ອີລອນມາສ (Elon Musk) ມະຫາເສດຖີເຈົ້າຂອງແບນລົດໄຟຟ້າ (Tesla) ທີ່ຫາກໍໄດ້ຊື້ ທະວິດເຕີ້ (twitter) ເມື່ອບໍ່ດົນມານີ້. ປະກາດຜ່ານ twitter ຈົນກາຍເປັນປະເດັນເຮັດໃຫ້ຜູ້ຄົນທົ່ວໂລກໃຫ້ຄວາມສົນໃຈຫຼາຍໃນເຊົ້າມື້ນີ້ ໂດຍການບອກວ່າຈະເຂົ້າຍຶດເອົາ ແມນເຊັສເຕີ ຢູໄນເຕັດ ຈາກຄອບຄົວ ຕະກູນ ເກັວເຊີ.
ໃນວັນທີ 29 ເມສາ ທີ່ຜ່ານມາຫຼັງຈາກຄະນະກຳມະການບໍລິຫານອິດສະຫຼະຂອງບໍລິສັດ ທະວິດເຕີ້ ອອກຖະແຫຼງການຕົກລົງຂາຍບໍລິສັດໃຫ້ແກ່ ອີລອນມາສ ຊິອີໂອຂອງບໍລິສັດເທສລາ ແລະ ສະເປສເອັກ ພາຍໃຕ້ຂໍ້ຕົກລົງມູນຄ່າ 4.4 ໝີ່ນລ້ານໂດລາ.
ສຳລັບສາວົກແມນຢູ ຕາງກໍຢາກໃຫ້ ອີລອນມາສ ເຂົ້າຊື້ກິດຈະການຂອງທີມແມນຢູ ໂດຍບອກວ່າ: ” ຕອນນີ້ສະໂມສອນຊັ້ນນຳກຳລັງຢູ່ໃນຊ່ວງຫຍຸ້ງຍາກລຳບາກ ເພາະເຈົ້າຂອງປັດຈຸບັນເປັນຄົນສໍ້ໂກງ ແລະ ກຳລັງທຳລາຍສະໂມສອນເຕະບານທີ່ຍິ່ງໃຫຍ່ແຫ່ງນີ້”
ຢ່າງໃດກໍຕາມ, ການທະວິດເຕີ້ໃນຄັ້ງນີ້ຍັງບໍ່ເປັນທີ່ຊັດເຈນວ່າ ມີຄວາມຈິງຈັງ ຫຼື ໜ້າເຊື່ອຖືໄດ້ຫຼາຍປານໃດ ເພາະອາດຈະເປັນການທະວິດ ເພື່ອເພີ່ມມູນຄ່າໃນການປັ່ນຫຸ້ນ.