ່າຈະໃສ່ເກີບໃດກໍຕາມ ເລື່ອງການໃຊ້ຄັນໄດເລື່ອນ ຫຼື ທາງເລື່ອນ ຄວນລະມັດລະວັງ ບໍ່ຄວນຢືນເອົາຕິດແນບເບື້ອງໃດເບື້ອງໜຶ່ງຈົນເກີນໄປ ແລະ ບໍ່ຄວນໂດດອອກໃນເວລາໃກ້ຈະສຸດທາງຄັນໄດເລື່ອນ ແຕ່ຄວນລະວັງເປັນພິເສດເມື່ອໃສ່ເກີບຢາງ ຫຼື ເກີບທີ່ມີສາຍ ເພາະອາດຈະຖືກຄັນໄດເລື່ອນດູດເກີບ ແລະ ຕີນທ່ານເຂົ້າໄປ ຈົນໄດ້ຮັບບາດເຈັບ.