ໃນວັນທີ 13 ມີນາ 2023 ຜ່ານມາ, ທ່ານ ຫວານເຢັນ ນັນສູນທະວົງ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນ ໄກສອນ ພົມວິຫານ ພ້ອມດ້ວຍພາກສ່ວນທີ່ກ່ຽວຂ້ອງ ລົງຕິດຕາມສະພາບຕົວຈິງຂອງໂຮງງານໂຊກມີໄຊ (ໂຮງງານເມັດຢາງ) ທີ່ໄດ້ສົ່ງຜົນກະທົບ (ກິ່ນຂິວຄວັນ) ເຊິ່ງອາດຈະທີ່ສົ່ງຜົນບໍ່ດີຕໍ່ສຸຂະພາບຢ່າງແຮງ ຂອງປະຊາຊົນຫລາຍຄອບຄົມໃນເຂດດັ່ງກ່າວ.
ຕໍ່ບັນຫາດັ່ງກ່າວ ພາກສ່ວນທີ່ກ່ຽວຂ້ອງໄດ້ແນະນໍາໃຫ້ທາງໂຮງງານດັ່ງກ່າວ ເລັ່ງປັບປຸງແກ້ໄຂ ແລະ ຕິດຕັ້ງເຄື່ອງບຳບັດຄວັນຜ່ານນ້ຳ ຫລື ບຳບັດດ້ວຍເຕັກນິກອື່ນ ແຕ່ຮັບປະກັນບໍ່ໃຫ້ສົ່ງກິ່ນຂິວ.
ປັດຈຸບັນ, ຄະນະກໍາມະການໄດ້ສັ່ງໂຈະການດໍາເນີນກິດຈະການຜະລິດຊົ່ວຄາວຈົນກວ່າຈະສຳປັບປຸງເລັດ ແລ້ວສະເໜີຫາພາກສ່ວນກ່ຽວຂ້ອງ ລົງມາກວດກາຄືນ ເພື່ອປັບປຸງແຜນຄຸ້ມຄອງສິ່ງແວດລ້ອມ, ມາດຕະການອື່ນໆ ໃຫ້ໄດ້ຕາມມາດຕະຖານ ແລະ ຮັບປະກັນດ້ານສະພາບແວດລ້ອມ.
ໂອກາດນີ້, ທ່ານ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນ ກໍໄດ້ເນັ້ນໃຫ້ໂຮງງານແກ້ໄຂຢ່າງຮີບດ່ວນ, ພາກສ່ວນທີ່ກ່ຽວຂ້ອງຕ້ອງຕິດຕາມ, ກວດກາ, ໂຮງງານກໍຕ້ອງປະຕິບັດຕາມກົດລະບຽບ, ສັນຍາ ແລະ ບົດບັນທຶກຢ່າງເຄັ່ງຄັດ ເພື່ອຮັບປະກັນບໍ່ໃຫ້ບັນຫາດັ່ງກ່າວເກີດຂຶ້ນອີກ ແລະ ດໍາເນີນຕາມລະບຽບກົດໝາຍ ຮັບປະກັນດ້ານຄວາມປອດໄພຕໍ່ສິ່ງແວດລ້ອມ ແລະ ສັງຄົມ.
ແຫຼ່ງຂ່າວ ວິທະຍຸກະຈາຍສຽງ ແຂວງສະຫວັນນະເຂດ