Homeຂ່າວພາຍ​ໃນຍີ່ປຸ່ນຊ່ວຍເຫຼືອເລື່ອງອາຫານທ່ຽງຂອງເດັກນັກຮຽນຊັ້ນປະຖົມໃນ ສປປ ລາວ

ຍີ່ປຸ່ນຊ່ວຍເຫຼືອເລື່ອງອາຫານທ່ຽງຂອງເດັກນັກຮຽນຊັ້ນປະຖົມໃນ ສປປ ລາວ

Published on

ນະຄອນຫຼວງວຽງຈັນ – ທ່ານ ເຄນິຊິ ໂກບາຍາຊິ ເອກອັກຄະລັດຖະທູດຍີ່ປຸ່ນ ໄດ້ມອບຕູ້ຄອນເທນເນີປາກະປ໋ອງຈໍານວນ 32 ຕູ້ໃຫ້ລັດຖະມົນຕີວ່າການກະຊວງສຶກສາທິການ ແລະ ກິລາ ກ່າວຮັບໂດຍທ່ານ ຮສ. ດຣ. ພຸດ ສິມມາລາວົງ ທີ່ສາງອົງການອາຫານໂລກ (WFP) ທີ່ນະຄອນຫຼວງວຽງຈັນ. ນັກຮຽນ 132,450 ຄົນ ໃນ 1,423 ໂຮງຮຽນປະຖົມ ໃນທົ່ວປະເທດຈະໄດ້ ຮັບປະທານອາຫານທ່ຽງ ເພື່ອສຸຂະພາບທີ່ປະກອບໄປດ້ວຍ ປາທູ ແລະ ປາຊາດີນ ຂອງຍີ່ປຸ່ນ ທີ່ບັນຈຸຢູ່ໃນກະປ໋ອງ.

ຍີ່ປຸ່ນບໍ່ພຽງແຕ່ໃຫ້ການສະໜັບສະໜູນອາຫານໃນໂຮງຮຽນເທົ່ານັ້, ແຕ່ຍັງໄດ້ຊ່ວຍເຫຼືອຊຸມຊົນໃຫ້ຟື້ນຕົວຈາກໄພພິບັດເຊັ່ນ: ໄພພິບັດນໍ້າຖ້ວມດ້ວຍການບໍລິຈາກເຂົ້າສານ, ພ້ອມທັງສ້າງຄວາມອາດສາມາດໃນການປັບຕົວຕໍ່ກັບການປ່ຽນແປງທາງທຳມະຊາດໃນໄລຍະຍາວໂດຍຜ່ານການສ້າງທະນາຄານເຂົ້າຊຸມຊົນ ແລະ ພື້ນຖານໂຄງລ່າງອື່ນໆ.

ປາກະປ໋ອງ ຈຳນວນ 402 ໂຕນ ທີ່ໄດ້ຮັບບໍລິຈາກເມື່ອບໍ່ດົນມານີ້ ແມ່ນມີມູນຄ່າປະມານ 3,6 ລ້ານດອລລາສະຫະລັດເຊິ່ງຈະ​ຊ່ວຍ​ໃຫ້​ກະຊວງ​ສຶກສາ​ທິການ ​ແລະ ກິລາ ​ເພີ່ມ​ທະວີ​ການດຳເນີນວຽກງານ​ອາຫານ​ໃນ​ໂຮງຮຽນ​ແຫ່ງ​ຊາດ​ຢູ່ 31 ​ເມືອງ ​ແລະ 8 ​ແຂວງ ​ໂດຍເປັນການຊ່ວຍ​ເພີ່ມ​ງົບປະມານ​ເຂົ້າ​ງົບປະມານ​ຂອງ​ລັດຖະບານ​ສຳລັບ​ວຽກງານນີ້. ໂຄງການອາຫານທ່ຽງໃນໂຮງຮຽນໄດ້ຖືກນໍາສະເໜີຢ່າງເປັນທາງການໃນປີ 2010, ນັບຕັ້ງແຕ່ນັ້ນມາໄດ້ວຽກງານດັ່ງກ່າວໄດ້ຂະຫຍາຍຕົວ ແລະ ພັດທະນາ, ໂດຍໄດ້ຮັບການສະຫນັບສະຫນູນຈາກບັນດາອົງການຊ່ວຍເຫຼືອສາກົນຈໍານວນຫຼາຍເຊັ່ນ: ທະນາຄານໂລກ, ອົງການບັນເທົາທຸກຂອງກາໂຕລິກ ແລະ ອົງການອາຫານໂລກ.

ປະຈຸບັນ ງົບປະມານທີ່ໄດ້ຈາກການຊ່ວຍເຫຼືອຂອງຍີ່ປຸ່ນ ແມ່ນໄດ້ນຳໃຊ້ເຂົ້າໃນການຮັບປະກັນຄວາມຍືນຍົງຂອງໂຄງການ ໂດຍສະໜອງການຝຶກອົບຮົມໃຫ້ແກ່ພະນັກງານລັດຢູ່ທຸກຂັ້ນ, ເຊັ່ນດຽວກັບຊຸມຊົນທ້ອງຖິ່ນເພື່ອຈັດຕັ້ງປະຕິບັດ, ຕິດຕາມໂຄງການໃຫ້ປະສົບຜົນສຳເລັດ ແລະ ເປັນການປະກອບສ່ວນດ້ານແຮງງານ ແລະ ພືດຜົນທາງການກະເສດຂອງຊຸມຊົນ.

“ທ່ານ ຮສ. ດຣ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ ກ່າວວ່າ: ອາຫານໃນໂຮງຮຽນຊ່ວຍເພີ່ມອັດຕາການເຂົ້າໂຮງຮຽນ ແລະ ຊ່ວຍໃຫ້ລູກຂອງພວກເຮົາຢູ່ໃນໂຮງຮຽນໄດ້ດົນຂຶ້ນ. ການລົງທຶນໃນດ້ານໂພຊະນາການ, ສຸຂະພາບ ແລະ ການສຶກສາຂອງເດັກນ້ອຍ ແມ່ນເປັນການຊ່ວຍໃຫ້ພວກເຂົາກາຍເປັນຜູ້ໃຫຍ່ທີ່ມີຄຸນນະພາບ ແລະ ໃນຂະນະດຽວກັນກໍ່ເປັນການຊ່ວຍທຳລາຍວົງຈອນຂອງການຂາດສານອາຫານອີກດ້ວຍ. ປັດຈຸບັນນີ້ ຄອບຄົວ ແລະຊຸມຊົນເລີ່ມເຫັນຜົນປະໂຫຍດຂອງອາຫານເພື່ອສຸຂະພາບຜ່ານວຽກງານອາຫານໃນໂຮງຮຽນຫຼາຍຂຶ້ນ,  ເຊິ່ງເປັນນິມິດໝາຍທີ່ດີ ເພາະມັນຈະເປັນການຊ່ວຍຫຼຸດຜ່ອນຄວາມທຸກຍາກໃນໄລຍະຍາວ”

ທ່ານ ເຄນິຊິ ໂກບາຍາຊິ  ​ເອກ​ອັກຄະ​ລັດຖະທູດ​ຍີ່ປຸ່ນ​ປະຈຳ ສປປ ລາວ ກ່າວວ່າ: ຄວາມໝັ້ນຄົງດ້ານສະບຽງອາຫານແມ່ນມີຄວາມສຳຄັນຢ່າງຕໍ່ເນື່ອງໃນ ສປປ ລາວ. ການປັບປຸງໂພຊະນາການໂດຍສະເພາະເດັກນ້ອຍແມ່ນມີຄວາມສຳຄັນໃນລັກສະນະທີ່ຊ່ວຍຮັບປະກັນສຸຂະພາບຂອງຄົນລຸ້ນໃໝ່ ແລະ ການເຂົ້າເຖິງການສຶກສາຂັ້ນພື້ນຖານ, ເຊິ່ງເປັນບົດບາດທີ່ສຳຄັນໃນການເສີມສ້າງ ແລະ ພັດທະນາຊັບພະຍາກອນມະນຸດຂອງ ສປປ ລາວ. ຍີ່ປຸ່ນ ​ໃນ​ຖານະທີ່​ເປັນ​ຄູ່​ຮ່ວມ​ມື​ຍຸດ​ທະ​ສາດກັບ ສປປ ລາວ, ຈະ​ສືບ​ຕໍ່​ໃຫ້ການ​ສະໜັບສະໜູນ ສປປ ລາວ ​ໃນ​ຂົງ​ເຂດ​ທີ່​ກ່ຽວຂ້ອງ​ເຊັ່ນ: ການ​ຊ່ວຍ​ເຫລືອ​ດ້ານ​ສະບຽງ​ອາຫານ, ດ້ານກະສິກຳ ​ແລະ ການ​ສຶກສາ, ​ໂດຍ​ການ​ຮ່ວມ​ມື​ກັບ​ອົງການ​ສາກົນ​ຕ່າງໆເຊັ່ນ: ​ໂຄງການ​ອາຫານ​ໂລກເປັນຕົ້ນ.

ພິທີມອບ-ຮັບຄັ້ງນີ້ ໄດ້ມີການເປັນສັກຂີພິຍານຂອງຄະນະຜູ້ແທນລັດຖະບານຈາກປະເທດຍີ່ປຸ່ນ ທີ່ເດີນທາງມາຢ້ຽມຢາມ ສປປ ລາວ ໂດຍ ທ່ານ ມາຊາຮີໂຣ່ ໂກມູຣະ, ອະດີດຮອງລັດຖະມົນຕີກະຊວງການເງິນ ແລະ ສະມາຊິກສະຫະພັນລັດຖະສະພາ. ຄະນະຜູ້ແທນໄດ້ມີໂອກາດລົງໄປຢ້ຽມຢາມວຽກງານອາຫານໃນໂຮງຮຽນ ແລະ ກິດຈະກຳອື່ນໆທີ່ກ່ຽວຂ້ອງຢູ່ແຂວງສາລະວັນ, ເພື່ອເປັນສັກຂີພິຍານວ່າ ໂຮງຮຽນສາມາດກາຍເປັນສູນກາງຂອງການພັດທະນາຊຸມຊົນໄດ້ແນວໃດ ຜ່ານການຊ່ວຍເຫຼືອ ແລະ ຈັດຕັ້ງປະຕິບັດວຽກງານອາຫານໃນໂຮງຮຽນ ແລະ ພື້ນຖານໂຄງລ່າງອື່ນໆ.

ທ່ານ ຢານ ເດວບາເຣີ, ຜູ້ອໍານວຍການ ແລະ ຜູ້ຕາງຫນ້າຂອງ ອົງການອາຫານໂລກ ປະຈໍາສປປລາວ ກ່າວວ່າ “ພວກເຮົາກໍ່ຄືອົງການອາຫານໂລກໄດ້ອຸທິດ ແລະ ພະຍາຍາມສຸດຄວາມສາມາດໃນການພັດທະນາໂຮງຮຽນໃນທົ່ວ ສປປ ລາວ ເພື່ອປັບປຸງສຸຂະພາບ ແລະ ເສີມສ້າງດ້ານໂພຊະນາການຂອງເດັກນ້ອຍ. ນອກຈາກອັດຕາການເຂົ້າຮຽນເພີ່ມຂຶ້ນ, ການເຂົ້າຮຽນ ແລະ ຜົນການຮຽນທີ່ດີຂຶ້ນຂອງເດັກນ້ອຍ, ພວກເຮົາຍັງເຊື່ອໃນຜົນປະໂຫຍດຂອງວຽກງານອາຫານໃນໂຮງຮຽນທີ່ຈະເປັນທ່າແຮງໜຶ່ງຂອງຊຸມຊົນທີ່ຈະ ຊ່ວຍເຫຼືອພວກເຂົາອອກຈາກຄວາມທຸກຍາກໂດຍການສ້າງໂອກາດ ແລະ ລາຍຮັບໃຫ້ແກ່ຊຸມຊົນ. ດ້ວຍ​ການ​ສະໜັບສະໜູນ​ຈາກ​ລັດຖະບານ​ຍີ່ປຸ່ນ ​ແລະ ການ​ຮ່ວມ​ມື​ທີ່​ມີ​ມາ​ແຕ່​ດົນ​ນານ​ກັບ​ກະຊວງ​ສຶກສາ​ທິການ ​ແລະ ກິລາ, ຂ້າພະເຈົ້າເຊື່ອວ່າພວກ​ເຮົາ​ຈະສາມາດ​ບັນລຸເປົ້າໝາຍເທື່ອລະບາດກ້າວໄປພ້ອມໆກັນ ​”

ບົດຄວາມຫຼ້າສຸດ

ນາຍົກລັດຖະມົນຕີລາວ ພົບປະກັບ ປະທານສະພາແຫ່ງຊາດຫວຽດນາມ ໃນໂອກາດເດີນທາງຢ້ຽມຢາມ ສສ ຫວຽດນາມ ແລະ ເຂົ້າຮ່ວມກອງປະຊຸມເວທີອະນາຄົດອາຊຽນ ຄັ້ງທີ 3

ໃນຕອນບ່າຍວັນທີ 8 ມິຖຸນາ 2026, ທີ່ ນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ...

ແຈ້ງການມອດໄຟຟ້າຊົ່ວຄາວ ລັດວິສາຫະກິດໄຟຟ້າລາວ ນວ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ ເລີ່ມແຕ່ວັນທີ 9-14 ມິຖຸນາ 2026

​ລັດວິສາຫະກິດໄຟຟ້າລາວ (EDL) ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ (ມອດໄຟ) ເພື່ອປັບປຸງ, ສ້ອມແປງລະບົບຕາໜ່າງໄຟຟ້າ ແລະ ຕິດຕັ້ງເສົາໄຟຟ້າໃໝ່ ໃຫ້ມີຄວາມປອດໄພ ແລະ ກຽມພ້ອມຮອງຮັບການຊົມໃຊ້ທີ່ດີຂຶ້ນ....

ກຽມໄປແຂ່ງຕໍ່ທີ່ຍີ່ປຸ່ນ MAZDA GB FC U12 ຄວ້າແຊ້ມ ບານເຕະເຍົາວະຊົນທີ່ອິນໂດເນເຊຍ ພ້ອມໄດ້ໄປແຂ່ງຕໍ່ຮອບສຸດທ້າຍທີ່ປະເທດຍີ່ປຸ່ນ

ເກັ່ງຫຼາຍ MAZDA GB FC ຢູ 12 ຄວ້າແຊ້ມບານເຕະເຍົາວະຊົນ ທີ່ອິນໂດເນເຊຍ ພ້ອມໄດ້ສິດບິນລັດຟ້າໄປແຂ່ງຂັນທີ່ປະເທດຍີ່ປຸ່ນ. ນ້ອງໆເຍົາວະຊົນຈາກສະໂມສອນ Mazda Laos GB FC ໂຊຊຟອງເກັ່ງຄວ້າແຊ້ມລາຍການແຂ່ງຂັນບານເຕະເຍົາວະຊົນລະດັບພາກພື້ນ...

ນາຍົກລັດຖະມົນຕີລາວ ສົ່ງຈົດໝາຍເຖິງນາຍົກລັດຖະມົນຕີໄທ ເພື່ອສະແດງຄວາມຂອບໃຈຕໍ່ການຊ່ວຍເຫຼືອຄົ້ນຫາ ແລະ ກອບກູ້ເອົາຊິວິດປະຊາຊົນທີ່ຕິດຄ້າງຢູ່ໃນຖໍ້າ

ວັນທີ 7 ມິຖຸນາ 2026 ທີ່ນະຄອນຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີລາວ ໄດ້ສົ່ງຈົດໝາຍຂອບໃຈເຖິງທ່ານ ອະນຸທິນ ຊານວີຣະກູນ, ນາຍົກລັດຖະມົນຕີ ແຫ່ງ...