ພັທ ກິດ່ອນ ກິວົງໄຊ ຮອງຫົວໜ້າຄະນະຄຸ້ມຄອງດ່ານ, ຫົວໜ້າດ່ານ ຕມ ສາກົນຂົວມິດຕະພາບ ລາວ-ໄທ ແຫ່ງທີ 1 ໃຫ້ສໍາພາດຕໍ່ນັກຂ່າວ ວັນທີ 28 ຕຸລາ 2022 ວ່າ: ຄະນະພັກ-ຄະນະບັນຊາ ຕມ ສາກົນຂົວມິດຕະພາບ ລາວ-ໄທ ແຫ່ງທີ 1 ໄດ້ກະກຽມຄວາມພ້ອມ ໃນການກວດຄົນເຂົ້າ-ອອກເມືອງ ໃນໄລຍະງານບຸນນະມັດສະການບຸນພຣະທາດຫຼວງວຽງຈັນ ທີ່ຈະຈັດຂຶ້ນລະຫວ່າງວັນທີ 4-8 ພະຈິກ 2022.
ໂດຍລວມໄດ້ສຸມໃສ່ເຮັດໜ້າທີ່ວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ພາຍໃນດ່ານ ຢ່າງເປັນປົກກະຕິ, ໃນໄລຍະງານບຸນນະມັດສະການພຣະທາດຫຼວງປະຈຳປີ 2022, ເຈົ້າໜ້າທີ່ ຕມ ໄດ້ເພີ່ມທະວີເຂັ້ມງວດໃນການກວດກາຄົນເຂົ້າ-ອອກດ່ານ ພ້ອມທັງໄດ້ຈັດວາງກໍາລັງເຂົ້າປະຈໍາຈຸດ, ກວດກາເອກະສານແຕ່ລະຈຸດ ໃນຂອບເຂດຄວາມຮັບຜິດຊອບ, ປ້ອງກັນ ແລະ ສະກັດກັ້ນກຸ່ມຄົນບໍ່ຫວັງດີ ລັກລອບເຂົ້າ-ອອກເມືອງ, ພ້ອມນີ້ ໄດ້ປະສານສົມທົບກັບທຸກຂະແໜງການພາຍໃນດ່ານ ໃຫ້ເພີ່ມທະວີເປັນເຈົ້າການ, ປະກອບສ່ວນເຂົ້າໃນວຽກງານປ້ອງກັນຄວາມສະຫງົບ ແລະ ຊ່ວຍເປັນຫູ ເປັນຕາຊ່ວຍເຈົ້າໜ້າທີ່ ນອກຈາກນີ້, ໄດ້ປະສານສົມທົບກັບດ່ານເຊິ່ງໜ້າ ( ດ່ານ ຕມ ໜອງຄາຍ ) ໃນການປ້ອງກັນ, ສະກັດກັ້ນການລັກລອບເຂົ້າ-ອອກເມືອງຜິດກົດໝາຍ, ການປະຕິບັດໜ້າທີ່ໃນໄລຍະງານບຸນ ແມ່ນເຂັ້ມງວດກວດກາພາຫະນະເຂົ້າ-ອອກທຸກປະເພດ ເພື່ອຮັບປະກັນຄວາມສະຫງົບ-ປອດໄພ ແລະ ຄວາມເປັນລະບຽບຮຽບຮ້ອຍ.
ພັທ ກິດ່ອນ ກິວົງໄຊ ຮຽກຮ້ອງມາຍັງນັກທ່ອງທ່ຽວ, ປະຊາຊົນລາວ ທີ່ມີຈຸດປະສົງເຂົ້າ-ອອກດ່ານ ຫຼື ຈະເດີນທ່ຽວຊົມງານບຸນນະມັດສະການພຣະທາດຫຼວງວຽງຈັນ ຈົ່ງກະກຽມເອກະສານການເດີນທາງໃຫ້ຄົບຖ້ວນ ແລະ ໃຫ້ຄວາມຮ່ວມມືກັບເຈົ້າໜ້າທີ່ ໃນການປະຕິບັດໜ້າທີ່ວຽກງານວິຊາສະເພາະ, ພ້ອມຍົກສູງສະຕິໃນການຮັກສາຊັບສິນຂອງຕົນ ບໍ່ໃຫ້ກຸ່ມຄົນບໍ່ຫວັງດີສວຍໂອກາດລັກໄປໄດ້.
ແຫຼ່ງຂ່າວຈາກ ປກສ ນະຄອນຫຼວງວຽງຈັນ