ອອສເຕເລຍຈະຊ່ວຍເຫຼືອອັຟການິສະຖານທີ່ຖືກຜົນກະທົບຈາກແຜ່ນດິນໄຫວ ຈຳນວນ 1 ລ້ານໂດລາອອສເຕເລຍ
ອ້າງອີງຈາກ ABC News Australia ໄດ້ລາຍງານວ່າ: ລັດຖະບານປະກາດຈະໃຫ້ເງິນຊ່ວຍເຫຼືອສຸກເສີນເພີ່ມ 1 ລ້ານໂດລາອອສເຕເລຍ ສຳລັບອັຟການິສະຖານ ຫຼັງຈາກທີ່ໄດ້ຮັບຜົນກະທົບຈາກແຜ່ນດິນໄຫວຄັ້ງໃຫຍ່ ທີ່ເຮັດໃຫ້ມີຄົນເສຍຊີວິດໄປ 1.000 ຄົນ ແລະ ເຮັດໃຫ້ຄົນຫຼາຍກວ່າພັນຄົນ ບໍ່ມີທີ່ຢູ່ອາໄສ.
ເພນນີ ຫວ່ອງ ລັດຖະມົນຕີກະຊວງການຕ່າງປະເທດ ໄດ້ຖະແຫຼງວ່າ ການສະໜອງທຶນດັ່ງກ່າວຢູ່ໃນ 140 ລ້ານໂດລາອອສເຕເລຍ ທີ່ໃຫ້ຄຳໝັ້ນວ່າຈະໃຫ້ການຊ່ວຍເຫຼືອແກ່ອັຟການິສະຖານ.
ແຜ່ນດິນໄຫວຂະໜາດ 6.1 ຣິກເຕີ ທີ່ພາກຕາເວັນອອກຂອງປະເທດ ໃນອາທິດທີ່ຜ່ານມານີ້ ໄດ້ສ້າງຄວາມເສຍຫາຍໃຫ້ເຮືອນ 10,000 ຫຼັງ ແລະ ມີປະມານ 2,000 ຄົນໄດ້ຮັບບາດເຈັບ.
ກຸ່ມຕະລີບັນ ໄດ້ຮຽກຮ້ອງໃຫ້ໂລກມອບສິດພື້ນຖານໃຫ້ແກ່ຄົນອັຟການິສະຖານ ຄືສິດໃນການມີຊີວິດຂອງພວກເຂົາ, ຂໍຮ້ອງໃຫ້ຍົກເລີກການຂວ້ຳບາດຕໍ່ພວກເຂົາ ແລະ ຍົກເລີກການທີ່ກັກຊັບສິນຂອງພວກເຂົາ.