ໃນວັນທີ 13 ມີນາ 2023 ນີ້, ທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະໄດ້ມາເຄື່ອນໄຫວ, ຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ. ໂອກາດນີ້, ກໍ່ໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ ພ້ອມດ້ວຍການນຳຂອງແຂວງ ແລະ ການນຳສະພາປະຊາຊົນແຂວງ ຢູ່ທີ່ສະໜາມບີນຂອງເມືອງບຸນເໜືອ.
ຈຸດປະສົງການມາເຄືອນໄຫວຂອງປະທານສະພາແຫ່ງຊາດ ຄັ້ງນີ່ແມ່ນເພື່ອມາຢ້ຽມຢາມແຂວງຜົ້ງສາລີ, ທັງພົບປະ ແລະ ໂອ້ລົມ ພະນັກງານຫຼັກແຫຼ່ງຂອງແຂວງ, ລົງຢ້ຽມຢາມພື້ນຖານການຜະລິດລະດູແລ້ງຢູ່ເຂດບ້ານຊຽງຟ້າ ແລະ ໂຮງງານຜະລິດຢາສູບ ທີ່ບ້ານພຽງໄຊເມືອງບຸນເໜືອ, ຢ້ຽມຊົມການພັດທະນາຕົວເມືອງຂອງເທດສະບານແຂວງໃໝ່ ພ້ອມທັງໄປເຄື່ອນໄຫວວຽກງານຢູ່ເມືອງສຳພັນ ແລະ ພົບປະໂອ້ລົມພະນັກງານຫຼັກແຫລ່ງຂອງເມືອງຕື່ມອີກ.
ການມາເຄື່ອນໄຫວຂອງທ່ານ ປອ ໄຊສົມພອນພົມວິຫານ ປະທານສະພາແຫ່ງຊາດ ພ້ອມດ້ວຍຄະນະຄັ້ງນີ້ແມ່ນຈະຮອດວັນທີ 16 ມີນາ 2023 ຈຶ່ງຈະສຳເລັດ.