ມືປືນບຸກໂຈມຕີສັງຫານຄົນຈີນ 9 ຄົນ ທີ່ເໝືອງທອງຄຳໃນອາຟຣິກາກາງ

0
871

ໃນວັນທີ 19 ມີນາ 2023 ທີ່ສາທາລະນະລັດອາຟຣິກາກາງ ມືປືນບຸກໂຈມຕີເໝືອງທອງຄຳ ທີ່ດຳເນີນການໂດຍຄົນຈີນ ເຮັດໃຫ້ຄົນຈີນເສຍຊີວິດ 9 ຄົນ ແລະ ບາດເຈັບອີກ 2 ຄົນໃນວັນອາທິດທີ່ຜ່ານມານີ້.

ເຫດການໂຈມຕີດັ່ງກ່າວມືປືນໄດ້ ລັກພາໂຕຄົນຈີນ 3 ຄົນ ຈົນເຮັດໃຫ້ Faustin Archchange Touadera ປະທານາທິບໍດີ ໄດ້ວາງແຜນເດີນທາງໄປຈີນ ເພື່ອໄປສ້າງຄວາມໝັ້ນໃຈໃຫ້ແກ່ນັກລົງທຶນ.

ເຈົ້າເມືອງບຳບາຣີ ໄດ້ກ່າວວ່າ ການໂຈມຕີດັ່ງກ່າວໄດ້ເກີດຂຶ້ນທີ່ເໝືອງທອງຄຳຊິມໂບໂລ ໃນເວລາ 5 ໂມງເຊົ້າຂອງວັນອາທິດ ເມື່ອມືປືນໄດ້ເອົາຊະນະເຈົ້າໜ້າທີ່ຮັກສາຄວາມປອດໄພຂອງສະຖານທີ່ໄດ້ ແລະ ກໍເລີ່ມມີການຍິງກັນເກີດຂຶ້ນ.

ສົບຂອງຜູ້ເສຍຊີວິດໄດ້ຖືກນຳໄປໄວ້ທີ່ເມືອງຫຼວງບັງກີ ໂດຍເຈົ້າໜ້າທີ່ກ່າວວ່າ ພວກເຂົາກຳລັງຊອກຫາຜູ້ກໍ່ເຫດ.

ປະຊາຊົນເມືອງບຳບາຣີ ໄດ້ກ່າວວ່າ ລັດຖະບານກຳລັງປະສົບກັບບັນຫາ ໃນການສະແດງຄວາມສາມາດໃນການປົກປ້ອງຄົນອາຟຣິກາ ແລະ ຄົນຕ່າງປະເທດທີ່ອາໄສຢູ່ໃນອາຟຣິກາ.

ທັ້ງນີ້ ບໍ່ມີການສະແດງຄວາມຮັບຜິດຊອບໃນທັນທີ ແຕ່ມີການສົງໄສເຖິງກຸ່ມກະບົດທີ່ເຄື່ອນໄຫວຢູ່ໃນເຂດນັ້ນ ທີ່ມີການໂຈມຕີກອງກຳລັງຕິດອາວຸດຂອງປະເທດເປັນປະຈຳ ແລະ ກໍມີການກ່າວຫາວ່າ ເປັນທະຫານຮັບຈ້າງຈາກຣັດເຊຍ ທີ່ວາງແຜນໂຈມຕີ.

ຄົນຈີນຫຼາຍຄົນທີ່ມາເຮັດວຽກຢູ່ປະເທດນີ້ ຕ້ອງປະເຊີນບັນຫາດ້ານຄວາມປອດໄພ, ພາຍໃນປີ 2020 ມີຄົນຈີນເສຍຊີວີດ 2 ຄົນ ຍ້ອນການຕໍ່ຕ້ານເໝືອງທີ່ດຳເນີນການໂດຍຄົນຈີນ ແລະ ໃນປີ 2018 ຄົນຈີນ 3 ຄົນຖືກສັງຫານໂດຍສະມາຊິກໃນບ້ານທີ່ຄຽດແຄ້ນ ພາຍຫຼັງທີ່ຜູ້ນຳທ້ອງຖິ່ນເສຍຊີວິດຈາກອຸບັດຕິເຫດທາງເຮືອ ຂະນະທີ່ຮ່ວມເດີນທາງໄປກັບຄົນຈີນທີ່ເຮັດວຽກຢູ່ເໝືອງແຫ່ງໜຶ່ງ.

ສາທາລະນະລັດອາຟຣິກາກາງ ເປັນໜຶ່ງໃນປະເທດທີ່ທຸກຍາກທີ່ສຸດໃນໂລກ ເຖິງວ່າຈະມີແຮ່ທອງຄຳ ແລະ ເພັດຈຳນວນຫຼາຍກໍຕາມ ແລະ ມີກຸ່ມກະບົດຈຳນວນຫຼາຍທີ່ຂັດຂວາງການສຳຫຼວດເໝືອງແຮ່ຂອງບໍລິສັດຕ່າງປະເທດ ແຕ່ບໍ່ໄດ້ຮັບໂທດໃນຊ່ວງຫຼາຍປີທີ່ຜ່ານມາ.

ແຫຼ່ງຂ່າວ AP