ນາງ ຢາງ ຫຸ່ຍຢຽນ (Yang Huiyan) ບໍ່ແມ່ນຜູ້ຍິງທີ່ລວຍທີ່ສຸດໃນອາຊີແລ້ວ ເນື່ອງຈາກປະເຊີນກັບວິກິດ ດ້ານອະສັງຫາລິມະຊັບຂອງຈີນ ທີ່ສົ່ງຜົນກະທົບຕໍ່ການພັດທະນາຂອງປະເທດລວມເຖິງ ບໍລິສັດ Country Garden Holdings ຂອງລາວ.
ອ້າງອີງຈາກສະຖິຕິຂອງ Bloomberg Billionaires Index ລາຍງານວ່າ: ໃນວັນສຸກ ທີ 29 ກໍລະກົດ 2022 ນາງ ຢາງ ຫຸ່ຍຢຽນ ໄດ້ຖືກແຊງໜ້າໂດຍນາງ ຊາວິທຣິ ເຈັນໂດ (Savitri Jindal) ຄົນອິນເດຍ ເຊິ່ງລາວມີຊັບສິນທັງໝົດ 11,3 ຕື້ໂດລາ ທີ່ມາຈາກບໍລິສັດຂອງລາວ Jindal Group ເປັນບໍລິສັດທີ່ກ່ຽວກັບອຸດສາຫະກຳຕ່າງໆ ລວມເຖິງໂລຫະ ແລະ ການຜະລິດໄຟຟ້າ. ນອກຈາກນີ້ ນາງ ຢາງ ຍັງຕົກລົງມາຕ່ຳກວ່າ ນາງ ຟ່ານ ຫົງເຫວີ່ຍ (Fan Hongwei) ມະຫາເສດຖີຄົນຈີນ ຈາກບໍລິສັດ Hengli Petrochemical ທີ່ຜະລິດເສັ້ນໄຍສານເຄມີ.
ກ່ອນໜ້ານີ້ໃນປີ 2005 ນາງ ຢາງ ໄດ້ສືບທອດຫຸ້ນສ່ວນຂອງພໍ່ຂອງລາວ ໃນການພັດທະນາອະສັງຫາລິມະຊັບ ແລະ ໄດ້ກາຍເປັນອັນດັບໜຶ່ງ ໃນເສດຖີທີ່ໜຸ່ມທີ່ສຸດໃນໂລກ. ໃນໄລຍະ 5 ປີທີ່ຜ່ານມາ, ລາວໄດ້ກາຍເປັນຜູ້ຍິງທີ່ລວຍທີ່ສຸດຂອງອາຊີ ເຊິ່ງສະທ້ອນເຖິງການເຕີບໂຕຢ່າງວ່ອງໄວຂອງຂະແໜງຊັບສິນຂອງຈີນ.
ນາງ ຊາວິທຣິ ເຈັນໂດ (Savitri Jindal) ອາຍຸ 72 ປີ ຕິດອັນດັບ 10 ຄົນທີ່ລວຍທີ່ສຸດໃນປະເທດອິນເດຍ, ລາວໄດ້ເປັນປະທານຂອງ Jindal Group ຫຼັງຈາກສາມີຂອງລາວ ຜູ້ກໍ່ຕັ້ງ OP Jindal ໄດ້ເສຍຊີວິດໃນອຸປະຕິເຫດເຮືອບິນເຮລິຄອບເຕີຕົກໃນປີ 2005, ບໍລິສັດຜະລິດເຫຼັກ ແລະ ຊີມັງ, ພະລັງງານ ແລະ ໂຄງສ້າງພື້ນຖານ.
ມີຜູ້ຍິງ 68 ຄົນ ທີ່ຢູ່ໃນການຈັດອັນດັບຂອງ 500 ຄົນທີ່ລວຍທີ່ສຸດໃນໂລກຂອງ Bloomberg.