ລັດຖະບານຕາລີບັນ ສັ່ງຫ້າມບໍ່ໃຫ້ຜູ້ຍິງທ່ຽວສວນສະໜຸກທຸກແຫ່ງໃນກຸງຄາບູລ ເຊິ່ງເປັນການຈຳກັດການດຳລົງຊີວິດປະຈຳວັນຂອງຜູ້ຍິງໃນປະເທດ.
ວັນທີ 10 ພະຈິກ 2022 ສຳນັກຂ່າວ the guardian ລາຍງານວ່າ ຕາມການເປີດເຜີຍຂອງ ທ່ານ ໂມຮຳເໝັດ ອາຄິຟ ໂຄສົກກະຊວງສົ່ງເສີມສິນລະທຳ ແລະ ປ້ອງກັນຄວາມຊົ່ວຮ້າຍ ວ່າ ຜູ້ດຳເນີນກິດຈຳການສວນສະໜຸກໃນກຸງຄາບູລ ເມືອງຫຼວງຂອງອັຟການິສະຖານ ໄດ້ຮັບຄຳສັ່ງຫ້າມບໍ່ອະນຸຍາດໃຫ້ຜູ້ຍິງເຂົ້າໃຊ້ບໍລິການທ່ຽວສວນສະໜຸກ.
ເຊິ່ງນັບຕັ້ງແຕ່ກຸ່ມຕາລີບັນ ມາຄອງອຳນາດໃນອັຟການິສະຖານ ໃນເດືອນສິງຫາ 2021 ພວກເຂົາກໍໄດ້ຈຳກັດສິດເສລີພາບຂອງຜູ້ຍິງໃນປະເທດຢ່າງໜັກໜ່ວງ ລວມເຖິງສິດໃນການເຮັດວຽກ ແລະ ການສຶກສາ ແຕ່ທີ່ຜ່ານມາ ພວກເຂົາຍັງອະນຸຍາດໃຫ້ຜູ້ຍິງໄປທ່ຽວສວນສະໜຸກໄດ້ໃນວັນອາທິດ ຈັນ ແລະ ອັງຄານ.
ແຕ່ປັດຈຸບັນ ແມ່ນບໍ່ໃຫ້ໄປທ່ຽວສວນສະໜຸກເລີຍ ເຖິງວ່າຈະມີຜູ້ຊາຍເດີນທາງໄປເປັນຜູ້ປົກຄອງກໍຕາມ.
ມາດຕະການນີ້ຖືກບັງຄັບໃຊ້ໃນແຕ່ກຸງຄາບູລ ແຕ່ຄາດວ່າ ຕາລີບັນ ຈະຄ່ອຍໆຂະຫຍາຍມາດຕະການບັງຄັບໃຊ້ໃນທົ່ວປະເທດອັຟການິສະຖານ.