ວັນທີ 16 ພະຈິກ 2022 ຜ່ານມາ, ເຈົ້າໜ້າທີ່ກວດກາການຄ້າ ຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າຈໍາປາສັກ ຮ່ວມກັບ ເຈົ້າໜ້າທີ່ພະແນກຕໍາຫຼວດເສດຖະກິດ ກອງບັນຊາການປ້ອງກັນຄວາມສະຫງົບສຸກ(ປກສ) ແຂວງ ພ້ອມດ້ວຍໜ່ວຍງານທີ່ກ່ຽວຂ້ອງ ໄດ້ທໍາລາຍສິນຄ້າບໍ່ມີຄຸນນະພາບ, ບໍ່ໄດ້ມາດຕະຖານ, ປອມແປງ, ລອກລຽນແບບ ແລະ ລະເມີດເຄື່ອງໝາຍການຄ້າ ຂອງບໍລິສັດທລີລິກີ ແອນ ກິບບິນສ໌ ລາວຈໍາກັດ ຍີ່ຫໍ້ ຄູບູຕ້າ (KUBOTA).
ພິທີຈັດຂຶ້ນ ຢູ່ສະໜາມກໍາຈັດຂີ້ເຫຍື້ອ ຫຼັກ 17 ເມືອງຊະນະສົມບູນ ໂດຍການເຂົ້າຮ່ວມຂອງ ທ່ານ ພູວຽງ ພົງສາ ຫົວໜ້າກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ, ທ່ານ ຄໍາແດງ ພົມມາພັກດີ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ, ທ່ານ ພັນໂທ ບຸນຍູ້ ແກ້ວພິດາວົງ ຮອງພະແນກຕໍາຫຼວດເສດຖະກິດ ກອງບັນຊາການ ປກສ ແຂວງ.
ມີຜູ້ຕາງໜ້າບໍລິສັດ ທລີລີກີ ແອນ ກິບບິນສ໌ ລາວ ຈໍາກັດ ທີ່ປຶກສາທາງດ້ານກົດໝາຍ ຕາງໜ້າບໍລິສັດ ຄູໂບຕ້າ ເຊິ່ງເປັນເຈົ້າຂອງເຄື່ອງໝາຍການຄ້າ ຄູໂບຕ້າ ປະເພດນ້ໍາມັນເຄື່ອງ ແລະ ອາໄຫຼ່, ເຈົ້າໜ້າທີ່ກວດກາການຄ້າ ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.