ພໍ່ຄ້າຂາຍຊີ້ນໃນຮົງກົງເສຍຊີວິດ ພາຍຫຼັງຖືກໝູທີ່ກຳລັງຈະຂ້າແລ່ນຕຳຈົນລົ້ມ ແລ້ວຖືກມີດບາດຕີນຕົນເອງເສຍຊີວິດ.
ໃນວັນທີ 20 ມັງກອນ 2023 ເຫດການທີ່ໃຜກໍບໍ່ຄາດຄິດວ່າຈະເກີດຂຶ້ນທີ່ໂຮງຂ້າສັດແຫ່ງໜຶ່ງໃນຮົງກົງ ໃນຂະນະທີ່ພໍ່ຄ້າຂາຍຊີ້ນ ອາຍຸ 61 ປີ ກຳລັງກຽມຂ້າໝູໂຕໜຶ່ງ ຫຼັງຈາກທີ່ໃຊ້ປືນໄຟຟ້າຊັອດໝູສະລົບແລ້ວ ແຕ່ໝູຢູ່ຊື່ໆກໍຟື້ນຂຶ້ນມາ ແລະ ແລ່ນຕຳ ຈົນເຮັດໃຫ້ລົ້ມລົງ ແລ້ວຖືກມີດທີ່ຖືໄວ້ຢູ່ແທງຕີນຈົນບາດເຈັບ ແລະ ເສຍຊີວິດໃນເວລາຕໍ່ມາ.
ໝູ່ຮ່ວມງານໄດ້ເລົ່າວ່າ ໄດ້ພົບຊາຍຜູ້ນີ້ນອນໝົດສະຕິຢູ່ ໂດຍທີ່ມືຍັງກຳມີດໄວ້ແໜ້ນ ແລະ ພົບວ່າ ມີບາດທີ່ເລິກຢູ່ຕີນຂອງລາວ ຈຶ່ງໄດ້ຮີບນຳໂຕສົ່ງໂຮງໝໍ ແຕ່ລາວກໍເສຍຊີວິດໃນເວລາຕໍ່ມາ.
ທາງດ້ານກະຊວງແຮງງານຂອງຮົງກົງ ລະບຸວ່າ ກຳລັງເລັ່ງສືບສວນສອບສວນເຫດການຄັ້ງນີ້ ໂດຍຈະກວດສອບມາດຕະຖານຄວາມປອດໄພໃນບ່ອນເຮັດວຽກນັ້ນ ພ້ອມຈະຫາມາດຕະການປ້ອງກັນ ເພື່ອບໍ່ໃຫ້ເກີດເຫດການໃນລັກສະນະແບບນີ້ ແລະ ຂະນະນີ້ຕຳຫຼວດກໍຍັງບໍ່ໄດ້ຢືນຢັນສາເຫດຂອງການເສຍຊີວິດຢ່າງຊັດເຈນເທື່ອ.
ແຫຼ່ງຂ່າວ channelnewsasia