ປະທານາທິບໍດີ ໂກຕາບາຢາ ຣາສປັກສາ ຂອງສີລັງກາ ເດີນທາງອອກນອກປະເທດດ້ວຍເຮືອບິນຂອງກອງທັບ ເປັນທີ່ຮຽບຮ້ອຍ, ຫຼັງຈາກທີ່ພະຍາຍາມອອກໃນຫຼາຍເທື່ອແລ້ວກ່ອນໜ້ານີ້.
ຈາກຂ່າວທາງການຂອງສີລັງກາ ໄດ້ລາຍງານວ່າ: ໂກຕາບາຢາ ຣາສປັກສາ ປະທານາທິບໍດີຂອງສີລັງກາ ແລະ ພັນລະຍາຂອງລາວ ລວມເຖິງ ບາຊິນ ຣາສປັກສາ ນ້ອງຊາຍຂອງລາວ ທີ່ເປັນອະດີດລັດຖະມົນຕີກະຊວງການເງິນ ໄດ້ເດີນທາງອອກຈາກສີລັງກາແລ້ວ ດ້ວຍເຮືອບິນເຈັດຂອງກອງທັບອາກາດສີລັງກາ ໃນຊ່ວງກາງເດິກຂອງຄືນວັນທີ 12 ກໍລະກົດນີ້ ຫຼັງຈາກທີ່ຄວາມພະຍາຍາມທີ່ຈະເດີນທາງອອກນອກປະເທດຫຼາຍເທື່ອແລ້ວ ແຕ່ບໍ່ປະສົບຜົນສຳເລັດ, ລວມເຖິງຄວາມພະຍາຍາມໃນວັນອັງຄານທີ່ຜ່ານມານີ້ ທີ່ຖືກເຈົ້າໜ້າທີ່ກວດຄົນເຂົ້າເມືອງບໍ່ໃຫ້ລາວ ແລະ ຄອບຄົວເຂົ້າໄປໃນຫ້ອງຮັບແຂກພິເສດ ເພື່ອໄປຈ້ຳກາໜັງສືເດີນທາງ.
ລາຍງານລ່າສຸດລະບຸວ່າ ປະທານາທິບໍດີ ໄດ້ເດີນທາງໄປຮອດກຸງມາເລ ເມືອງຫຼວງຂອງເມົາດີຟແລ້ວ ໃນເວລາ 3 ໂມງ ຕາມເວລາທ້ອງຖິ່ນ ຫຼື ກົງກັບ 5 ໂມງຂອງລາວ ໃນເຊົ້າຂອງວັນທີ 13 ກໍລະກົດນີ້, ສ່ວນນ້ອງຊາຍຂອງລາວ ໄດ້ຖືສັນຊາດອາເມຣິກາ ແລ້ວໜ້າຈະເດີນທາງໄປອາເມຣິກາ.
ການເດີນທາງອອກປະເທດໃນເທື່ອນີ້ ເປັນການຢຸດຕິການປົກຄອງປະເທດຂອງຕະກູນ ຣາສປັກສາ ທີ່ດຳເນີນມາຫຼາຍສິບປີ, ໂດຍໃນຊ່ວງຫຼາຍມື້ທີ່ຜ່ານມານີ້ ປະທານາທິບໍດີ ແລະ ຄອບຄົວ ໄດ້ໜີອອກຈາກທຳນຽບ ແລ້ວໄດ້ໄປລີ້ພັກຍັງສະຖານທີ່ໜຶ່ງທີ່ບໍ່ເປີດເຜີຍ ຫຼັງຈາກທີ່ໄດ້ຖືກກຸ່ມຜູ້ປະທ້ວງໄດ້ບຸກເຂົ້າມາ ຍ້ອນຄວາມບໍ່ພໍໃຈບັນດາຜູ້ນຳປະເທດ ທີ່ບໍລິຫານປະເທດຜິດພາດ ຈົນເຮັດໃຫ້ປະເທດປະເຊີນກັບວິກິດຄັ້ງຮຸນແຮງ.