ຫ້ອງການກົມສິລະປະ-ວັດທະນາທຳ, ກະຊວງຖະແຫຼງຂ່າວ ວັດທະນາທຳ ແລະ ທ່ອງທ່ຽວ ຢູ່ຄຸ້ມສີເມືອງ ໄດ້ມີກອງປະຊຸມ ເພື່ອຜ່ານຂໍ້ຕົກລົງຂອງທ່ານລັດຖະມົນຕີ ວ່າດ້ວຍການແຕ່ງຕັ້ງຄະນະຮັບຜິດຊອບ ຄົ້ນຄ້ວາ ຮຽບຮຽງເນື້ອໃນຂອງ “ພິທີບາສີສູ່ຂວັນ” ເພື່ອປະກອບໃສ່ຟອມນໍາສະເໜີເປັນມໍລະດົກໂລກ ເຊິ່ງທ່ານ ຫານຊະນະ ສີສານ ກໍ່ໄດ້ມີຊື່ຢູ່ໃນຄະນະທີ່ປຶກສາກິດຕິມະສັກ ໃນນາມປະທານສະມາຄົມອະນຸລັກ ແລະ ສົ່ງເສີມວັດທະນາທຳລາວ.
ພິທີສູ່ຂວັນນັ້ນ ເປັນວັດທະນາທຳດັ້ງເດີມຂອງຄົນລາວເຮົາ ແລະ ຄົນທີ່ມີກົກເຫງົ້າດຽວກັນ ເຊິ່ງມີເຜົ່າຊົນນີ້ຢູ່ໃນໂລກເຜົ່າຊົນດຽວເທົ່ານັ້ນທີ່ມີຄວາມເຊື່ອເລື່ອງຂວັນ, ເຊິ່ງເປັນຄວາມເຊື່ອ ແລະ ພິທີທີ່ມີມາດົນນານຫຼາຍພັນປີ ແລະ ກ່ອນທີ່ວັດທະນາທຳຂອງຊາວຊົມພູທະວີບທີ່ແຜ່ຜາຍເຂົ້າມານໍາຂະບວນການຄ້າທາງເຮືອ ໃນໄລຍະໜຶ່ງພັນປີມານີ້ອີກ. ໃນພິທີນີ້ ໄດ້ຜູກພັນກັບຄົນລາວທາງດ້ານຈິດໃຈຈົນມາເຖິງປັດຈຸບັນນີ້ ຈາກເປັນພິທີໃນຊຸມຊົນ ຈົນກາຍມາເປັນພິທີທາງການຕ້ອນຮັບແຂກບ້ານແຂກເມືອງກໍ່ຄືຜູ້ຄົນທີ່ມີໄມຕິຈິດຕໍ່ກັນ.
ລາວເຮົາໄດ້ຍື່ນຂໍຂຶ້ນທະບຽນ ຟ້ອນລໍາວົງລາວ ເຊິ່ງຢູ່ໃນຂັ້ນຕອນການປ້ອງກັນ ໂດຍທ່ານ ຫານຊະນະ ສີສານ ໄດ້ສະແດງຄວາມພູມໃຈທີ່ໄດ້ປະກອບສ່ວນ ໃນການສ້າງຊື່ສຽງໃຫ້ກັບປະເທດຊາດ ນອກນີ້ ອາດຈະມີການຂຶ້ນທະບຽນດ້ານພູມປັນຍາ, ອາຫານການກິນ ແລະ ອື່ນໆອີກ ຈຶ່ງເຊີນຊວນບັນດາທ່ານໄດ້ປະກອບຄວາມເຫັນ ວ່າມີສິ່ງໃດແດ່ຄວນຈະຕ້ອງຂຶ້ນທະບຽນ ຈຸດປະສົງອັນໃຫຍ່ກໍເພື່ອສ້າງເງື່ອນໄຂໃຫ້ຊຸມຊົນລາວ ມີຄວາມສາມັກຄີປອງດອງກັນ ຢູ່ຮ່ວມກັນພ້ອມກັນພັດທະນາ ແລະ ຫຼຸດພົ້ນຈາກຄວາມທຸກຍາກ ເຊິ່ງມັນເປັນຄວາມມຸ່ງຫວັງຂອງຄົນລາວພວກເຮົາທຸກໆຄົນ.
ທີ່ມາ ຜະລິດຕະພັນລາວ LaoProducts