ຕາມການໃຫ້ຂໍ້ມູນຂອງໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສິງ ແຂວງຫຼວງນ້ຳທາໃຫ້ຮູ້ວ່າ : ໃນວັນທີ 17 ຫາ 27 ມີນາ 2023 ຜ່ານມານີ້ໄດ້ຮັບແຈ້ງຄວາມຈາກ ພົນລະເມືອງດີ ວ່າ : ມີກຸ່ມຄົນບໍ່ດີເຄືອນໄຫວຄ້າ-ຂາຍ, ມົ້ວສຸມເສບຢາເສບຕິດຢູ່ເຂດບ້ານ ຈຽງອິນ ແລະ ບ້ານຫົວຂົວ ເມືອງສິງ.
ດັ່ງນັ້ນ ຈຶ່ງໄດ້ຈັດຕັ້ງໜ່ວຍວິຊາສະເພາະລົງໄປກວດກາແຫຼ່ງຂ່າວສາມາດກັກຜູ້ຖືກຫາໄດ້ 05 ຄົນ ຊື່ນາງ ອີເຊາະ ອາຍຸ 55 ປີ, ປະຊາຊົນບ້ານປ່າພຸກ ພ້ອມຂອງກາງຢາບ້າ 04 ເມັດ, ທ້າວ ຊືປາ ອາຍຸ 28 ປີ, ປະຊາຊົນຢູ່ບ້ານປ່າພຸກ, ທ້າວ ສາຕື ອາຍຸ 46 ປີ, ພັກເຊົາຢູ່ບ້ານ ຈຽງອິນ ພ້ອມຂອງກາງຢາບ້າ 123 ເມັດ, ທ້າວ ຊຽງສົມຈັນ ອາຍຸ 54 ປີ ຢູ່ບ້ານຫົວຂົວ ພ້ອມຂອງກາງຢາບ້າ 353 ເມັດ ທັງ 4 ຄົນ ຢູ່ເມືອງສິງ ແຂວງຫຼວງນ້ຳທາ ແລະທ້າວ ຄຳຈັນ ອາຍຸ 35 ປີ, ປະຊາຊົນຢູ່ບ້ານອ່າງ ເມືອງ ແປກ ແຂວງຊຽງຂວາງ ພ້ອມຂອງກາງຢາບ້າ 11 ເມັດ.
ຜ່ານການສືບສວນ-ສອບສວນທັງ 5 ຄົນໄດ້ຮັບສາລະພາບວ່າ: ຢາເສບຕິດປະເພດຢາບ້າຈຳນວນດັ່ງກ່າວ ແມ່ນຂອງພວກກ່ຽວແທ້ ເຊິ່ງໄດ້ພົວພັນຊື້-ຂາຍ ນຳພວກຮ່ວມຂະບວນການດຽວກັນຢູ່ ເມືອງສິງ ຈຸດປະສົງ : ແມ່ນຊື້ມາເພື່ອໄວ້ເສບ ແລະ ຂາຍຍ່ອຍ. ປັດຈຸບັນຜູ່ຖືກຫາທັງ 05 ຄົນ ແລະ ຂອງກາງຢາເສບຕິດ (ປະເພດຢາບ້າ) ຈຳນວນ 491 ເມັດ ແມ່ນໄດ້ສົ່ງໃຫ້ທາງພະແນກທີ່ກ່ຽວຂ້ອງ ປກສ ແຂວງຫຼວງນ້ຳທາ ສືບຕໍ່ຂະຍາຍຜົນຫາກຸ່ມແກ້ງ ພັກພວກຮ່ວມຂະບວນການດຽວກັນ ມາດຳເນີນຄະດີຕາມລະບຽບກົດໝາຍ.
ຂ່າວຍັງໃຫ້ຮູ້ຕື່ມອີກວ່າ: ໃນວັນທີ 10 ເມສາ 2023 ທາງໜ່ວຍງານຄະດີອາຍາ ປກສ ເມືອງຫຼວງນ້ໍາທາ ສົມທົບກັບ ຫ້ອງການ ປກສ ບໍລິການ ປະຊາຊົນ ກຸ່ມທົ່ງໄຈ້ເໜືອ ລົງມ້າງຄະດີຢາເສບຕິດ ສາມາດກັກໄດ້ຜູ້ຖືກຫາ 1 ຄົນ ຊື່ ນາງ ຊີ ຊົ່ງ ອາຍຸ 27 ປີ, ປະຊາຊົນ ບ້ານຫາດຍາວ ເມືອງຫຼວງນ້ຳທາ ແຂວງຫຼວງນ້ຳທາ ພ້ອມຂອງກາງຢາເສບຕິດ ປະເພດຢາບ້າ ຈຳນວນ 6 ມັດກັບ 2.280 ເມັດ.
ຜ່ານການສືບສວນ-ສອບສວນ ຂອງເຈົ້າໜ້າທີ ນາງ ຊີ ຊົ່ງ ໄດ້ຮັບສາລະພາບວ່າ: ຢາເສບຕິດປະເພດຢາບ້າ ຈຳນວນ ດັ່ງກ່າວ ແມ່ນຂອງຜູ້ກ່ຽວແທ້ ເຊິ່ງໄດ້ພົວພັນຊື້-ຂາຍ ນຳພວກຮ່ວມຂະບວນການດຽວກັນຢູ່ ແຂວງບໍ່ແກ້ວ. ຈຸດປະສົງ : ແມ່ນຊື້ມາເພື່ອຂາຍຍ່ອຍ. ປະຈຸບັນ ທາງເຈົ້າໜ້າທີ່ພວມເລັ່ງສືບສວນ-ສອບສວນ ຫາກຸ່ມແກ້ງພັກພວກ ມາດຳເນີນຕາມລະບຽບກົດໝາຍ.
ແຫຼ່ງຂ່າວ: ຄວາມສະຫງົບ