ສະຫາຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີລັດຖະມົນຕີກະຊວງປ້ອງກັນຄວາມສະຫງົບ ສປປ ລາວ ພ້ອມດ້ວຍຄະນະນໍາຂັ້ນສູງກະຊວງປ້ອງກັນຄວາມສະຫງົບລາວ ໄດ້ເຄື່ອນໄຫວຢ້ຽມຢາມສັນທະວະໄມຕີ ສສ ຫວຽດນາມ ຢ່າງເປັນທາງການໃນລະຫວ່າງວັນທີ 25-27 ຕຸລາ 2022 ເຊິ່ງໄດ້ຮັບການຕ້ອນຮັບຢ່າງອົບອຸ່ນຈາກ ສະຫາຍ ພົອ ໂຕ ເລິມ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ ພ້ອມດ້ວຍຄະນະ.
ໃນຕອນບ່າຍຂອງວັນທີ 25 ຕຸລາ 2022 ຜ່ານມາ, ຢູ່ທີ່ກະຊວງປ້ອງກັນຄວາມສະຫງົບ ສສ ຫວຽດນາມ, ຄະນະນຳທັງສອງກະຊວງ ກໍໄດ້ພົບປະກັນ ໂດຍພ້ອມກັນຕີລາຄາສະພາບການຂອງໂລກ ແລະ ພາກພື້ນທີ່ມີການຜັນແປໄປຢ່າງສະຫຼັບຊັບຊ້ອນ ມີທັງກາລະໂອກາດ ແລະ ສິ່ງທ້າທາຍຫຼາຍຢ່າງ ຕໍ່ລາວ ແລະ ຫວຽດນາມ; ແຕ່ດ້ວຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດ, ສອງກໍາລັງປ້ອງກັນຄວາມສະຫງົບ ລາວ-ຫວຽດນາມ ນັບມື້ແໜ້ນແຟ້ນ ກ້າວສູ່ລວງເລິກ ເຊິ່ງໄດ້ສະແດງອອກ ໃນການປະຕິບັດ ແຜນການຮ່ວມມືຊ່ວຍເຫຼືອກັນ ລະຫວ່າງສອງກະຊວງ ໃນປີ 2022 ຜ່ານມາ ແມ່ນມີປະສິດທິຜົນດີ ແລະ ມີໝາກຜົນຕົວຈິງໃນຫຼາຍດ້ານ, ເຊິ່ງສາມາດຮັບປະກັນ ສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍຂອງສັງຄົມ ໃຫ້ແກ່ສອງ ປະເທດ ແລະ ສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນສອງຊາດ ມີໂອກາດໃນການສ້າງສາ ແລະ ພັດທະນາປະເທດຊາດຂອງຕົນ, ກຳລັງປ້ອງກັນຄວາມສະຫງົບ ນັບມື້ໄດ້ຮັບການປັບປຸງຢ່າງໜັັກແໜ້ນ ແລະ ມີແບບແຜນທັນສະໄໝເທື່ອລະກ້າວ.
ສໍາລັບທິດທາງແຜນການຮ່ວມມື ປະຈໍາປີ 2023 ທັງສອງກະຊວງເຫັນດີສືບຕໍ່ພົວພັນຮ່ວມມືກັນຕາມຂົງເຂດວຽກງານ ທີ່ໄດ້ພົວພັນຮ່ວມມືກັນຜ່ານມາ, ໂດຍສະເພາະແມ່ນການປະສານສົມທົບ, ສະຫນັບສະຫນູນຊ່ວຍເຫຼືອກັນເຊິ່ງກັນ ແລະ ກັນ ໃນການຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ, ການປ້ອງກັນຄວາມປອດໄພໃຫ້ແກ່ເຫດການທາງດ້ານການເມືອງ, ດ້ານການຕ່າງປະເທດທີ່ສໍາຄັນ, ເພີ່ມທະວີການປະສານສົມທົບກັນໃຫ້ແຫນ້ນແຟ້ນໃນການຕ້ານ ອາຊະຍາກໍາ ທີ່ເປັນອັນຕະລາຍຮ້າຍແຮງ ເຊັ່ນ: ອາຊະຍາກໍາຢາເສບຕິດ, ອາຊະຍາກໍາສວຍໃຊ້ເຕັກໂນໂລຊີທັນສະໄໝ, ການຟອກເງິນ, ການນຳໃຊ້ເງິນປອມ, ການຄ້າມະນຸດ, ອາຊະຍາກຳສິ່ງແວດລ້ອມ ແລະ ອື່ນໆ, ສືບຕໍ່ຮ່ວມມືປະສານສົມທົບກັນຢ່າງສະຫນິດແຫນ້ນ ເພື່ອຕອບຕ້ານການເຄື່ອນໄຫວຂອງພວກບໍ່ດີ, ອິດທິກໍາລັງປໍລະປັກໃສ່ຮ້າຍປ້າຍສີ, ແບ່ງແຍກຄວາມ ສາມັກຄີ ລະຫວ່າງສອງປະເທດ ລາວ-ຫວຽດນາມ ໂດຍສະເພາະ ແມ່ນຜ່ານລະບົບສື່ສັງຄົມອອນລາຍ, ສືບຕໍ່ຮ່ວມມືຊ່ວຍເຫຼືອ ທາງດ້ານອຸປະກອນເຕັກນິກທີ່ຈໍາເປັນ ເພື່ອຮັບໃຊ້ວຽກງານປ້ອງກັນຄວາມສະຫງົບຂອງຊາດ ແລະ ຄວາມເປັນລະບຽບຮຽບຮ້ອຍຂອງສັງຄົມ ທັງປະກອບເຂົ້າໃນການກະກຽມປ້ອງກັນ ກອງປະຊຸມອາຊຽນໃນປີ 2024 ທີ່ໃກ້ຈະມາເຖິງ ເຊິ່ງ ສປປລາວ ຈະເປັນເຈົ້າພາບ; ສືບຕໍ່ຊຸກຍູ້ບັນດາໂຄງການທີ່ສອງກະຊວງກໍາລັງດໍາເນີນໃຫ້ສໍາເລັດ ຕາມຄາດຫມາຍ; ນໍາສະເຫນີລັດຖະບານ ເພື່ອຂໍການຊ່ວຍເຫຼືອສ້າງສູນບໍາບັດຜູ້ຕິດຢາເສບຕິດ ແລະ ຖານຂໍ້ມູນປະຊາກອນແຫ່ງຊາດ ໃຫ້ ສປປ ລາວ, ສືບຕໍ່ຊຸກຍູ້ການຈັດຕັ້ງປະຕິບັດໂຄງການກໍ່ສ້າງຫ້ອງການປະສານງານຕ້ານອາຊະຍາກໍາຂ້າມຊາຍ ແດນ ຈໍານວນ 287 ຫຼັງ ແລະ ໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ປະຊາຊົນລາວ ໃຫ້ສໍາເລັດ ແລະ ທັນຕໍ່ເປີດສົກຮຽນປີ 2023, ສືບຕໍ່ຮ່ວມມືດ້ານວຽກງານຮ່ວມມືກໍ່ສ້າງກໍາລັງ, ການແລກປ່ຽນຄະນະຜູ້ແທນ,ພັກຜ່ອນ-ຢ້ຽມຢາມ ແລະ ປິ່ນປົວສຸຂະພາບ.
ໂອກາດດັ່ງກ່າວ ກໍໄດ້ມີການລົງນາມແຜນການຈັດຕັ້ງປະຕິບັດສັນຍາຮ່ວມມືປະຈຳປີ 2023 ລະຫວ່າງສອງກະຊວງ ຕາງໜ້າກະຊວງ ປກສ ລາວ ໂດຍ ສະຫາຍ ພົນເອກ ວິໄລ ຫຼ້າຄຳຟອງ ແລະ ຕາງໜ້າກະຊວງ ປກສ ຫວຽດນາມ ໂດຍ ສະຫາຍ ພົອ ໂຕ ເລິມ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບຫວຽດນາມ.
ທີ່ມາ: ຄວາມສະຫງົບ