ສຳນັກຂ່າວຕ່າງປະເທດ ລາຍງານວ່າ: ໃນວັນທີ 16 ມິຖຸນາ 2022 ທະນາຄານກາງຫຼາຍປະເທດໃນເອີຣົບປະກາດຂຶ້ນອັດຕາດອກເບ້ຍມາດຕະຖານ  ໂດຍບາງປະເທດເພີ່ມຂຶ້ນມາຈົນເກີນຄວາມຄາດໝາຍຂອງນັກວິເຄາະ ເພື່ອຮັບມືກັບອັດຕາເງິນເຟີ້ທີ່ເພີ່ມສູງຂື້ນຢ່າງຕໍ່ເນື່ອງ ແລະ ກຳລັງສົ່ງຜົນກະທົບຕໍ່ເງິນເກັບຂອງປະຊາຊົນ ແລະ ລາຍໄດ້ຂອງບັນດາບໍລິສັດຕ່າງໆ.

ທະນາຄານກາງຂອງປະເທດສະວິດເຊີແລນ ປະກາດຂື້ນດອກເບ້ຍຈາກ -0.75% ເປັນ -0.25% ນັບເປັນການຂື້ນດອກເບ້ຍຄັ້ງທຳອິດນັບຕັ້ງແຕ່ປີ 2007 ເຊິ່ງອາດຈະມີການປັບຂື້ນອີກໃນໄວໆນີ້ ແລະ ອາດຈະອອກຈາກອັດຕາຕິດລົບພາຍໃນປີນີ້ ໂດຍຄວາມເຄື່ອນໄຫວດັ່ງກ່າວ ເຮັດໃຫ້ຄ່າເງິນຂອງສະວິດເຊີແລນເພີ່ມຂຶ້ນ 1.8% ເມື່ອທຽບໃສ່ກັບເງິນຢູໂຣ.

ຂະນະດຽວກັນ, ທະນາຄານກາງແຫ່ງອັງກິດກໍມີການເຄື່ອນໄຫວດ້ວຍຄວາມລະມັດລະວັງເພື່ອບໍ່ໃຫ້ເສດຖະກິດທົດຖອຍລົງ ໂດຍການຂື້ນດອກເບ້ຍເງິນກູ້ຈຳນວນ 0.25% ເປັນ 1.25% ເພື່ອຮັບມືກັບພາວະເງິນເຟີ້ທີ່ມີທ່າອ່ຽງຈະເກີນ 11% ແຕ່ນີ້ຖືເປັນການຂື້ນດອກເບ້ຍຄັ້ງທີ 5 ຂອງພວກເຂົານັບຕັ້ງແຕ່ເດືອນ ທັນວາ ຂອງປີກ່ອນ ແລະ ອາດຖືກກົດດັນໃຫ້ມີການຂື້ນດອກເບ້ຍອີກ.

ຢ່າງໃດກໍຕາມ ຄາດວ່າທະນາຄານກາງອັງກິດຈະມີການຂຶ້ນດອກເບ້ຍອີກ ຫຼັງຈາກທະນາຄານກາງແຫ່ງສະຫະຣັດ (FED) ມີການປັບຂື້ນດອກເບ້ຍ 0.75% ຫຼາຍທີ່ສຸດນັບຕັ້ງແຕ່ປີ 1994 , ທະນາຄານການຮົງກາລີ ສ້າງຄວາມປະຫຼາດໃຈໂດຍການ ເພີ່ມອັດຕາດອກເບ້ຍເງິນຝາກໄລຍະເວລາ 1 ອາທິດຈຳນວນ 0.50% ເປັນ 7.25% ເພື່ອຈູງໃຈໃຫ້ທະນາຄານເອກະຊົນ ນຳເງິນມາຝາກກັບທະນາຄານກາງຫຼາຍຂື້ນ ໂດຍມີແຜນຈະຂື້ນດອກເບ້ຍເລື້ອຍໆ ຈົນກວ່າພວກເຂົາຈະເຫັນສັນຍານການຫຼຸດລົງຂອງອັດຕາເງິນເຟີ້.