ເຈົ້າໜ້າທີ່ຂອງຢູເຄຣນພົບຂຸມສົບທີ່ຝັງຮ່າງຜູ້ເສຍຊີວິດ ຫຼາຍເຖິງ 440 ສົບ ໃນເມືອງອິຊູມ ທີ່ຢູເຄຣນສາມາດຍຶດຄືນໄດ້ຈາກຣັດເຊຍໃນບໍ່ເທົ່າໃດມື້ກ່ອນໜ້ານີ້ ແລະ ຄາດວ່າຜູ້ຄົນເຫຼົ່ານີ້ໄດ້ເສຍຊີວິດຈາກການ ຖືກລູກປືນໃຫຍ່ຍິງໂຈມຕີ ແລະ ການໂຈມຕີທາງອາກາດ.
ກະຊວງປ້ອງກັນປະເທດຢູເຄຣນ ໄດ້ລາຍງານວ່າ ພົບຂຸມສົບ ເຊິ່ງມີຂະໜາດໃຫຍ່ທີ່ສຸດໃນເມືອງອິຊູມ ພາຍຫຼັງການຍຶດຄືນຈາກຣັດເຊຍ ໂດຍພົບການຝັງຮ່າງຜູ້ເສຍຊີວິດ ທີ່ບໍ່ມີການລະບຸຊື່ໄວ້ ປະມານ 440 ສົບ.
ຫົວໜ້າຕຳຫຼວດສືບສວນ ຂອງເຂດພື້ນທີ່ຄາຄີຟໃນຢູເຄຣນ ກ່າວກັບສະຖານີໂທລະທັດສະກາຍນິວ ຂອງອັງກິດວ່າ ຜູ້ເສຍຊີວິດບາງສ່ວນ ຕາຍຍ້ອນເພາະຖືກລູກປືນໃຫຍ່ຍິງໂຈມຕີ ແລະ ບາງສ່ວນກໍ່ຕາຍຈາກການຖືກໂຈມຕີທາງອາກາດ ຂະນະທີ່ ທ່ານ ເຊເລນສະກີ ປະທານາທິບໍດີຢູເຄຣນ ຫາກໍໄດ້ລົງໄປກວດກາ-ຢ້ຽມຢາມ ເມືອງອິຊູມໃນວັນພຸດທີ່ຜ່ານມານີ້.
ຫຼາຍຮ້ອຍຄົນທີ່ເສຍຊີວິດໃນລະຫວ່າງການຍຶດຄອງຂອງຣັດເຊຍ ໄດ້ຖືກຝັງໄວ້ບ່ອນນີ້ ໂດຍມີການລະບຸໄວ້ຢູ່ເທິງໄມ້ກາງແຂນເທິງຂຸມຝັງສົບ ແທນການຂຽນຊື່ ຊາວເມືອງອິຊູມຢືນຢັນວ່າ ສົບຂອງຜູ້ເສຍຊີວິດທີ່ໄດ້ຖືກຝັງໄວ້ໃນປ່າ ຈະຖືກນຳໄປກວດ DNA ເພື່ອລະບຸຕົວຕົນ.
ແນວໃດກໍ່ຕາມ ຍັງບໍ່ສາມາດກວດສອບຂໍ້ກ່າວຫາຂອງຢູເຄຣນໄດ້ ສ່ວນຣັດເຊຍກໍຍັງບໍ່ທັນໃຫ້ຄວາມເຫັນກ່ຽວກັບການກ່າວຫາດັ່ງກ່າວ ທາງດ້ານນັກຂ່າວຂອງ AP ໄດ້ເດີນທາງໄປທີ່ຂຸມຝັງສົບໃຫຍ່ໃນປ່າໃນວັນພະຫັດວານນີ້ ພົບແຜ່ນຈາລຶກທີ່ສະແດງໃຫ້ເຫັນວ່າ ທະຫານຢູເຄຣນ 17 ຄົນໄດ້ຖືກຝັງຢູ່ ໃນຂະນະທີ່ອ້ອມຮອບຂຸມຝັງສົບຈຳນວນຫຼາຍທີ່ມີແຕ່ໄມ້ກາງແຂນ.