spot_img
Homeຂ່າວທ້ອງຖິ່ນປະກວດ ງົວງາມ-ໝາກໂມຫວານ ທົ່ວແຂວງສະຫວັນນະເຂດ ຈັດຂຶ້ນທີ່ເມືອງໄຊພູທອງ

ປະກວດ ງົວງາມ-ໝາກໂມຫວານ ທົ່ວແຂວງສະຫວັນນະເຂດ ຈັດຂຶ້ນທີ່ເມືອງໄຊພູທອງ

Published on

10393892_559043364226618_175476715704678574_n

ໃນໂອກາດວັນສັກຢາກັນພະຍາດສັດແຫ່ງຊາດ 11 ພະຈິກ ເຊິ່ງໃນປີນີ້ ແຂວງສະຫວັນນະເຂດ ໄດ້ຈັດຂຶ້ນຢູ່ເມືອງໄຊພູທອງ ເຊິ່ງໃນພິທີຄັ້ງນີ້ ໄດ້ມີການແຂ່ງຂັນປະກວດງົວງາມ ແລະໝາກໂມຫວານ ເຊິ່ງມີເມືອງຕ່າງໆ ໄດ້ໃຫ້ຄວາມສົນໃຈ ແລະສົ່ງຜະລິດຕະພັນຂອງຕົນ ເຂົ້າຮ່ວມແຂ່ງຂັນຢ່າງຫຼວງຫຼາຍ.
ໃນພິທີຄັ້ງນີ້ ໄດ້ເປັນກຽດເຂົ້າຮ່ວມຂອງທ່ານ ໄກສອນ ຄູນລາດສຸວັນນະວົງ ຮອງເລຂາພັກແຂວງ ຮອງເຈົ້າແຂວງສະຫວັນນະເຂດ, ທ່ານ ນາງ ປິ່ງຄຳ ລາຊະສີມາ ຫົວໜ້າກົມຈັດຕັ້ງ ກະຊວງກະສິກຳ-ປ່າໄມ້, ມີບັນດາທ່ານຫົວໜ້າກົມ, ຮອງກົມ, ຫົວໜ້າ-ຮອງຫົວໜ້າສະຖາບັນ, ບັນດາພະແນກການຂອງແຂວງ, ການນຳຂອງເມືອງໃນ 15 ເມືອງອ້ອມຂ້າງ. ພິເສດ ຍັງມີຄະນະພະແນກກະສິກຳ-ປ່າໄມ້ ຈາກແຂວງ ຄຳມ່ວນ, ສາລະວັນ, ຈຳປາສັກ, ເຊກອງ ແລະແຂວງອັດຕະປື ກໍ່ໄດ້ເຂົ້າຮ່ວມໃນພິທີຄັ້ງນີ້ດ້ວຍ.
ກ່ອນອື່ນ ທ່ານຫົວໜ້າຫ້ອງການກະສິກຳ-ປ່າໄມ້ເມືອງໄຊພູທອງ ໃນນາມເມືອງເຈົ້າພາບ ທັງເປັນຜູ້ຫ້າງຫາກະກຽມ ກໍ່ໄດ້ລາຍງານໃຫ້ຮູ້ວ່າ: ໃນວັນທີ 11 ຂອງທຸກໆປີ ແມ່ນວັນສັກສາປ້ອງກັນພະຍາດສັດແຫ່ງຊາດຂອງລາວເຮົາ ດັ່ງນັ້ນ ເມືອງໄຊພູທອງ ຮ່ວມກັບພະແນກກະສິກຳ-ປ່າໄມ້ແຂວງ ຈຶ່ງໄດ້ຈັດພິທີ ປະກວດງົວງາມ ແລະໝາກໂມຫວານຂຶ້ນ ທັງນີ້ເພື່ອປຸກລະດົມຂະບວນການລ້ຽງສັດເປັນສິນຄ້າຂອງປະຊາຊົນ ເວົ້າລວມ, ເວົ້າສະເພາະແມ່ນການສ້າງຈິດສຳນຶກໃຫ້ແກ່ຊາວກະສິກອນ ໃນການຮັກສາພໍ່-ແມ່ໍພັນສັດທີ່ດີ ເພື່ອປັບປຸງພັນ ແລະເພີ່ມນ້ຳໜັກສັດໃຫ້ສູງຂຶ້ນ, ໂດຍການເນັ້ນໜັກໃສ່ຫຼັກວິຊາການ ເຕັກນິກການປ້ອງກັນພະຍາດສັດ ໂດຍໄດ້ມີການສາທິດການຢອດຢາໃຫ້ສັດປີກ, ການສັກຢາປ້ອງກັນພະຍາດ ງົວ-ຄວາຍ ແລະການສາທິດການປະສົມພັນທຽມງົວ, ອັນໄດ້ສ້າງຄວາມສົນໃຈໃຫ້ແກ່ຜູ້ເຂົ້າຮ່ວມຢ່າງຫຼວງຫຼາຍ.
ສຳລັບການແຂ່ງຂັນປະກວດງົວງາມ ແຂວງສະຫວັນນະເຂດ ໄດ້ຈັດຂຶ້ນທຸກໆປີ, ຍ້ອນວ່າ ສັດລ້ຽງປະເພດ ງົວ-ຄວາຍ ຢູ່ແຂວງສະຫວັນນະເຂດ ມີຈຳນວນຫຼາຍກວ່າ 6 ແສນໂຕ, ພິເສດ ຈຳນວນຝູງສັດທີ່ກ່າວສມານີ້ ໄດ້ມີນັກວິຊາການຈາກຂັ້ນສູນກາງ, ຂັ້ນແຂວງ ແລະເມືອງ ຮ່ວມກັນເຮັດປະສົມພັນທຽມ ໃຫ້ງົວແມ່ພັນພື້ນເມືອງຂອງຊາວກະສິກອນໄດ້ແລ້ວ 200 ກວ່າໂຕ, ພ້ອມດຽວກັນນີ້ ກໍ່ຍັງໄດ້ແນະນຳ, ສົ່ງເສີມ ແລະນຳພາຊາວກະສິກອນປູກພືດອາຫານສັດ ໄດ້ຫຼາຍກວ່າ 300 ເຮັກຕາ. ສ່ວນການລ້ຽງສັດແບບມີການຈັດການ, ລ້ຽງແບບເປັນຟາມ ໂດຍສະເພາະແມ່ນຟາມລ້ຽງງົວຂະໜາດນ້ອຍ ຫາຂະໜາດກາງ ປະຈຸບັນນີ້ເລີ່ມເກີດມີໜໍ່ແໜງຂຶ້ນແລ້ວ ຈຳນວນ 5 ເມືອງຄື: ເມືອງສອງຄອນ, ຈຳພອນ, ໄກສອນພົມວິຫານ, ອາດສະພອນ ແລະເມືອງພະລານໄຊ ເຊິ່ງມີຟາມງົວທັງໝົດ 8 ແຫ່ງ, ມີງົວພັນພື້ນເມືອງ ແລະພັນລູກປະສົມ ຈຳນວນຫຼາຍກວ່າ 800 ໂຕ, ໃນນັ້ນ ເດັ່ນກວ່າໝູ່ແມ່ນຟາມຂອງທ້າວ ກິແຫຼ້ງ ບ້ານຫຼັກ 35 ເມືອງຈຳພອນ.
ການປະກວດງົວງາມ ສຳລັບປີ 2014 ໄດ້ມີຜູ້ສົ່ງງົວເຂົ້າປະກວດທັງໝົດ 102 ໂຕ, ໃນນັ້ນ ເປັນງົວພໍ່ພັນພື້ນເມືອງ 75 ໂຕ, ແລະງົວພັນລູກປະສົມ 27 ໂຕ. ຜົນການຕັດສິນຂອງຄະນະກຳມະການ ງົວທີ່ໄດ້ຮັບລາງວັນມີດັ່ງນີ້: ປະເພດງົວລູກປະສົມ ຊະນະເລີດ ໄດ້ແກ່ ງົວໂຕເລັກ ເປັນງົວຂອງ ທ້າວ ກິແຫຼ້ງ ຟາມງົວຫຼັກ 35 ເມືອງຈຳພອນ, ໄດ້ຮັບຂັນລາງວັນ ພ້ອມດ້ວຍເງິນສົດ 2 ລ້ານກີບ, ອັນດັບທີ 2 ໄດ້ແກ່ງົວ ແລັມໂບ້ ເປັນງົວຂອງ ນາງ ສອນສວຍ ບ້ານາພານ ເມືອງໄຊພູທອງ ໄດ້ຮັບຂັນລາງວັນ ແລະເງິນສົດ 1,5 ລ້ານກີບ. ລາງວັນທີ 3 ໄດ້ແກ່ງົວ ຈຳປາທອງ ເປັນງົວຂອງທ້າວ ປ໋ອງ ບ້ານລະຫານ້ຳ ເມືອງສອງຄອນ ໄດ້ຮັບຂັນລາງວັນ ພ້ອມເງິນສົດ 1 ລ້ານກີບ.
ສຳລັບການປະກວດໝາກໂມຫວານ ເຊິ່ງເປັນພືດເສດຖະກິດເປັນສິນຄ້າ ຂອງຊາວແຂວງສະຫວັນນະເຂດ, ປີນີ້ ມີຜູ້ເຂົ້າຮ່ວມສົ່ງໝາກໂມຫວານເຂົ້າປະກວດທັງໝົດ 15 ຄອບຄົວ, ມີໝາກໂມ 1.500 ໜ່ວຍ. ຜົນການຕັດສິນຂອງຄະນະກຳມະການຊະນະເລີດໄດ້ແກ່ ຄອບຄົວທ້າວ ແສງ ບ້ານສົມພັດວິໄລ ເມືອງອຸທຸມພອນ ໄດ້ຮັບລາງວັນເງິນສົດ 2 ລ້ານກີບ, ອັນດັບ 2 ໄດ້ແກ່ ຄອບຄົວ ທ້າວ ວົງຄຳໄຊ ບ້ານໂພສີແກ້ວ ເມືອງໄຊພູທອງ ໄດ້ຮັບລາງວັນເງິນສົດ 1,5 ລ້ານກີບ, ອັນດັບ 3 ໄດ້ແກ່ ຄອບຄົວ ທ້າວ ທອງເພັດ ບ້ານນາແດງ ເມືອງໄຊບູລີ ໄດ້ຮັບລາງວັນເງິນສົດ 1 ລ້ານກີບ.
ໃນການແຂ່ງຂັນຄັ້ງນີ້ ກໍ່ເພື່ອເປັນການກະຕຸກຊຸກຍູ້ໃຫ້ແກ່ຊາວກະສິກອນ ໄດ້ມີຂະບວນການຜະລິດເປັນສິນຄ້າ ໃຫ້ມີການຂະຫຍາຍຕົວ ໄດ້ທັງປະລິມານ ແລະຄຸນະພາບ ເຮັດໃຫ້ການລ້ຽງງົວມີການປັບປຸງພັນ ແລະເພີ່ມນ້ຳໜັກສັດໃຫ້ສູງຂຶ້ນ, ນອກນັ້ນກໍ່ເຮັດໃຫ້ການເລືອກແນວພັນໝາກໂມໂມ ທີ່ມີຮູບຊົງໃຫຍ່, ລົດຊາດຫວານ-ຫອມ ແລະມີໃນນ້ອຍ ເປັນທີ່ຕ້ອງການຂອງຜູ້ບໍລິໂພກທັງພາຍໃນ ແລະຕ່າງແຂວງ ອັນສຳຄັນກໍ່ເພື່ອ ເປັນການຖອດຖອນບົດຮຽນກ່ຽວກັບການລ້ຽງ-ການປູກ ຂອງຊາວກະສິກອນດ້ວຍກັນ.

ຂ່າວແລະຮູບຈາກ: ສະຫວັນພັດທະນາ

ບົດຄວາມຫຼ້າສຸດ

ງົດງາມທີ່ສຸດຈາກທົ່ວໂລກ ຕາດກວາງຊີ ແຂວງຫຼວງພະບາງ ຖືຈັດຢູ່ໃນ 21 ນໍ້າຕົກທີ່ສວຍງາມຈາກທົ່ວໂລກ ປີ 2025

ວາລະສານ ການທ່ອງທ່ຽວຊື່ດັງຂອງໂລກ Travel + Leisure ໄດ້ຈັດອັນດັບ Top 21 Most Beautiful Waterfalls in the World...

ໄທເລີ່ມປະຕິບັດແລ້ວ ທະນາຄານເລີ່ມປາບປາມຂະບວນການບັນຊີມ້າ ຖ້າກວດພົບຄວາມສົງໄສ ຈະອາຍັດບັນຊີທັນທີ

ບັນຊີມ້າແມ່ນບັນຊີທະນາຄານທີ່ຖືກນໍາໃຊ້ໂດຍອາດຊະຍາກອນ ເພື່ອເກັບເງິນ ຫຼື ຟອກເງິນທີ່ໄດ້ມາແບບຜິດກົດໝາຍ ແມ່ນບັນຊີທີ່ຖືກຈ້າງໃຫ້ເປີດ ຫຼື ຖືກລັກຂໍ້ມູນໄປໃຊ້ ເພື່ອເປັນທາງຜ່ານຂອງເງິນທີ່ໄດ້ມາຈາກການກະທຳຜິດກົດໝາຍ ລວມທັງການພະນັນ. ໃນຊ່ວງໜຶ່ງອາທິດທີ່ຜ່ານມາ ທາງທະນາຄານເເຫ່ງປະເທດໄທ ເລີ່ມກວດສອບ ແລະ ລົງມືປະຕິບັດຢ່າງເຂັ້ມງວດ ໃນການອາຍັດບັນຊີມ້າ...

ຄວາມຫວັງໃໝ່ຂອງເນປານ ແຕ່ງຕັ້ງລັດຖະມົນຕີຄົນໃໝ່ ໂດຍຈະປະຕິບັດໜ້າຮັກສາການ 6 ເດືອນ

ພາຍຫຼັງຄວາມວຸ່ນວາຍຂອງເຫດການປະທ້ວງໃນປະເທດເນປານ ເຮັດໃຫ້ອະດີດນາຍຍົກລັດຖະມົນຕີໄດ້ລາອອກ ພ້ອມທັງເດີນທາງອອກນອກປະເທດ ນຳພາໃຫ້ເນປານບໍ່ມີຄົນດຳລົງຕໍາເເໜ່ງນາຍົກລັດຖະມົນຕີໃນໄລຍະໜຶ່ງ. ເຊິ່ງໃນວັນທີ 12 ກັນຍາ 2025 ທີ່ຜ່ານມາ, ໄດ້ມີການປະກາດແຕ່ງຕັ້ງ ທ່ານ ນາງ  ສຸຊີລາ ກາກີ ຂຶ້ນຮັບຕໍາແໜ່ງຮັກສາການນາຍົກລັດຖະມົນຕີ...

ສະຫຼົດ! ຊາຍອາຍຸ 26 ປີ (ເສຍຊີວິດ) ຍ້ອນຂັບລົດຕຳງົວ ທີ່ບ້ານວຽງແກ້ວ ເມືອງຈັນທະບູລີ ນະຄອນຫຼວງວຽງຈັນ

ບັນຫາການປ່ອຍສັດຊະຊາຍ ສ່ຽງເຮັດໃຫ້ຄົນອື່ນເກີດອຸບັດຕິເຫດ ເຖິງຂັ້ນເສຍຊີວິດໄດ້. ບັນຫາການປ່ອຍສັດລ້ຽງ (ງົວ, ຄວາຍ, ແບ້, ມ້າ...) ຍັງຄົງຖືກພົບເຫັນເລື້ອຍໆຢູ່ຫຼາຍໆຂົງເຂດ ຕັ້ງແຕ່ເຂດຊານເມືອງຈົນໄປເຖິງໃນເມືອງ. ຈົນກາຍເປັນຄວາມເຄີຍຊິນໄປແລ້ວສຳລັບຜູ້ສັນຈອນໄປມາທີ່ຕ້ອງລະວັງເອງ ແຕ່ບາງຄັ້ງກໍມີອຸບປະຕິເຫດຕາມມາ ເຊັ່ນ: ລົດໃຫຍ່ຕຳງົວ, ລົດຈັກຕຳງົວ,...