ຍີ່ປຸ່ນເຕືອນໄພປະຊາຊົນໃນຮອກໄກໂດ-ອາໂຣໂມຣິ ໃຫ້ຊອກຫາບ່ອນລີ້ໄພ ຫຼັງຈາກເກົາຫຼີເໜືອຍິງລູກສອນໄຟຂ້າມຍີ່ປຸ່ນ ກ່ອນທີ່ຈະຕົກລົງໄປໃນມະຫາສະໝຸດປາຊີຟິກ.

ວັນທີ 4 ຕຸລາ ສຳນັກຂ່າວທາງການຍີ່ປຸ່ນ Japan Times ໄດ້ລາຍງານວ່າ ເກົາຫຼີເໜືອທົບສອບຍິງລູກສອນໄຟຂ້າມຍີ່ປຸ່ນເປັນຄັ້ງທິດ ໃນຮອບ 5 ປີ ຫຼື ຕັ້ງແຕ່ປີ 2017 ສົ່ງຜົນໃຫ້ລັດຖະບານຍີ່ປຸ່ນປະກາດເຕືອນປະຊາຊົນໃນແຂວງຮອກໄກໂດ ແລະ ອາໂຣໂມຣິ ຫາບ່ອນລີ້ໄພ.

ສຳນັກງານນາຍົກລັດຖະມົນຕີໄດ້ກ່າວວ່າ ລູກສອນໄຟຢ່າງໜ້ອຍ 1 ລູກ ຍິງມາຈາກເກົາຫຼີເໜືອ ພ້ອມລະບຸວ່າ ການຍິງລູກສອນໄຟໃນຫຼາຍໆຄັ້ງນີ້ ຈະໄດ້ເອີ້ນປະຊຸມຄະນະມົນຕີຄວາມໝັ້ນຄົງແຫ່ງຊາດ ເພື່ອຫາລືກ່ຽວກັບສະຖານະການທີ່ເກີດຂຶ້ນ.

ນອກຈາກນີ້ ຍີ່ປຸ່ນຍັງສັ່ງໂຈະການໃຫ້ບໍລິການລົດໄຟໃນເຂດທາງພາກເໜືອຊົ່ວຄາວ ກ່ອນທີ່ຈະກັບມາໃຫ້ບໍລິການປົກກະຕິ ຫຼັງຈາກໄດ້ຮັບການຢືນຢັນວ່າລູກສອນໄຟຕົກລົງໃນມະຫາສະໝຸດແລ້ວ.