“ແມ່ຂາວ ອັງເດຣ” ແມ່ຂາວຊາວຝຣັ່ງ ບຸກຄົນຜູ້ທີ່ມີອາຍຸຫຼາຍທີ່ສຸດໃນໂລກເສຍຊີວິດແລ້ວ ໂດຍມີອາຍຸລວມ 118 ປີ , ໃນຕອນທີ່ເພິ່ນຍັງມີຊີວິດຢູ່ ເພິ່ນອຸທິດຕົນໃນການປະຕິບັດໜ້າທີ່ທາງສາສະໜາ ເບິ່ງແຍງເດັກກຳພ້າ ແລະ ຜູ້ສູງອາຍຸ.

ໃນວັນທີ 18 ມັງກອນ 2023 ເວັດໄຊຂ່າວ ຊີເອັນເອັນ ລາຍງານວ່າ “ແມ່ຂາວ ອັງເດຣ” ແມ່ຂາວຊາວຝຣັ່ງ ອາຍຸ 118 ປີ ທີ່ເປັນບຸກຄົນທີ່ອາຍຸຫຼາຍທີ່ສຸດໃນໂລກ ຈາກການບັນທຶກສະຖິຕິຂອງ Guinness World Records ໄດ້ເສຍຊີວິດທີ່ເມືອງ Toulon ຢູ່ທາງພາກໃຕ້ຂອງຝຣັ່ງ.

ທ່ານ David Tavella ເຊິ່ງເປັນໂຄສົກຂອງແມ່ຂາວໄດ້ເປີດເຜີຍວ່າ: ແມ່ຂາວໄດ້ເຖິງແກ່ມໍລະນະກຳໃນເວລາ 02:00 ຂອງວັນອັງຄານທີ 17 ມັງກອນ ທີ່ເມືອງ Toulon , ໂດຍມີຄວາມເຊື່ອທີ່ວ່າ ເປັນຄວາມຕ້ອງການຂອງແມ່ຂາວເອງທີ່ຢາກຈະຈາກໄປ ເພື່ອທີ່ຈະໄດ້ໄປຢູ່ກັບອ້າຍຜູ້ເປັນທີ່ຮັກຂອງທ່ານ ເຊິ່ງສຳຫຼັບທ່ານແລ້ວການເສຍຊີວິດຄືການໄດ້ເປັນອິດສະຫຼະ.

ນອກຈາກນັ້ນ Guinness Book ໄດ້ລາຍງານຕື່ມອີກວ່າ: ແມ່ຂາວອັງເດຣ ມີຊື່ແທ້ວ່າ Lucille Randon ເກີດໃນວັນທີ 11 ກຸມພາ 1904 ໂດຍອຸທິດເວລາສ່ວນຫຼາຍຂອງຊິວິດໃຫ້ກັບສາສະໜາ ກ່ອນທີ່ຈະມາເປັນແມ່ຂາວນັ້ນເພິ່ນໄດ້ເປັນຄົນເບິ່ງແຍງເດັກນ້ອຍ ແລະ ຜູ້ສູງອາຍຸໃນໂຮງໝໍໄລຍະສົງຄາມໂລກຄັ້ງທີ 2.