ວັນທີ 22 ມິຖຸນາ 2022, ທ່ານ ເຣດໂນ ມາຊູດີ ລັດຖະມົນຕີຕ່າງປະເທດອິນໂດເນເຊຍ ເຜີຍວ່າ: ທ່ານ ໂຈໂກ ວີໂດໂດ ປະທານາທິບໍດີອິນໂດເນເຊຍ ກຽມຢ້ຽມຢາມປະເທດຢູເຄຣນ ແລະ ຣັດເຊຍໃນອາທິດໜ້າ, ເພື່ອເຈລະຈາ ແລະ ຫາທາງອອກຮ່ວມກັນກັບຜູ້ນຳທັງສອງປະເທດ. ຖືວ່າເປັນຜູ້ນຳຄົນຄຳອິດໃນອາຊຽນ ທີ່ຕັດສິນໃຈເດີນທາງຢ້ຽມຢາມຢູເຄຣນ ແລະ ຣັດເຊຍໃນໄລຍະສົງຄາມ.

ທ່ານ ມາຊູດີ ລະບຸວ່າ: ສະຖານະການໃນປັດຈຸບັນຂ້ອນຂ້າງມີຄວາມຊັບຊ້ອນ, ຄວາມຂັດແຍ່ງກັນທີ່ຍັງດຳເນີນຢູ່ໃນປັດຈຸບັນນີ້ ກະທົບຕໍ່ມະນຸດຢ່າງໃຫຍ່ຫຼວງ ລວມທັງໃນວິກິດຂອງອາຫານ, ວິກິດນ້ຳມັນເຊື້ອໄຟ, ລວມທັງວິກິດການເງິນ ໂດຍທາງການອິນໂດເນເຊຍໃນຖານະປະທານກອງປະຊຸມສຸດຍອດຜູ້ນຳ G20 ຈະຍັງບໍ່ໃຊ້ “ໂທລະໂຄ່ງການທູດ” (Megaphone Diplomacy) ທີ່ສົ່ງສຽງຮ້ອງໃສ່ກັນໄປມາ ເພື່ອໃຫ້ບັນລຸຈຸດປະສົງທີ່ຕົນຕ້ອງການ, ແຕ່ຈະໃຊ້ວີທີການເຈລະຈາປານີປານອມ ເພື່ອໃຫ້ບັນລຸຜົນໃນແນວທາງທີ່ເປັນປະໂຫຍດຕໍ່ປະຊາຄົມໂລກຫຼາຍທີ່ສຸດ.

ແຫຼ່ງຂໍ້ມູນຈາກ ຣອຍເຕີ