ມີຄົນເສຍຊີວິດແລ້ວ 15 ຄົນ ຈາກການປະທະລະຫວ່າງ ກອງກຳລັງຄວາມໝັ້ນຄົງ ກັບ ກຸ່ມຜູ້ສະໜັບສະໜູນ ມຸກຕາດາ ອັລ-ຊາດ ນັກບວດນິກາຍຊີອະ ທີ່ທຳນຽບລັດຖະບານໃນກຸງ ແບກແດດ ຂອງອີຣັກ.
ເຈົ້າໜ້າທີ່ກ່າວວ່າ: ມີຜູ້ໄດ້ຮັບບາດເຈັບຫຼາຍສິບຄົນ ຫຼັງຈາກຜູ້ປະທ້ວງທີ່ສະໜັບສະໜູນ ມຸກຕາດາ ອັລ-ຊາດ ນັກບວດນິກາຍຊີອະ ແລະ ນັກການເມືອງຊື່ດັງຂອງອີຣັກ ເຊິ່ງມີຈຸດຢືນຕໍ່ຕ້ານຕະເວັນຕົກ ຜູ້ປະທ້ວງໄດ້ບຸກລ້ອມທຳນຽບປະທານາທິບໍດີໃນກຸງແບກແດດ ຫຼັງຈາກທີ່ ມຸກຕາດາ ອັລ-ຊາດ ປະກາດຢຸດບົດບາດທາງການເມືອງ ເຊິ່ງເຮັດໃຫ້ຖະໜົນຫຼາຍສາຍເຕັມໄປດ້ວຍລົດກະບະທີ່ຂົນມືປືນ ແລະ ເຄື່ອງຍິງປືນ.
ມຸກຕາດາ ອັລ-ຊາດ ແມ່ນຜູ້ນຳພັນທະມິດເພື່ອການປະຕິວັດ ປະກາດຢຸດຕິບົດບາດທາງການເມືອງໃນວັນຈັນທີ່ຜ່ານມາ ໂດຍໃຫ້ເຫດຜົນກ່ຽວກັບ ຄວາມລົ້ມເຫຼວຂອງຝ່າຍຊີອະ ໂດຍລາວຈະປະທ້ວງດ້ວຍການອົດອາຫານຈົນກວ່າຄວາມຮຸນແຮງຈະຢຸດລົງ.
ຫຼັງຈາກເຫດການນີ້ໄດ້ເກີດຂຶ້ນ ອີຣານ ໄດ້ປະກາດປິດຊາຍແດນທີ່ຕິດຈອດກັບອີຣັກ, ໃນດ້ານຂອງແພດກ່າວວ່າ ຝ່າຍຜູ້ສະໜັບສະໜູນ ມຸກຕາດາ ອັລ-ຊາດ 15 ຄົນ ຖືກຍິງເສຍຊີວິດ ແລະ ມີຜູ້ປະທ້ວງອີກ 350 ຄົນໄດ້ຮັບບາດເຈັບ.
ແຫຼ່ງຂ່າວຈາກ ຣອຍເຕີ