ສະຫະລັດອາເມຣິກາ ກົດດັນໃຫ້ປະເທດສະມາຊິກກຸ່ມໂອເປັກພຣັສ ຫຼື ກຸ່ມປະເທດຜະລິດນ້ຳມັນ ໃຫ້ຫຼີກລ່ຽງການປັບຫຼຸດຜະລິດນ້ຳມັນໃນປະລິມານຫຼາຍ ໃນຂະນະທີ່ ທ່ານ ໂຈ ໄບເດັນ ປະທານາທິບໍດີອາເມຣິກາ ພະຍາຍາມທີ່ຈະສະກັດກັ້ນການປັບໂຕຂຶ້ນລາຄານ້ຳມັນໃນອາເມຣິກາ.
ສຳນັກຂ່າວ ຣອຍເຕີ ໄດ້ລາຍງານວ່າ: ສະຫະລັດອາເມຣິກາກຳລັງໂນ້ມນ້າວໃຫ້ກຸ່ມໂອເປັກພຣັສວ່າ ຍັງບໍ່ເໝາະທີ່ຈະປັບຫຼຸດການຜະລິດນ້ຳມັນໃນຂະນະນີ້ ເມື່ອພິຈາລະນາຈາກຫຼາຍປັດໄຈພື້ນຖານທາງເສດຖະກິດ.
ກຸ່ມໂອເປັກພຣັສ ເຊິ່ງລວມເຖິງປະເທດຊາອຸດິອາລັບບີ ແລະ ຣັດເຊຍ ກຳລັງຫາລືກັນເລື່ອງການຫຼຸດຜະລິດນ້ຳມັນ 1 ລ້ານບາເຣວຕໍ່ມື້ ໂດຍການຜະລິດດັ່ງກ່າວອາດສົ່ງຜົນໃຫ້ລາຄານ້ຳມັນເພີ່ມຂຶ້ນ.
ໂຈ ໄບເດັນ ຍັງໄດ້ພະຍາຍາມແກ້ໄຂບັນຫາລາຄານ້ຳມັນແອັດຊັງທີ່ແພງຕະຫຼອດທັ້ງປີ ໂດຍລາຄາທີ່ແພງຂຶ້ນອາດສົ່ງຜົນກະທົບຕໍ່ການເລືອກຕັ້ງໃນວັນທີ 8 ພະຈິກນີ້.