ເກາະຮູບຫົວໃຈໃນທະເລເອເດຣຍຕິກ ທີ່ປະເທດໂຄເອເຊຍ ນັກທ່ອງທ່ຽວພາກັນເອີ້ນວ່າ “ເກາະແຫ່ງຄວາມຮັກ” ເປີດຈຳໜ່າຍໃຫ້ຜູ້ຄົນຈັບຈອງເປັນເຈົ້າຂອງເກາະແລ້ວ.
ເກາະ Galešnjak ຫຼື ເກາະຮູບຫົວໃຈ ຕັ້ງຢູ່ທະເລເອເດຣຍຕິກ ຖືເປັນເກາະທີ່ເປັນທີ່ຮູ້ຈັກຂອງບັນດານັກທ່ອງທ່ຽວຫຼາຍທີ່ສຸດຂອງໂຄເອເຊຍ ເຊິ່ງຕອນນີ້ ເຈົ້າຂອງເກາະແຫ່ງນີ້ ໄດ້ເປີດໂອກາດໃຫ້ຜູ້ທີ່ສົນໃຈເຂົ້າມາຊື້ເກາະຮູບຫົວໃຈ.
ທາ້ວ ຊິວເວສໂຕຣ ຄາດຸມ ຕົວແທນເຈົ້າຂອງເກາະ Galešnjak ເປີດເຜີຍວ່າ ມີການບັນທຶກພາບຂອງເກາະນີ້ຫຼາຍກວ່າລ້ານພາບຕໍ່ປີ ເພາະຄິດວ່າມັນກຳລັງໄດ້ຮັບຄວາມນິຍົມສູງ.
ເຖິງວ່າເກາະແຫ່ງນີ້ບໍ່ມີສະຖານທີ່ທ່ຽວ ໂຮງແຮມ ຫຼື ຮ້ານອາຫານ ແຕ່ກໍຍັງມີຄົນທີ່ມີຊື່ສຽງນຳເຮືອມາທ່ຽວຊົມເປັນຈຳນວນຫຼາຍໃນຊ່ວງລະດູຮ້ອນ.
ນອກນີ້ ກໍຍັງເຄີຍມີ ບີຢອນເຊ່ ນັກຮ້ອງຊື່ດັງຂອງອາເມຣິກາ ມາຈັດງານສະຫຼອງວັນເກີດຄົບຮອບ 39 ປີ ທີ່ເກາະແຫ່ງນີ້ ແລະ ລາວກໍຢູ່ທີ່ເກາະຫຼາຍມື້ໃນທຸກໆປີ ແລະ ກໍຍັງມີ ໄມເຄິລ ຈໍແດນ ນັກກິລາບາສເກັດບອລລະດັບໂລກ, ເຈັຟ ເບໂຊສ ປະທານບໍລິສັດແອມະຊອນ ກໍໄປເກາະນັ້ນເຊັ່ນກັນ.
ເກາະແຫ່ງນີ້ມີພື້ນທີ່ 142.000 ຕາລາງແມັດ ເຈົ້າຂອງເກາະຕັດໃຈແບ່ງຂາຍຜູ້ທີ່ສົນໃຈ 40.000 ຕາລາງແມັດ ໃນລາຄາ 13 ລ້ານເອີໂຣ ຫຼື ປະມານ 235 ຕື້ກີບ ໂດຍທີ່ຜ່ານມາມັກຈະມີຄົນມາຖາມຊື້ເກາະຢູ່ເລື່ອຍໆ.
ແຫຼ່ງຂ່າວ Reuters