ເຮືອບັນທຸກເຮືອບິນ ວິກຣານ (Vikrant) ເປັນເຮືອທີ່ອິນເດຍຜະລິດເອງເປັນລຳທຳອິດ ຖືກສົ່ງອອກໄປປະຈຳການໃນວັນ ສຸກ ທີ 2 ກັນຍາ ທີ່ຜ່ານມານີ້ ໃນຄວາມພະຍາຍາມຂອງລັດຖະບານນິວເດລີ ທີ່ຈະເສີມອຳນາດກອງທັບເຮືອຂະໜາດໃຫຍ່ຂອງ ຈີນ ລວມໄປເຖິງຍົກລະດັບອຸດສາຫະກຳຕໍ່ເຮືອ.
ໄອເອັນເອສ “ວິກຣານ” ເຊິ່ງມາຈາກພາສາສັນສະກິດ ແປວ່າ “ມີພະລັງ” ຫຼື “ແຮງກ້າ” ເປັນເຮືອບັນທຸກເຮືອບິນລຳທີ 2 ທີ່ສົ່ງປະຈຳການໃນກອງທັບອິນເດຍ ຕາມຫຼັງຈາກເຮືອ ໄອເອສເອັນ ວິກຣາມາດິຢາ (INS Vikramaditya) ເຊິ່ງເປັນເຮືອບັນທຸກເຮືອບິນຍຸກໂຊຫວຽດ ທີ່ອິນເດຍຊື້ມາຕໍ່ຈາກຣັດເຊຍໃນປີ 2004 ເພື່ອໃຊ້ສຳລັບລາດຕະເວນເພື່ອປ້ອງກັນນ່ານນ້ຳແຖບມະຫາສະໝຸດອິນເດຍ ແລະ ອ່າງເບັງກໍ.
ທ່ານນາຍົກລັດຖະມົນຕີ ນະເຣນທຣາ ໂມດີ ເປັນປະທານໃນພິທີເພື່ອສົ່ງເຮືອ ວິກຣານ ປະຈຳການ ເຊິ່ງກົງກັບຊ່ວງຄົບຮອບ 75 ປີ ທີ່ອິນເດຍໄດ້ຮັບເອກະລາດຈາກອັງກິດ, ທ່ານໄດ້ເນັ້ນຍ້ຳວ່າ ເຮືອບັນທຸກເຮືອບິນລຳໃໝ່ນີ້ ນອກຈາກຈະເພີ່ມທະວີຄວາມເຂັ້ມແຂງໃນການປ້ອງກັນແນວທະເລໃຫ້ກັບອິນເດຍແລ້ວ ຍັງສະແດງໃຫ້ເຫັນວ່າ ອິນເດຍໄດ້ກ້າວມາເປັນໜຶ່ງໃນປະເທດທີ່ມີທ່າແຮງການຜະລິດເຮືອບັນທຸກເຮືອບິນສໍາລັບການນໍາໃຊ້ເອງ.
ເຮືອ ວິກຣານ (Vikrant) ຍາວ 262 ແມັດ ຖືກອອກແບບໂດຍ ກອງທັບເຮືອອິນເດຍ ແລະ ຜະລິດຂຶ້ນທີ່ ອູ່ເຮືອໂຄຊິນ (Cochin) ທາງຕອນໃຕ້ຂອງປະເທດ ເຊິ່ງເປັນເຮືອຮົບທີ່ໃຫຍ່ທີ່ສຸດທີ່ອິນເດຍເຄີຍສ້າງມາ ໂດຍສາມາດບັນທຸກລູກເຮືອໄດ້ 1.600 ລວມເຖິງເຮືອບິນ ແລະ ເຮລິຄັອບເຕີອີກ 30 ລຳ.
ໂດຍເຮືອລຳນີ້ ໄດ້ສຳເລັດຊ້າໄປ 6 ປີ ສົ່ງຜົນໃຫ້ຕົ້ນທຶນໃນການຜະລິດເພີ່ມຂຶ້ນເປັນ 6 ເທົ່າ ໂດຍປະມານ 2.500 ລ້ານໂດລາສະຫະລັດໃນປັດຈຸບັນ.
ທັ້ງນີ້ ກອງທັບອິນເດຍກຽມການທົດລອງນຳຝູງບິນຂັບໄລ່ MiG-29K ຂຶ້ນ ແລະ ຈອດເທິງເຮືອ ວິກຣານ ແລະ ຄາດວ່າເຮືອບັນທຸກເຮືອບິນລຳນີ້ ຈະສາມາດປະຕິບັດການໃນທ້າຍປີ 2023.
ນອກຈາກນີ້ ອິນເດຍຍັງມີແຜນທີ່ຈະນຳເຮືອບິນຮົບຫຼາຍລຸ່ນເຂົ້າໄປປະຈຳການ ເທິງເຮືອຮົບ ວິກຣານ ໃນຈຳນວນນີ້ລວມເຖິງເຮືອບິນຂັບໄລ່ Rafale-M ແລະ F/A-18 Block III Super Hornet.
ແຫຼ່ງຂ່າວຈາກ AP