ໜ່ວຍກູ້ໄພຫວຽດນາມໄດ້ພະຍາຍາມຊ່ວຍເຫຼືອເດັກນ້ອຍຜູ້ຊາຍ ພາຍຫຼັງທີ່ລາວໄດ້ຕົກລົງໄປໃນຂຸມເສົາເຂັມຊີມັງ ຢູ່ບໍລິເວນທີ່ມີການກໍ່ສ້າງທາງພາກໃຕ້ຂອງຫວຽດນາມ.
ໃນວັນທີ 31 ທັນວາ 2022 ມີເດັກນ້ອຍຜູ້ຊາຍ ຊື່ ຫຼີ ຫ່າວ ນຳ ອາຍຸ 10 ປີ ພ້ອມກັບໝູ່ 3 ຄົນ ໄດ້ອອກໄປຊອກຫາເຫຼັກເສດບໍລິເວນເຂດກໍ່ສ້າງໂຄງການຂົວຣັອກເຊິນ ໃນເມືອງທານບິງ ແຂວງດົ່ງທາບ ແລ້ງໄດ້ຕົກລົງໄປໃນຂຸມເສົາຊີມັງແຄບໆ ທີ່ມີຄວາມກວ້າງແຕ່ 25 ຊັງຕີແມັດ ເລິກ 35 ແມັດ ແລະ ຍັງຕິດຢູ່ໃນນັ້ນ.
ໝູ່ທີ່ໄປນຳກັນ ກໍໄດ້ໄປແຈ້ງຕໍ່ເຈົ້າໜ້າທີ່ເພື່ອຂໍຄວາມຊ່ວຍເຫຼືອໃນວັນເສົາ ແຕ່ໃນວັນຈັນທີ່ຜ່ານມາກໍຍັງບໍ່ພົບການຕອບສະໜອງຫຍັງເລີຍຈາກເດັກນ້ອຍ ຂະນະທີ່ເຈົ້າໜ້າທີ່ກໍພະຍາຍາມໃຊ້ກ້ອງລົງໄປເພື່ອຊອກຫາເດັກນ້ອຍໃນຂຸມເສົາຊີມັງ.
ເຈົ້າໜ້າທີ່ໄດ້ລະດົມກຳລັງ 350 ຄົນ ແບ່ງອອກເປັນຫຼາຍກຸ່ມເຮັດວຽກຢ່າງຕໍ່ເນື່ອງ ເຊິ່ງກໍໄດ້ໃຊ້ທໍ່ເຫຼັກກວ້າງ 1.5 ແມັດ ວາງຄຸມຂຸມເສົາຊີມັງທີ່ເດັກນ້ອຍຕົກລົງໄປ ຈາກນັ້ນຈື່ງຄ່ອຍໆເຈາະອ້ອມຂຸມແລ້ວນຳເອົາເສົາຊີມັງອອກມາ.
ນອກນັ້ນ ເຈົ້າໜ້າທີ່ກໍໄດ້ປ້ຳເອົາອົກຊີລົງໄປໃນຂຸມ ເພື່ອໃຫ້ເດັກນ້ອຍມີອາກາດຫາຍໃຈ ແລະ ໄດ້ຫາຫຼາຍວິທີທາງເພື່ອຊ່ວຍ ແຕ່ກໍຍັງບໍ່ສຳເລັດເທື່ອ.
ແຫຼ່ງຂ່າວ vnexpress