ມະເລເຊຍເລັ່ງການຊ່ວຍເຫຼືອປະຊາຊົນຂອງຕົນທີ່ຕົກເປັນເຫຍື່ອຫຼວກລວງໄປເຮັດວຽກເປັນແກ້ງຄໍເຊັນເຕີ.
ວັນທີ 30 ກັນຍາ ສຳນັກງານຕຳຫຼວດແຫ່ງຊາດມາເລເຊຍ ໄດ້ເຮັດໃຫ້ຮູ້ວ່າ ແກ້ງຕົ້ມຕຸ໋ນພົນລະເມືອງໄປເຮັດວຽກໃນຕ່າງແດນ ໃນນັ້ນກໍ ລາວ ລວມທັງປະເທດເພື່ອນບ້ານ ແລະ ບັງຄັບໃຫ້ເຮັດວຽກເປັນພວກຫຼອກລວງຄົນທາງໂທລະສັບ ຫຼື ສັງຄົມອອນລາຍ ລະບຸວ່າ ຍັງມີປະຊາຊົນມາເລເຊຍທີ່ຕົກເປັນເຫຍື່ອຂະບວນການປະເພດນີ້ໃນຕ່າງແດນຫຼາຍກວ່າ 174 ຄົນ ແລະ ກຳລັງປະສານກັບທາງການທ້ອງຖິ່ນໃຫ້ຊ່ວຍເຫຼືອ ຈົນເຖິງຕອນນີ້ໄດ້ຊ່ວຍເຫຼືອແລ້ວ 168 ຄົນ ພ້ອມປະກາດເຕືອນວ່າ ຜູ້ທີ່ຖືກຊວນໄປເຮັດວຽກຕ່າງປະເທດຜ່ານອອນລາຍໂດຍສະເພາະ ເຟສບຸກ ແລະ ອິນສະຕາແກຣມ ຄວນນຳຂໍ້ມູນບໍລິສັດທີ່ຈະຈ້າງມາກວດສອບກັບກະຊວງການຕ່າງປະເທດກ່ອນ ເພື່ອຢັ້ງຢືນວ່າເປັນບໍລິສັດແທ້ ຫຼື ເປັນແກ້ງຕົ້ງຕຸ໋ນ.
ນອກຈາກນັ້ນ ທາງການມາເລເຊຍກໍໄດ້ອອກມາລະບຸວ່າ ຈຳນວນຄົນທີ່ຖືກຕົວະມາເຮັດວຽກມີຫຼາຍກວ່ານັ້ນຄື ຫຼາຍກວ່າ 700 ຄົນ ທີ່ໄດ້ຕົກເປັນເຫຍື່ອການຫຼອກລວງເພື່ອມາເຮັດວຽກ ໂດຍການຕົວະວ່າເຮັດວຽກໄດ້ເງິນຫຼາຍ.
ອົງການສິດທິມະນຸດທຳລະຫວ່າງປະເທດຂອງເມເລເຊຍ (MHO) ຍັງໄດ້ກ່າວວ່າ ໄດ້ຍື່ນລາຍງານຕໍ່ສະຖານທູດລາວປະຈຳມາເລເຊຍເປັນທີ່ຮຽບຮ້ອຍແລ້ວ ແຕ່ເລື່ອງຍັງບໍ່ມີການດຳເນີນງານເທົ່າທີ່ຄວນ ແລະ ບໍ່ມີປະສິດທິພາບ ຈຶ່ງສົ່ງຜົນໃຫ້ປະຊາຊົນທີ່ຕົກເປັນເຫຍື່ອຍັງຄົງຕິດຄ້າງໃນລາວ ຕໍ່ໜ້າສະຖານທູດລາວປະຈຳປະເລເຊຍ ກໍຍັງມີບັນດາຄອບຄົວຂອງຜູ້ທີ່ເປັນເຫຍື່ອອອກມາຮຽກຮ້ອງໃຫ້ນາຍົກລັດຖະມົນຕີແຫ່ງ ສປປ ລາວເລັ່ງດຳເນີນການໄຫ້ໄວທີ່ສຸດ.
ໃນມື້ດຽວກັນ ທາງການວຽດນາມກໍພົບສົບຄົນຈີນ 7 ຄົນ ທີ່ລອຍຕິດເກາະຟູໂກກ ທາງພາກໃຕ້ຂອງວຽດນາມ ເຊິ່ງເປັນເຫຍື່ອທີ່ສູນຫາຍ ແລະ ເສຍຊີວິດຈາກເຫດເຮືອລັກລອບຂົນແຮງງານຈີນຫຼົ່ມ ທາງດ້ານນອກຝັ່ງທະເລຂອງກຳປູເຈຍ ໃນວັນທີ 23 ກັນຍາ ຫຼັງຈາກທີ່ມີເຫຍື່ອໄດ້ຮັບການຊ່ວຍເຫຼືອ 30 ຄົນ ຈາກທັງໝົດ 41 ຄົນ.
