ເຄີຍສົງໄສບໍ່ວ່າ ເປັນຫຍັງບາງຄົນກິນທຸກຢ່າງທີ່ຂວາງໜ້າ ແຕ່ຍັງຮັກສາຮູບຮ່າງທີ່ຈ່ອຍໄດ້ ໃນຂະນະທີ່ບາງຄົນພະຍາຍາມອົດອາຫານສຸດຊີວິດ ພັດ ຕຸ້ຍຂຶ້ນຕຸ້ຍຂຶ້ນທັງທີ່ເມື່ອຄິດເຖິງກິດຈະວັດຕັ້ງແຕ່ເຊົ້າຫາແລງກໍ່ບໍ່ໜ້າຈະມີອຸປະສັກມາຂວາງກັ້ນຄວາມ ຈ່ອຍງາມ ອາຫານກິນພຽງມື້ລະ 1 ຄາບ ຫລື ຖ້າສຽງຮ້ອງຈາກທ້ອງດັງກວນໃຈຈົນທົນບໍ່ໄດ້ກໍ່ເພີ່ມເປັນ 2 ຄາບບໍ່ເຄີຍກາຍກວ່ານີ້ ນິໄສກິນຈຸກກິນຈິກກໍພະຍາຍາມຫລີກລ້ຽງຢ່າງສຸດຄວາມສາມາດແຕ່ເປັນຫຍັງເປົ້າໝາຍໃນການຫລຸດຄວາມຕຸ້ຍໃຫ້ຕົນເອງໄດ້ ຈ່ອຍ ແລະ ແຂງແຮງຈຶ່ງບໍ່ເຄີຍບັນລຸຕາມເປົ້າໝາຍ
ນັ້ນເປັນເພາະນິໄສການກິນບາງຢ່າງທີ່ເຮັດໃຫ້ຕຸ້ຍໂດຍບໍ່ຮູ້ໂຕ ຫລື ຖ້າຈ່ອຍ ລົງໄດ້ ກໍກາຍເປັນຄົນຂີ້ພະຍາດ ເຊິ່ງເປັນສິ່ງທີ່ບໍ່ໜ້າປາຖະຫນາເຊັ່ນກັນ ຄວາມລັບກ່ຽວກັບນິໄສການກິນບາງປະການຈາກຄົນຮູບຮ່າງດີທີ່ແຂງແຮງຕໍ່ໄປນີ້ ໜ້າຈະເປັນປະໂຫຍດກັບທຸກໆຄົນ
ນິໄສທີ່ຄວນຫລີກລ້ຽງ
ອົດອາຫານ ນິໄສມັກອົດອາຫານບໍ່ຊ່ວຍໃຫ້ກາຍເປັນຄົນຈ່ອຍ ໄດ້ໃນໄລຍະຍາວ ເພາະຜົນການວິໄຈຫລາຍຢ່າງລະບຸກົງກັນວ່າ ການອົດອາຫານເຮັດໃຫ້ລະບົບການເຮັດວຽກງານຂອງຮ່າງກາຍປ່ຽນແປງໄປ ຈະຢາກຫລາຍຂຶ້ນກວ່າເກົ່າ ແລະ ກິນຫລາຍຂຶ້ນກວ່າເກົ່າກາຍເປັນວັດທະຈັກໃນຊີວິດອັນແສນໂສກເສົ້າ ເພາະເມື່ອກິນຫລາຍໄປ ນ້ຳໜັກໂຕເພີ່ມ ຈຶ່ງອົດອາຫານເພື່ອໃຫ້ນ້ຳໜັກຫລຸດລົງ ວົນວຽນຊ້ຳໄປຊ້ຳມາບໍ່ສິ້ນສຸດ
ປະຕິເສດຄວາມຕ້ອງການຂອງຕົນເອງ ເບິ່ງຄືຄົນເຮົາຈະມີທຳມະຊາດທີ່ແປກຢູ່ຢ່າງໜຶ່ງ ເມື່ອຄວາມຮູ້ສຶກບອກວ່າ ບໍ່ຄວນ ພັດຈະຕ້ອງການຫລາຍຂຶ້ນ ດັ່ງນັ້ນເມື່ອປະຕິເສດຄວາມຕ້ອງການອາຫານ ໄປໆ ມາໆ ກໍລົງທ້າຍດ້ວຍການກິນແບບບໍ່ມືນຫູມືນຕາ ທາງທີ່ດີຢ່າໃຫ້ຮ່າງກາຍເກີດຄວາມຮູ້ສຶກເຊັ່ນນີ້ ພະຍາຍາມບອກໂຕເອງເລື້ອຍໆວ່າ ເຈົ້າສາມາດກິນຫຍັງກໍໄດ້ ແລະ ຫລາຍເທົ່າທີ່ເຈົ້າຮູ້ສຶກວ່າພໍ ຂໍຢ້ຳວ່າ ພຽງພໍເທົ່າທີ່ຮ່າງກາຍຕ້ອງການເທົ່ານັ້ນ
ນິໄສຕາມໃຈປາກ
ຄົນຈຳນວນຫລາຍກິນເພາະຢາກກິນ ແທນທີ່ຈະກິນເທົ່າທີ່ຮ່າງກາຍຕ້ອງການ ເຈົ້າເປັນໜຶ່ງໃນນັ້ນຫລືບໍ່ ຖ້າແມ່ນຫາສາເຫດວ່າ ເປັນຫຍັງເຈົ້າຈຶ່ງກິນໃນເວລາທີ່ເຈົ້າບໍ່ໄດ້ຢາກ ເຊັ່ນ ເຈົ້າພົບວ່າຕົນເອງມັກຫາຫຍັງໃສ່ທ້ອງໃນຍາມຫວ່າງ ເວລາຢູ່ຄົນດຽວ ຫລື ເວລາເໜື່ອຍ ເມື່ອຫາສາເຫດໄດ້ແລ້ວຫລີກລ້ຽງໃຫ້ໄດ້ ກໍນັບເປັນກ້າວໃຫຍ່ສູ່ຄວາມ ຈ່ອຍ ງາມໃນອານາຄົດ
ນິໄສທີ່ຄວນປະຕິບັດ
ກິນແບບມີເຈົ້າພາບ ໜ້າແປກໃຈທີ່ພົບວ່າ ຜູ້ທີ່ຫລຸດນ້ຳໜັກໄດ້ຕິດຕໍ່ກັນດົນກວ່າ 5 ປີ ເປັນກຸ່ມທີ່ເລືອກກິນອາຫານທີ່ເຕັມໄປດ້ວຍຄຸນຄ່າທາງໂພສະນາການກົງກັນຂ້າມກັບກຸ່ມທີ່ຫລຸດຄວາມຕຸ້ຍແລ້ວກັບມາຕຸ້ຍອີກ ນັ້ນໝາຍຄວາມວ່າ ເລື່ອງຂອງສານອາຫານເປັນເລື່ອງສຳຄັນຫລາຍກວ່າຈະມານັ່ງຄິດໄລ່ຄ່າແຄລໍລີ ທາງທີ່ດີຄວນປຸງແຕ່ງອາຫານກິນເອງ ຈະໄດ້ເລືອກສ່ວນປະສົມທີ່ເຕັມໄປດ້ວຍສານອາຫານທີ່ດີຕໍ່ຮ່າງກາຍ
ກິນອາຫານຫລາກຫລາຍ ຍິ່ງກິນອາຫານຫລາກຫລາຍເທົ່າໃດ ສານອາຫານທີ່ເຈົ້າຈະໄດ້ຮັບກໍຍິ່ງຫລາຍຂຶ້ນເທົ່ານັ້ນ ເຊົາພຶດຕິກຳກິນຊ້ຳ ຫລື ເລືອກກິນສະເພາະສິ່ງທີ່ມັກ ການປ່ຽນແປງໜ້າຕາອາຫານທີ່ກິນນຳແມ່ນພຽງໜ້ອຍດຽວ ຊ່ວຍປ່ຽນແປງລະດັບສານອາຫານທີ່ຮ່າງກາຍໄດ້ຮັບໄດ້ຢ່າງໜ້າອັດສະຈັນ
ກິນໜ້ອຍໆ ແຕ່ກິນເລື້ອຍໆ ຜົນວິໄຈບອກວ່າ ການຫາຫຍັງໃສ່ທ້ອງແຕ່ໜ້ອຍຕະຫລອດມື້ຍັງດີກວ່າການປ່ອຍໃຫ້ທ້ອງຫວ່າງ ແລະ ປິດທ້າຍດ້ວຍເຂົ້າແລງຄາບໃຫຍ່ເພາະຊ່ວຍໃຫ້ລະບົບຍ່ອຍເຮັດວຽກໄດ້ມີປະສິດທິພາບຫລາຍກວ່າ ແຕ່ຢ່າລືມວ່າອາຫານທີ່ເລືອກກິນຄວນຈະເປັນອາຫານແຄລໍລີຕ່ຳ
ກິນອາຫານເຊົ້າ
ອາຫານເຊົ້າໄຂມັນຕ່ຳ ຄຸນຄ່າສູງຕົວຢ່າງ ອາຫານຈຳພວກທັນຍະພືດ ຊ່ວຍໃຫ້ເລີ່ມຕົ້ນມື້ໃໝ່ໄດ້ແບບມີພະລັງ ຜົນວິໄຈພົບວ່າ ຜູ້ທີ່ກິນອາຫານເຊົ້າເປັນປະຈຳມີສຸຂະພາບແຂງແຮງກວ່າອາຍຸເຖິງ 3 ປີ ຖ້າທຽບກັບຜູ້ທີ່ບໍ່ຄ່ອຍກິນອາຫານເຊົ້າ
ອອກກຳລັງກາຍ
ການອອກກຳລັງກາຍຕິດຕໍ່ກັນດົນເຖິງ 11/2 ຊົ່ວໂມງ ຈະມີຜົນໃຫ້ຮ່າງກາຍເຜົາຜານພະລັງງານຕໍ່ອີກ 200 ແຄລໍລີ ໃນໄລຍະ 12 ຊົ່ວໂມງຫລັງການອອກກຳລັງ ເຖິງວ່າຈະເປັນເວລາທີ່ເຈົ້ານອນຫລັບກໍຕາມ