ສຳນັກຂ່າວປະເທດໄທ ໄດ້ລາຍງານວ່າ: ວັນທີ 1 ພະຈິກ 2022 ເຈົ້າໜ້າທີ່ຕຳຫຼວດປະເທດໄທ ພ້ອມກຳລັງໄດ້ເຂົ້າຈັບ ແມ່ຄ້າຂາຍປິ້ງໄກ່ ຊື່ນາງ ຈິດຕະລາພອນ ອາຍຸ 32 ປີ ພ້ອມຂອງກາງເປັນຢາບ້າ ທີ່ເຊື່ອງໄວ້ໃນກະເປົາສະພາຍສີດຳ ຈຳນວນ 14 ເມັດ.
ຜູ້ຖືກຫາໄດ້ ສາລະພາບວ່າ: ຊ່ວງນີ້ຂາຍປິ້ງໄກ່ບໍ່ຄ່ອຍໄດ້ດີປານໃດ ລາຍຈ່າຍສູງກ່ອນລາຍຮັບ ທັງຄ່າຮຽນລູກ ຄ່ານ້ຳ ຄ່າໄຟ ຜ່ອນລົດ ແລະ ອື່ນໆ ຈຶ່ງຫັນໄປຮັບຢາບ້າມາຈາກໝູ່ຜູ້ຊາຍ ສັນຊາດລາວ ມາຈຳໜ່າຍໃຫ້ກັບກຸ່ມໄວລຸ້ນ ແລະ ຊາວບ້ານທີ່ສະນິດກັນເທົ່ານັ້ນ ເພື່ອຫາລາຍໄດ້ເສີມ ເປັນຄ່າໃຊ້ຈ່າຍພາຍໃນຄອບຄົວ.
ເຈົ້າໜ້າທີ່ໄດ້ສົ່ງກວດຍ່ຽວທີ່ໂຮງໝໍ ຜົນປາກົດວ່າເປັນສີມ່ວງເຂັ້ມ ຈຶ່ງໄດ້ຈັບໂຕ ພ້ອມຂອງກາງທັງໝົດ ສົ່ງໃຫ້ເຈົ້າໜ້າທີ່ ທີ່ກ່ຽວຂ້ອງດຳເນີນຄະດີຕາມກົດໝາຍ.