ນົມ ເຄື່ອງດື່ມທີ່ດີຕໍ່ສຸຂະພາບ ແລະ ນິຍົມດື່ມກັນທຸກເພດທຸກໄວ ບໍ່ວ່າຈະໄວເດັກນ້ອຍ ຫລື ໜຸ່ມສາວ ກໍໄດ້ປະໂຫຍດຈາກການດື່ມນົມກັນທັງນັ້ນ ແລ້ວຮູ້ກັນຫລືບໍ່ວ່າ ເຄື່ອງດື່ມຊະນິດນີ້ ບໍ່ໄດ້ເຮັດຫນ້າທີ່ຂອງມັນໃນການເສີມ ແຄຊຽມ ແລະ ເພີ່ມວິຕາມິນຕ່າງໆ ໃຫ້ຮ່າງກາຍພຽງຢ່າງດຽວ ແຕ່ຍັງຊ່ວຍປ້ອງກັນບໍ່ໃຫ້ໜຸ່ມໆ ສາວໆ ເປັນພະຍາດຕຸ້ຍນໍາອີກ ສົງໄສກັນແລ້ວບໍ ວ່າມັນຊ່ວຍຫລຸດຄວາມຕຸ້ຍໄດ້ແບບໃດ ກໍໃນເມື່ອເຄີຍໄດ້ຍິນກັນວ່າດື່ມນົມຫລາຍໆ ຈະເຮັດໃຫ້ຕຸ້ຍ ເຊົາສົງໄສກັນໄດ້ແລ້ວ ເພາະເຮົາໄຂຄວາມກະຈ່າງແຈ້ງ ມາສະເໜີກັນ ລອງອ່ານເບິ່ງແລ້ວຈະຮູ້ວ່າການດື່ມນົມ ດີກວ່າທີ່ຄິດ
ການສຶກສາລ່າສຸດຂອງນັກວິທະຍາສາດຊາວອາເມລິກາເປີດເຜີຍວ່າ ການດື່ມນົມນອກຈາກຈະຊ່ວຍເສີມສ້າງກະດູກແລ້ວຍັງຊ່ວຍປ້ອງກັນການເກີດພະຍາດຕຸ້ຍໄດ້ ໂດຍການສຶກສານີ້ໄດ້ມີການວິໄຈຈາກການຕອບແບບສອບຖາມຂອງຄົນກວ່າ 7, 173 ຄົນ ກ່ຽວກັບພຶດຕິກຳການໃຊ້ຊີວິດ ແລະ ສຸຂະພາບໂດຍລວມ ເຊິ່ງສະແດງໃຫ້ເຫັນວ່າຄົົນທີ່ດື່ມນົມຢ່າງນ້ອຍອາທິດລະ 2 ຈອກ ຈະມີຄວາມສ່ຽງເປັນພະຍາດຕຸ້ຍຕ່ຳກວ່າຜູ້ດື່ມນົມຫລື ກິນເນື້ອໄກ່ໃນປະລິມານໜ້ອຍ ຫລື ບໍ່ກິນເລີຍ
ແຖມທີມນັກວິໄຈຍັງພົບອີກວ່າ ຜະລິດຕະພັນຈາກນົມ ຫລື ທີ່ມີນົມເປັນສ່ວນປະກອບ ກໍ່ສາມາດປ້ອງກັນພະຍາດຕຸ້ຍໄດ້ເຊັ່ນກັນ ແລະ ຄວນຈະມີນົມເປັນໜຶ່ງໃນອາຫານທີ່ກິນທຸກມື້ໃນປະລິມານທີ່ພໍດີ ທີ່ໜ້າສົນໃຈໄປຍິ່ງກວ່ານັ້ນຄື ໃນການວິໄຈຍັງສະແດງໃຫ້ເຫັນອີກວ່າ ຜູ້ທີ່ດື່ມນົມເປັນປະຈຳທຸກມື້ສາມາດຫລຸດຄວາມສ່ຽງພະຍາດຕຸ້ຍໄດ້ເຖິງ 37% ແຕ່ຢ່າງໃດກໍຕາມຜົນການສຶກສານີ້ພົບແຕ່ກັບໃນຜູ້ທີ່ດື່ມນົມໄຂມັນຕ່ຳກວ່າ 3.4% ເທົ່ານັ້ນ
ທັງນີ້ສາເຫດທີ່ເຮັດໃຫ້ນົມສາມາດຊ່ວຍປ້ອງກັນພະຍາດຕຸ້ຍໄດ້ ກໍໍ່ມາຈາກສານອາຫານສຳຄັນທີ່ຢູ່ໃນນົມກໍ່ຄື ແຄຊຽມ ພະເອກຂອງເຮົານັ້ນເອງ ໂດຍ ແຄຊຽມ ນັ້ນມີສ່ວນໃນການຊ່ວຍໃຫ້ລະບົບຕ່າງໆ ໃນຮ່າງກາຍເຮັດວຽກໄດ້ຢ່າງມີປະສິດທິພາບ ລວມທັງຊ່ວຍຄວບຄຸມລະດັບຮໍໂມນ ໃນຮ່າງກາຍໃຫ້ຢູ່ໃນລະດັບປົກກະຕິ ແລະ ການທີ່ຮ່າງກາຍຂອງເຮົາມີລະດັບຮໍໂມນທີ່ປົກກະຕິກໍເປັນເຫດຜົນສຳຄັນທີ່ເຮັດໃຫ້ເຮົາສາມາດຄວບຄຸມນ້ຳໜັກໃຫ້ຢູ່ໃນລະດັບທີ່ດີຕໍ່ສຸຂະພາບໄດ້
ນອກຈາກນີ້ນັກວິໄຈກໍຍັງໄດ້ແນະນຳໃຫ້ກິນອາຫານເສີມແຄຊຽມນຳ ແຕ່ກໍບໍ່ຄວນກິນແທນອາຫານທີ່ມີແຄຊຽມສູງ ເພາະຈະເຮັດໃຫ້ບໍ່ໄດ້ຮັບສານອາຫານທີ່ດີຕໍ່ຮ່າງກາຍເຊັ່ນ ໂປຕີນ