spot_img
Homeຂ່າວພາຍ​ໃນ​ສານ​ເນື່ອງ​ໃນ​ໂອກາດ​ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ຄົບຮອບ 21 ປີ

​ສານ​ເນື່ອງ​ໃນ​ໂອກາດ​ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ຄົບຮອບ 21 ປີ

Published on

ໃນ​ວັນ​ທີ 6 ຕຸລາ ນີ້, ທ່ານ ພົນ​ເອກ ວິໄລ ຫຼ້າ​ຄຳ​ຟອງ ຮອງ​ນາຍົກລັດຖະມົນຕີ, ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ໄດ້​ອ່ານ​ສານ​ເນື່ອງ​ໃນ​ໂອກາດ​ວັນ​ແຫ່ງ​ຊາດ​ຕ້ານ​ຢາ​ເສບ​ຕິດ ຄົບຮອບ 21 ປີ (12 ຕຸລາ 2001-12 ຕຸລາ 2022) ໂດຍ​ມີ​ເນື້ອ​ໃນ​ບາງ​ຕອນ​ວ່າ: ຢາ​ເສບ​ຕິດ ແມ່ນ​ບັນຫາ​ລວມ​ຂອງ​ວົງ​ຄະນະ​ຍາດ​ສາກົນ ເຊິ່ງ​ເປັນ​ໄພ​ຂົ່ມຂູ່​ທີ່ ​ຮ້າຍ​ແຮງ​ຕໍ່​ມວນ​ມະນຸດ, ເປັນ​ບໍ່ ເກີດ​ຂອງ​ອາ​ຊະ​ຍາ​ກຳ​ຕ່າງໆທີ່​ກົດ​ໜ່ວງ​ຖ່ວງ​ດຶງ​ການ​ສ້າງສາ​ພັດທະນາ ເສດຖະກິດ-ສັງຄົມ​ຂອງ​ຊາດ, ທັງ​ຍັງ​ສ້າງ​ຄວາມ​ເສຍ​ຫາຍ​ຢ່າງ​ໃຫຍ່​ຫຼວງ​ຕໍ່​ບຸກຄົນ ແລະ ຄອບຄົວ ຜູ້​ຕົກ​ເປັນ​ທາດ​ຂອງ​ຢາ​ເສບ​ຕິດ; ປັດຈຸບັນ ການ​ຄ້າຂາຍ​ຢາ​ເສບ​ຕິດ ໄດ້​ກາຍເປັນ ຂະ​ບວນ​ການ​ຂ້າມ​ຊາດ ທີ່​ລັດຖະ ບານ ແລະ ປະຊາຊົນ​ລາວ ກໍ​ຄື​ບັນ ດາ​ປະຊາ​ຊາດ​ໃນ​ທົ່ວ​ໂລກ ພ້ອມ​ກັນ​ຕ້ານ ແລະ ສະກັດ​ກັ້ນ​ຢ່າງ​ແຂງແຮງ.

ສຳລັບ​ຢູ່ ​ສປປ ລາວ ການ​ເສບ, ການ​ຄ້າຂາຍ, ຂົນສົ່ງ​ຢາ​ເສບ​ຕິດ ໄດ້​ລະ ບາດ ແລະ ແຜ່​ລາມ​ຈາກ​ຕົວ​ເມືອງ​ໄປ​ສູ່​ເຂດ​ຊົນນະບົດ, ຈາກ​ທົ່ງພຽງ​ຂຶ້ນ​ສູ່​ພູ​ດອຍ​ຫ່າງ​ໄກ​ສອກຫຼີກ; ປັດຈຸບັນ​ຢູ່​ຫລາຍ​ທ້ອງຖິ່ນ ໄດ້​ມີ​ຊາວ​ໜຸ່ມ-ເຍົາວະ​ຊົນ, ນັກຮຽນ-ນັກ​ສຶກ​ສາ, ກຳມະກອນ​ຢູ່​ຕາມ​ໂຮງ​ຈັກ​ໂຮງງານ ແລະ ຊາວ​ໄຮ່ນາ ຈຳນວນ​ບໍ່​ໜ້ອຍ ໄດ້​ຕົກ​ເປັນ​ທາດ​ຂອງ​ຢາ​ເສບ​ຕິດ; ຈຳນວນ​ຜູ້​ໄດ້​ຮັບ​ເຄາະ​ຮ້າຍ​ສ່ວນ​ຫນຶ່ງ ໄດ້​ພາກັນ​ສ້າງ​ຄວາມ​ສັບສົນ​ວຸ້ນວາຍ, ກໍ່ໃຫ້ເກີດ​ມີ​ສິ່ງ​ຫຍໍ້ທໍ້​ຕ່າງໆ ພາຍ​ໃນ​ຄອບຄົວ ກໍ​ຄື​ຢູ່​ຊຸມ​ຊົນ; ເກີດ​ມີ​ການ​ຂີ້ລັກ​ງັດ​ແງະ, ປຸ້ນ​ຈີ້, ຊີງ​ຊັບ, ຄາດ​ຕະ​ກຳ, ລັກ​ພາ​ຕົວ, ຄ້າ​ໂສເພນີ, ລະເມີດ​ກົດ​ຈາລະ​ຈອນ ພາໃຫ້​ເກີດ​ອຸບັດ​ຕິ​ເຫດ​ຕາມ​ທ້ອງ​ຖະໜົນ, ກໍ່​ອາ​ລະ​ວາດ​ຜິດ​ຖຽງ​ຕີ​ກັນ ແລະ ອື່ນໆ.

ສະນັ້ນ ຈຶ່ງ​ສະເໜີ​ມາ​ຍັງ​ກະຊວງ, ອົງການ ແລະ ທ້ອງຖິ່ນ​ຂັ້ນ​ຕ່າງໆ ຈົ່ງ​ໄດ້​ໃຫ້​ຄວາມ​ຮ່ວມ​ມື ໃຫ້​ຖື​ເອົາ​ວຽກ​ງານ​ຄວບ​ຄຸມ, ສະກັດ​ກັ້ນ ແລະ ຕ້ານ​ຢາ​ເສບ​ຕິດ ເປັນ​ພັນທະ, ເປັນ​ໜ້າທີ່​ຂອງ​ທຸກ​ພາກ ສ່ວນ, ນັບ​ແຕ່​ຂັ້ນ​ສູນ​ກາງ​ລົງ​ຮອດ​ທ້ອງຖິ່ນ; ເພີ່ມ​ທະວີ​ຄວາມ​ເອົາໃຈໃສ່​ຕໍ່​ວຽກ​ງານ​ໂຄສະນາ, ສຶກ​ສາ​ອົບຮົມ, ສ້າງ​ຄວາມ​ຮັບ​ຮູ້​ໃນ​ທົ່ວ​ສັງຄົມ​ໃຫ້​ກວ້າງຂວາງ ດ້ວຍ​ຫຼາຍ​ຮູບ​ການ ເພື່ອ​ປູກ​ຈິດ​ສຳນຶກ ໃຫ້​ປະຊາຊົນ​ລາວ​ທຸກ​ຊັ້ນ​ຄົນ ໂດຍ​ສະເພາະ​ແມ່ຍິງ, ຊາວ​ໜຸ່ມ, ເຍົາວະ​ຊົນ ເຫັນ​ໄດ້​ເຖິງ​ພິດ​ໄພ, ຜົນ​ຮ້າຍ​ຂອງ​ຢາ​ເສບ​ຕິດ, ຮັບ​ຮູ້, ເຂົ້າໃຈ​ລະບຽບ​ກົດໝາຍ ທີ່​ພົວພັນ​ກັບ​ຢາ​ເສບ​ຕິດ; ປຸກລະດົມ​ຂົນຂວາຍ ໃຫ້​ເຂົາເຈົ້າ​ເຂົ້າໃຈ, ຕື່ນ​ຕົວ, ສະໝັກ​ໃຈ ແລະ ມີ​ສ່ວນ​ຮ່ວມ​ໃນ​ວຽກ​ງານ​ສະກັດ​ກັ້ນ ແລະ ແກ້​ໄຂ​ບັນຫາ​ຢາ​ເສບ​ຕິດ; ເອົາໃຈໃສ່​ປັບປຸງ​ພື້ນຖານ​ໂຄງ​ລ່າງ ເພື່ອ​ຟື້ນ​ຟູ​ຕໍ່​ຜູ້​ຖືກ​ເຄາະ​ຮ້າຍ, ວຽກ​ງານ​ບຳບັດ​ປິ່ນປົວ, ຟື້ນ​ຟູ​ສຸ ຂະພາບ ແລະ ຝຶກ​ວິຊາ​ຊີບ ເພື່ອ​ໃຫ້​ເຂົາເຈົ້າ​ມີ​ສຸຂະພາບ​ແຂງແຮງ​ດີ​ຂຶ້ນ​ເປັນ​ປົກກະຕິ ກັບ​ຄືນ​ສູ່​ຄວາມ​ອົບ​ອຸ່ນ​ຂອງ​ຄອບຄົວ ແລະ ສັງຄົມ.

ໃນ​ຂະນະ​ທີ່​ພາກ​ລັດ​ກໍ​ຕ້ອງ​ສຸມ​ໃສ່​ສ້າງ, ປັບປຸງ​ກົດໝາຍ ແລະ ນິຕິ​ກຳ​ໃຕ້​ກົດໝາຍ ລວມ​ທັງ​ການ​ສ້າງ​ຄວາມ​ເຂັ້ມແຂງ ກ່ຽວ​ກັບ​ວຽກ​ງານ​ຄວບ​ຄຸມ, ສະກັດ​ກັ້ນ ແລະ ຕ້ານ​ຢາ​ເສບ​ຕິດ​ໃຫ້​ບຸກ​ຄະລາ​ກອນ​ໃນ​ຂະແໜງການ​ທີ່​ກ່ຽວຂ້ອງ, ມີ​ການ​ຈັດ​ສັນ​ງົບປະມານ​ທີ່​ເຫມາະ​ສົມ, ກົງຈັກ​ຂັ້ນ​ສູນ​ກາງ ແລະ ທ້ອງຖິ່ນ ເພື່ອ​ຮັບປະກັນ​ໃຫ້​ວາລະ​ແຫ່ງ​ຊາດ ວ່າ​ດ້ວຍ​ການ​ແກ້​ໄຂ​ບັນຫາ​ຢາ​ເສບ​ຕິດ ໄດ້​ຮັບ​ການຈັດຕັ້ງ​ປະຕິບັດ​ຖືກ​ທິດ, ມີ​ປະສິດທິພາບ ແລະ ບັນລຸ​ຄາດໝາຍ​ທີ່​ວາງ​ໄວ້;
ເອົາໃຈໃສ່​ຕິດຕາມ, ກວດກາ ແລະ ສຶກ​ສາ​ອົບຮົມ​ປະຊາຊົນ ບໍ່​ໃຫ້​ລັກລອບ​ປູກ​ພືດ​ທີ່​ມີ​ສານ​ເສບ​ຕິດ; ຊຸກຍູ້​ສົ່ງເສີມ ແລະ ຊ່ວຍເຫລືອ​ໃຫ້​ເຂົາເຈົ້າ ໄດ້​ມີ​ເງື່ອນໄຂ​ຫັນ​ໄປ​ປະກອບ​ອາຊີບ​ອື່ນ​ທີ່​ໝັ້ນຄົງ​ແທນ​ການ​ປູກ​ພືດ​ທີ່​ມີ​ສານ​ເສບ​ຕິດ ທີ່​ຜິດ​ກົດໝາຍ ພ້ອມ​ທັງ​ໃຫ້​ດຳເນີນ​ມາດ​ຕະການ​ດ້ານ​ກົດໝາຍ​ຢ່າງ​ເຂັ້ມ​ງວດ​ຕໍ່​ຜູ້​ກະທຳ​ຜິດ.
ຂ່າວໂດຍ: ສົມ​ຫວັງ, ພາບ: ຂັນໄຊ

ບົດຄວາມຫຼ້າສຸດ

ງົດງາມທີ່ສຸດຈາກທົ່ວໂລກ ຕາດກວາງຊີ ແຂວງຫຼວງພະບາງ ຖືຈັດຢູ່ໃນ 21 ນໍ້າຕົກທີ່ສວຍງາມຈາກທົ່ວໂລກ ປີ 2025

ວາລະສານ ການທ່ອງທ່ຽວຊື່ດັງຂອງໂລກ Travel + Leisure ໄດ້ຈັດອັນດັບ Top 21 Most Beautiful Waterfalls in the World...

ໄທເລີ່ມປະຕິບັດແລ້ວ ທະນາຄານເລີ່ມປາບປາມຂະບວນການບັນຊີມ້າ ຖ້າກວດພົບຄວາມສົງໄສ ຈະອາຍັດບັນຊີທັນທີ

ບັນຊີມ້າແມ່ນບັນຊີທະນາຄານທີ່ຖືກນໍາໃຊ້ໂດຍອາດຊະຍາກອນ ເພື່ອເກັບເງິນ ຫຼື ຟອກເງິນທີ່ໄດ້ມາແບບຜິດກົດໝາຍ ແມ່ນບັນຊີທີ່ຖືກຈ້າງໃຫ້ເປີດ ຫຼື ຖືກລັກຂໍ້ມູນໄປໃຊ້ ເພື່ອເປັນທາງຜ່ານຂອງເງິນທີ່ໄດ້ມາຈາກການກະທຳຜິດກົດໝາຍ ລວມທັງການພະນັນ. ໃນຊ່ວງໜຶ່ງອາທິດທີ່ຜ່ານມາ ທາງທະນາຄານເເຫ່ງປະເທດໄທ ເລີ່ມກວດສອບ ແລະ ລົງມືປະຕິບັດຢ່າງເຂັ້ມງວດ ໃນການອາຍັດບັນຊີມ້າ...

ຄວາມຫວັງໃໝ່ຂອງເນປານ ແຕ່ງຕັ້ງລັດຖະມົນຕີຄົນໃໝ່ ໂດຍຈະປະຕິບັດໜ້າຮັກສາການ 6 ເດືອນ

ພາຍຫຼັງຄວາມວຸ່ນວາຍຂອງເຫດການປະທ້ວງໃນປະເທດເນປານ ເຮັດໃຫ້ອະດີດນາຍຍົກລັດຖະມົນຕີໄດ້ລາອອກ ພ້ອມທັງເດີນທາງອອກນອກປະເທດ ນຳພາໃຫ້ເນປານບໍ່ມີຄົນດຳລົງຕໍາເເໜ່ງນາຍົກລັດຖະມົນຕີໃນໄລຍະໜຶ່ງ. ເຊິ່ງໃນວັນທີ 12 ກັນຍາ 2025 ທີ່ຜ່ານມາ, ໄດ້ມີການປະກາດແຕ່ງຕັ້ງ ທ່ານ ນາງ  ສຸຊີລາ ກາກີ ຂຶ້ນຮັບຕໍາແໜ່ງຮັກສາການນາຍົກລັດຖະມົນຕີ...

ສະຫຼົດ! ຊາຍອາຍຸ 26 ປີ (ເສຍຊີວິດ) ຍ້ອນຂັບລົດຕຳງົວ ທີ່ບ້ານວຽງແກ້ວ ເມືອງຈັນທະບູລີ ນະຄອນຫຼວງວຽງຈັນ

ບັນຫາການປ່ອຍສັດຊະຊາຍ ສ່ຽງເຮັດໃຫ້ຄົນອື່ນເກີດອຸບັດຕິເຫດ ເຖິງຂັ້ນເສຍຊີວິດໄດ້. ບັນຫາການປ່ອຍສັດລ້ຽງ (ງົວ, ຄວາຍ, ແບ້, ມ້າ...) ຍັງຄົງຖືກພົບເຫັນເລື້ອຍໆຢູ່ຫຼາຍໆຂົງເຂດ ຕັ້ງແຕ່ເຂດຊານເມືອງຈົນໄປເຖິງໃນເມືອງ. ຈົນກາຍເປັນຄວາມເຄີຍຊິນໄປແລ້ວສຳລັບຜູ້ສັນຈອນໄປມາທີ່ຕ້ອງລະວັງເອງ ແຕ່ບາງຄັ້ງກໍມີອຸບປະຕິເຫດຕາມມາ ເຊັ່ນ: ລົດໃຫຍ່ຕຳງົວ, ລົດຈັກຕຳງົວ,...