ພິທີວາງສີລາລຶກໂຄງການກໍ່ສ້າງຕຶກແຄນຄູ່

0
827

ພິທີວາງສີລາລຶກໂຄງການກໍ່ສ້າງຕຶກແຄນຄູ່ ເຂດພັດທະນາເສດຖະກິດໃໝ່ ສີທັນດອນໄດ້ຈັດຂຶ້ນໃນວັນທີ 22 ກຸມພາ 2023 ທີ່ເຂດພັດທະນາເສດຖະກິດໃໝ່ ບ້ານທ່າຄໍ້ ເມືອງໂຂງ ແຂວງຈຳປາສັກ, ໂດຍເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ສປປ ລາວ, ບັນດາທ່ານລັຖະມົນຕີ, ຮອງລັດຖະມົນຕີ, ເຈົ້າແຂວງ, ຮອງເຈົ້າແຂວງ, ປະທານ ຄະນະຊີ້ນຳໂຄງການ, ບໍລິສັດຮັບເໝົາກໍ່ສ້າງ,ຫົວໜ້າພະແນກການ,ກົມກອງ, ຄະນະຄຸ້ມຄອງເຂດພັດທະນາເສດຖະກິດໃໝ່ ສີທັນດອນ,ອົງການປົກຄອງແຂວງ,ເມືອງ, ບ້ານ, ຫົວໜ່ວຍທຸລະກິດລັດ ແລະ ເອກະຊົນເຂົ້າຮ່ວມ.

ໃນພິທີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ກ່າວມີຄຳເຫັນວ່າ: ແຂວງຈຳປາສັກໄດ້ຮັບອະນຸຍາດຈາກລັດຖະບານ ໄດ້ມີການສາ້ງຕັ້ງເຂດເສດຖະກິດພິເສດແລ້ວ 4 ເຂດ ເຊິ່ງເຂດພັດທະນາເສດຖະກິດໃໝ່ສີທັນດອນ ເປັນໜຶ່ງໃນສີ່ເຂດເສດຖະກິດພິເສດ ທີ່ໄດ້ຮັບອະນຸຍາດລົງທຶນຈາກລັດຖະບານແຫ່ງ ສປປ ລາວ ແລະ ໄດ້ຮັບການສ້າງຕັ້ງ ໃນຄັ້ງວັນທີ 23 ສິງຫາ 2018, ເຊັນສັນຍາພັດທະນາໂຄງການ ໃນຄັ້ງວັນທີ 30 ສິງຫາ 2018, ມີມູນຄ່າການລົງທຶນ: 1.330 ລ້ານໂດລາສະຫະລັດ, ມີອາຍຸສຳປະທານ 50 ປີ.

ທ່ານຍັງໄດ້ເວົ້າຕື່ມອີກວ່າ ໂຄງການພັດທະນາເຂດພັດທະນາເສດຖະກິດໃໝ່ສີທັນດອນ ຈະສ້າງການປຽນແປ່ງໃໝ່ທາງດ້ານເສດຖະກິດ, ວັດທະນະທໍາ, ສັງຄົມອັນຍິ່ງໃຫຍ່ທາງປະຫວັດສາດ, ເປັນໃບໜ້າໃບຕາໃຫ້ແກ່ ພັກ ແລະ ລັດຖະບານຢ່າງເອກອ້າງທະນົງໃຈ ແລະ ການກໍ່ສ້າງຕຶກແຄນຄູ່ໃນຄັ້ງນີ້ ນອກຈາກເປັນໂຄງການທີ່ຍິ່ງໃຫຍ່ແລ້ວ ຍັງເປັນໂຄງການທີ່ສະແດງໃຫ້ເຫັນເຖິງຄວາມເປັນເອກະລັກສະເພາະຂອງຊາດລາວ.

Cr.ສູນຂ່າວຊາວພາກໃຕ້.