ສຳນັກຂ່າວຈາກຝຣັ່ງ ໄດ້ລາຍງານວ່າ: ສະຫະພາບແຮງງານທຸລະກິດນ້ຳມັນໃນຝຣັ່ງ ນັດຢຸດງານປະທ້ວງທີ່ໂຮງກັ່ນນ້ຳມັນຂະໜາດໃຫຍ່ 6 ແຫ່ງຈາກ 7 ແຫ່ງ ເຮັດໃຫ້ປະຊາຊົນຕົກຕື່ນແຫ່ກັນໄປເຕີມນ້ຳມັນເພາະຢ້ານຂາດແຄນນ້ຳມັນ.
ກະຊວງພະລັງງານຂອງຝຣັ່ງລະບຸວ່າ ຕອນນີ້ເລີ່ມຂາດແຄນນ້ຳມັນບາງປະເພດແລ້ວ ແລະ ບາງປ້ຳກໍບໍ່ສາມາດເປີດບໍລິການໄດ້ປົກກະຕິ ເນື່ອງຈາກບໍ່ມີການສົ່ງນ້ຳມັນທີ່ໂຮງກັ່ນ.
ເຫດການນີ້ເກີດຂຶ້ນເມື່ອຊາວຜູ້ອອກແຮງງານທົ່ວເອີຣົບຮຽກຮ້ອງໃຫ້ຂຶ້ນເງິນເດືອນ ເພື່ອຮັບມືກັບພາວະເງິນເຟີ້ສູງ ແລະ ວິກິດເສດຖະກິດ ໂດຍການປະທ້ວງນີ້ ເຮັດໃຫ້ຜົນຜະລິດໃນປະເທດຝຣັ່ງຫຼຸດລົງກວ່າ 60% ຈຶ່ງສ້າງຄວາມວິຕົກກັງວົນໄປທົ່ວປະເທດ.
ຈາກແຕ່ເດີມໄດ້ພັກວຽກເພື່ອປະທ້ວງແມ່ນ 3 ມື້ ແຕ່ອາດຈະໄດ້ຢືດໄປເຖິງ 1 ອາທິດ ການຮຽກຮ້ອງປັບເງິນເດືອນແຮງງານຂຶ້ນ 10% ໂດຍໃຫ້ເຫດຜົນວ່າ 7% ແມ່ນສຳລັບເງິນເຟີ້ ແລະ ອີກ 3% ແມ່ນການແບ່ງປັນຄວາມລ່ຳລວຍ ເນື່ອງຈາກບໍລິສັດນ້ຳມັນໄດ້ກຳໄລມະຫາສານໃນຊ່ວງທີ່ຜ່ານມາ.
ການປະທ້ວງຍັງດຳເນີນມາໄດ້ 13 ມື້ແລ້ວ ເຮັດໃຫ້ສົ່ງຜົນກະທົບຕໍ່ການເດີນທາງຂອງຜູ້ຂັບຂີ່ ຫຼາຍຄົນກໍ່ຕ້ອງໄດ້ຢຸດວຽກ ແລະ ກິດຈະກຳອື່ນໆ ເພາະບໍ່ມີນ້ຳມັນ.