ນາຍົກລັດຖະມົນຕີແອັດສະປາຍ (Spain) ກ່າວວ່າມີຜູ້ເສຍຊີວິດແລ້ວ 500 ຄົນ ເນື່ອງຈາກຄື້ນຄວາມຮ້ອນໃນຊ່ວງໄລຍະ 10 ມື້ ພ້ອມຍັງເຕືອນໃຫ້ປະຊາຊົນເພື່ອຄວາມລະມັດລະວັງ.
ຈາກການລາຍງານຂອງສຳນັກຂ່າວ ອັລຈາຊີລາ ໄດ້ລາຍງານວ່າ: ໃນວັນພຸດ ທີ່ 20 ກໍລະກົດ 2022 ທີ່ຜ່ານມາ ນາຍົກລັດຖະມົນຕີຂອງແອັດສະປາຍ ທ່ານ ເປໂດ ຊານເຊ ໄດ້ລາຍງານວິກິດຄື້ນຄວາມຮ້ອນທີ່ໄດ້ປົກຄຸມໄປທົ່ວປະເທດໃນຕອນນີ້ ເຮັດໃຫ້ມີຄົນເສຍຊີວິດຫຼາຍກວ່າ 500 ຄົນ ພາຍໃນເວລາ 10 ມື້ ຖືວ່າເປັນສະຖິຕິສູງທີ່ສຸດທີ່ເຄີຍເຈິມາ.
ຂໍ້ມູນດັ່ງກ່າວ ໄດ້ຮັບການເປີດເຜີຍໂດຍສະຖາບັນສຸຂະພາບ ຄາລອສ ທີ່ 3 ເຊິ່ງປະເມີນຈຳນວນຜູ້ເສຍຊີວິດດ້ວຍສາເຫດທີ່ກ່ຽວຂ້ອງກັບຄື້ນຄວາມຮ້ອນ, ໃນຕົວເລກນີ້ ເປັນຕົວເລກທີ່ປະເມີນທາງສະຖິຕິ ບໍ່ແມ່ນຈຳນວນຜູ້ເສຍຊີວິດຢ່າງເປັນທາງການ.
ທັ້ງນີ້ ແອັດສະປາຍເປັນໜຶ່ງໃນປະເທດຂອງເອີຣົບມີ່ກຳລັງປະເຊີນກັບຄວາມຮ້ອນຢ່າງໜັກໜ່ວງ ເຊິ່ງໃນບາງພື້ນທີ່ເພີ່ມຂື້ນສູງເຖິງ 45 ອົງສາ ແລະ ສົ່ງຜົນໃຫ້ເກີດໄຟໄໝ້ປ່າຫຼາຍບ່ອນ ຈົນຕ້ອງໃຫ້ປະຊາຊົນອົບພະຍົບອອກຫຼາຍພັນຄົນ ແລະ ເຮັດໃຫ້ມີເຈົ້າໜ້າທີ່ ທີ່ເຂົ້າໄປດັບໄຟເສຍຊີວິດ 2 ຄົນ.
