ເກີດເຫດສະເທືອນຂວັນໃນປະເທດໄນຈີເຣຍ ກຸ່ມມືປືນບຸກໂຈມຕີໂບດຄຣິສ ກາດຍິງຜູ້ຄົນ ແລະ ດຶກລະເບີດ ຈົນເຮັດໃຫ້ມີຜູ້ເສຍຊີວິດຢ່າງໜ້ອຍ 50 ຄົນ, ບາດເຈັບອີກຈຳນວນຫຼາຍ ຄົນຮ້າຍຍັງມີການລັກພາໂຕບາດຫຼວງໄປນຳອີກ ຈົນຕອນນີ້ຍັງບໍ່ຮູ້ສະຕາກຳ.
ໃນວັນທີ 5 ມິຖຸນາ ທີ່ຜ່ານມາ ສຳນັກຂ່າວ BBC ລາຍງານວ່າ ເກີດເຫດກຸ່ມມືປືນບຸກກາດຍິງຜູ້ຄົນພາຍໃນໂບດຄຣິສ ໃນເມືອງໂອໂວ ແຂວງອອນໂດ ທາງຕະເວັນຕົກສຽງໃຕ້ຂອງປະເທດໄນຈີເຣຍ ຄາດວ່າມີຜູ້ເສຍຊີວິດຢ່າງໜ້ອຍ 50 ຄົນ ໃນຈຳນວນນີ້ມີເດັກນ້ອຍຫຼາຍຄົນລວມຢູ່ນຳ ນອກຈາກນີ້ຍັງມີຄົນບາດເຈັບອີກຈຳນວນຫຼາຍ.
ລາຍງານຂ່າວລະບຸວ່າ ກຸ່ມຄົນຮ້າຍໄດ້ໃຊ້ອາວຸດປືນກາດຍິງຜູ້ຄົນທີ່ກຳລັງປະກອບພິທີທາງສາສະໜາພາຍໃນໂບດ ເນື່ອງຈາກເປັນວັນເພນເທກອດ, ຈາກນັ້ນກຸ່ມຄົນຮ້າຍໄດ້ມີການຈູດສະນວນລະເບີດໂດຍແຮງລະເບີດຍັງເຮັດໃຫ້ອາຄານໂບດໄດ້ຮັບຄວາມເສຍຫາຍຢ່າງໜັກ ນອກຈາກນີ້ກຸ່ມຄົນຮ້າຍຍັງໄດ້ລັກພາໂຕບາດຫຼວງທີ່ເປັນປະທານໂບດແຫ່ງນີ້ໄປນຳ ຈົນຮອດຕອນນີ້ຍັງບໍ່ຮູ້ສະຕາກຳວ່າຈະເປັນແນວໃດ.
ເຈົ້າແຂວງອອນໂດ ໄດ້ກ່າວວ່າເຫດການດັ່ງກ່າວ ເປັນເຫດການນອງເລືອດທີ່ທຳລາຍຄວາມສະຫງົບສຸກຂອງປະຊາຊົນ ພ້ອມກັນນີ້ໄດ້ຮຽກຮ້ອງໃຫ້ຕຳຫຼວດ, ທະຫານເລັ່ງຈັບໂຕຄົນຮ້າຍມາຮັບໂທດ.
ຢ່າງໃດກໍຕາມ ຕຳຫຼວດໄດ້ເປີດເຜີຍວ່າ ຈົນຮອດຕອນນີ້ຍັງບໍ່ມີກຸ່ມໃດອອກມາ ອ້າງໂຕວ່າຜູ້ຢູ່ເບື້ອງຫຼັງເຫດການບຸກໂຈມຕີໂບດໃນຄັ້ງນີ້ ເຖິງແມ່ນວ່າຢູ່ໄນເຈຍເຣຍມັກຈະເກີດເຫດການບຸກໂຈມຕີຢູ່ເປັນປະຈຳ ແຕ່ແຂວງອອນໂດເປັນພື້ນທີ່ທີ່ສະຫງົບສຸກທີ່ສຸດ.