ຈາກສະພາບປະຈຸບັນ ທາງຫຼວງແຫ່ງຊາດແຕ່ລະເສັ້ນແມ່ນໄດ້ເກີດ ການເປ່ເພຫຼາຍເປັນຕົ້ນໜ້າທາງແຕກ, ບວມ
ເປັນຂຸມ ຊຶ່ງເຮັດໃຫ້ການສັນຈອນໄປ-ມາພົບຄວາມຫຍຸ້ງຍາກ ສະນັ້ນ ເພື່ອຮັບປະກັນຄວາມຄ່ອງຕົວຂອງການນຳ
ໃຊ້ເສັ້ນທາງ ທັງເປັນການຢືດອາຍຸການນຳໃຊ້ອອກໄປອີກ ລັດຈິ່ງເປີດຊອງປະມູນໃຫ້ພາກເອກະຊົນເຂົ້າບູລະນະຮັກ
ສາທາງຫຼວງແຫ່ງຊາດ.
ພິທີເປີດຊອງປະມູນໂຄງການບູລະນະຮັກສາທາງຫຼວງແຫ່ງຊາດຈັດຂຶ້ນ ໃນມື້ວານນີ້ ໂດຍການເຂົ້າຮ່ວມຂອງ ທ່ານ
ເລົາຄຳ ສົມເພັດຊ໌ ຫົວໜ້າກົມຂົວທາງ ກະຊວງໂຍທາທິການ ແລະ ຂົນສົ່ງ, ມີບັນດາຫົວໜ້າພະແນກແຜນການ
ແລະ ການລົງທຶນແຕ່ລະແຂວງ ພ້ອມດ້ວຍບໍລິສັດທີ່ມາປະມູນເຂົ້າຮ່ວມ.
ໂດຍໂຄງການບູລະນະຮັກສາທາງຫຼວງແຫ່ງຊາດຄັ້ງນີ້ ມີທັງໝົດ 4 ເຂດ ແລະ ແຕ່ລະເຂດມີຫ້ອງການປະຈຳຢູ່ ເຊັ່ນ:
ເຂດ 1 ປະກອບມີ 4 ແຂວງຄື: ແຂວງຜົ້ງສາລີ, ອຸດົມໄຊ, ຫຼວງນ້ຳທາ ແລະ ແຂວງບໍ່ແກ້ວ ຫ້ອງການແມ່ນຕັ້ງຢູ່
ແຂວງອຸດົມໄຊ, ເຂດ 2 ມີ 4 ແຂວງ ຄືແຂວງຫົວພັນ, ຊຽງຂວາງ, ຫຼວງພະບາງ ແລະ ແຂວງໄຊຍະບູລີ ຫ້ອງການ
ແມ່ນຕັ້ງຢູ່ແຂວງຊຽງຂວາງ, ສະເພາະເຂດ 3 ມີ 5 ແຂວງປະກອບ ດ້ວຍນະຄອນຫຼວງວຽງຈັນ, ວຽງຈັນ, ໄຊສົມບູນ,
ບໍລິຄຳໄຊ ແລະ ແຂວງຄຳມ່ວນ ຫ້ອງການຕັ້ງຢູ່ກົມຂົວທາງກະຊວງ ຍທຂ ແລະ ເຂດ 4 ປະກອບດ້ວຍແຂວງສະ
ຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື ຕັ້ງຫ້ອງການຢູ່ແຂວງ ຈຳປາສັກ.
ສະເພາະໂຄງການບູລະນະຮັກສາທາງຫຼວງເຂດ 3 ໃນນາມວິສະວະກອນ ໂຄງການໂດຍຕາງໜ້າກົມຂົວທາງ (ເຈົ້າ
ຂອງໂຄງການ) ຊຶ່ງໄດ້ຮັບອະນຸມັດງົບປະມານຈາກກອງທຶນທາງ ເພື່ອມາປະຕິບັດວຽກງານບູລະນະຮັກສາທາງຫຼວງ
ປະຈຳສົກປີ 2014-2015 ສຳລັບແຜນວຽກທີ່ຈະປະຕິບັດໃນສົກນີ້ ໂດຍໄດ້ຮັບແຮງສະໜັບສະໜູນຊຸກຍູ້ຈາກຂັ້ນເທິງ
ເຮັດໃຫ້ແຜນການປະຕິບັດວຽກໃນສົກນີ້ໄດ້ຖືກຈັດຕັ້ງປະຕິບັດໄວຂຶ້ນ ແລະ ທ່ວງທັນກັບລະດູການ.
ການກຳນົດເປີດຊອງປະມູນໃນເທື່ອນີ້ ແລະ ເຊັນສັນຍາເລີ່ມວຽກຕົ້ນເດືອນທັນວາ 2014 ນີ້ ທຸກໂຄງການຕ້ອງສຳ
ເລັດພາຍໃນ 5 ເດືອນ ຫຼື ຕ້ອງສຳເລັດກ່ອນລະດູຝົນ.
ໂຄງການບູລະນະຮັກສາທາງຫຼວງແຫ່ງຊາດເຂດ 3 ຕາມແຜນປະຈຳສົກນີ້ ມີ 31 ສັນຍາຄວາມຍາວທັງໝົດ 909,2
ກິໂລແມັດ ກວມເອົາ 5 ແຂວງຄື ນະຄອນຫຼວງວຽງຈັນ, ແຂວງວຽງຈັນ, ໄຊສົມບູນ, ບໍລິຄຳໄຊ ແລະ ແຂວງຄຳມ່ວນ
ມູນຄ່າການປະເມີນເບື້ອງຕົ້ນປະມານ 150 ຕື້ກວ່າກີບ ໜ້າວຽກຕົ້ນຕໍຂອງໂຄງການແມ່ນສຸມໃສ່ການປັບປຸງໂຄງ
ສ້າງທາງ ບັນດາຈດທີ່ເປ່ເພເສຍຫາຍ ເປັນຕົ້ນແມ່ນໜ້າທາງແຕກ, ບວມຕ້ອງໄດ້ຂູດຮື້ ແລະ ປູຢາງ 2 ຊັ້ນຄືນໃໝ່
ຕາມແຕ່ລະຈຸດທີ່ເປ່ເພຕົວຈິງ ເປັນຊ່ວງຍາວ ຫຼື ສັ້ນ ເພື່ອຮັບປະກັນຕໍ່ການສັນຈອນຂອງພາຫະນະໃຫ້ຄ່ອງຕົວ
ແລະ ທັງເປັນການຢືດອາຍຸການນຳໃຊ້ອອກໄປອີກ ຊຶ່ງຈະເປັນການປະຢັດງົບປະມານໄດ້ເປັນຢ່າງດີ ກົງກັນຂ້າມຖ້າ
ປະໃຫ້ເປ່ເພໜັກກວ່ານີ້ຈະຕ້ອງໄດ້ກໍ່ສ້າງໃໝ່ ແລະ ໃຊ້ງົບປະມານຢ່າງຫຼວງຫຼາຍ.
ຮູບແບບການປະມູນໂຄງການບູລະນະຮັກສາທາງຫຼວງປະຈຳເຂດໄດ້ພ້ອມກັນ ຈັດຕັ້ງປະຕິບັດຢ່າງເຄັ່ງຄັດ ໂດຍໄດ້
ດຳເນີນການຈັດຊື້-ຈັດຈ້າງຕາມດຳລັດ ເລກທີ 03/ນຍ ລົງວັນທີ 9 ມັງກອນ 2004 ວ່າດ້ວຍການປະມູນຈັດຊື້ສິນຄ້າ,
ການກໍ່ສ້າງສ້ອມແປງ ແລະ ການບໍລິການດ້ວຍທຶນຂອງລັດ ແລະ ດຳລັດເລກ ທີ 328/ລບ ລົງວັນທີ 17 ກັນຍາ 2014
ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ສົກປີ 2014-2015.
ແຫລ່ງຂ່າວ: ເສດຖະກິດ – ສັງຄົມ